နိုင်ငံ့စီးပွားရေး၏ အဓိကမောင်းနှင်အားအဖြစ် MSME ကုန်ထုတ်လုပ်ငန်းများ ဖွံ့ဖြိုးရမည်ဟု နိုင်ငံတော်သမ္မတ ပြော
နိုင်ငံ့စီးပွားရေး ဖွံ့ဖြိုးတိုးတက်လာစေရေးအတွက် အသေးစား၊ အငယ်စားနှင့် အလတ်စားစီးပွားရေးလုပ်ငန်းများ (MSME) ကို အခြေခံကာ စီးပွားရေးမြှင့်တင်ဆောင်ရွက်ရမည်ဖြစ်ကြောင်း နိုင်ငံတော်သမ္မတ ဦးမင်းအောင်လှိုင်က ပြောကြားသည်။
ယနေ့ (ဇွန် ၉ ရက်) ကျင်းပသည့် ပြည်ထောင်စုအစိုးရအဖွဲ့ အစည်းအဝေးတွင် နိုင်ငံ့စီးပွားရေး ဖွံ့ဖြိုးတိုးတက်ရေးနှင့် ပတ်သက်၍ ထိုသို့ ထည့်သွင်းပြောကြားခဲ့ခြင်းဖြစ်သည်။
နိုင်ငံ၏ ပကတိအခြေအနေနှင့် ကိုက်ညီသည့် စီးပွားရေးလုပ်ငန်းများမှာ MSME လုပ်ငန်းများဖြစ်ကြောင်း၊ ယင်းလုပ်ငန်းများ ဖွံ့ဖြိုးတိုးတက်လာစေရေးအတွက် တိုင်းဒေသကြီးနှင့် ပြည်နယ်များအလိုက် အလေးထားကြိုးပမ်းဆောင်ရွက်ရန် လိုအပ်ကြောင်း ၎င်းက ဆိုသည်။
“နိုင်ငံအခြေအနေအရ MSME ကို ဗဟိုပြုပြီး နိုင်ငံ့စီးပွားရေးကို မြှင့်တင်ဆောင်ရွက်ရမှာဖြစ်ပါတယ်” ဟု နိုင်ငံတော်သမ္မတက ပြောကြားသည်။
ထို့ပြင် သံနှင့်သံမဏိလုပ်ငန်းများ၊ အထည်ချုပ်လုပ်ငန်းများ၊ လျှပ်စစ်ပစ္စည်းနှင့် နည်းပညာဆိုင်ရာပစ္စည်းများ ထုတ်လုပ်ခြင်း၊ မော်တော်ယာဉ်ထုတ်လုပ်ခြင်း စသည့် နည်းပညာအခြေပြု အကြီးစားကုန်ထုတ်လုပ်ငန်းများကိုလည်း တစ်ပြိုင်နက်တည်း ဖွံ့ဖြိုးတိုးတက်အောင် ဆောင်ရွက်သွားရမည်ဖြစ်ကြောင်း ပြောကြားခဲ့သည်။
ယင်းလုပ်ငန်းများကို အကောင်အထည်ဖော်ရာတွင် အဆင့်မြင့်ပညာသင်ကြားပြီး လူသားအရင်းအမြစ်များကို ထိရောက်စွာ အသုံးချဆောင်ရွက်သင့်ကြောင်းလည်း ၎င်းက တိုက်တွန်းခဲ့သည်။
ပြီးခဲ့သည့်နှစ်များမှစတင်၍ MSME လုပ်ငန်းများ ဖွံ့ဖြိုးတိုးတက်လာခဲ့သကဲ့သို့ စိုက်ပျိုးရေးနှင့် မွေးမြူရေးကဏ္ဍများကို မြှင့်တင်ဆောင်ရွက်ရမည်ဖြစ်ပြီး MSME ကုန်ထုတ်လုပ်ငန်းများကိုလည်း နိုင်ငံ့စီးပွားရေး၏ အဓိကမောင်းနှင်အားတစ်ရပ်အဖြစ် ဖွံ့ဖြိုးလာစေရန် အားပေးဆောင်ရွက်ရမည်ဖြစ်ကြောင်း နိုင်ငံတော်သမ္မတက မှာကြားခဲ့သည်။
