ကမ္ဘာ့ဖလားနှင့် Ballon d'Or ဆွတ်ခူးရန် အင်္ဂလန်အသင်းခေါင်းဆောင်ဟယ်ရီကိန်း ပစ်မှတ်ထားနေ
======================

ဟယ်ရီကိန်းက တစ်နှစ်တည်းတွင် ကမ္ဘာ့ဖလားနှင့် Ballon d'Or ဆွတ်ခူးရန် ပစ်မှတ်ထားနေကြောင်း ဖွင့်ဟပြောကြားလာပါတယ်။
အင်္ဂလန်အသင်းခေါင်းဆောင်ဟာ ယခုနွေတွင် အင်္ဂလန်နှင့်အတူ ကမ္ဘာ့ဖလားဆွတ်ခူးရန် ရည်မှန်းထားသလို ယခုနှစ် နှောင်းပိုင်းတွင် လန်ဒန်တွင် ပထမဆုံးအကြိမ် ကျင်းပချီးမြှင့်လာမဲ့ Ballon d'Or ဆုကိုလည်း ဆွတ်ခူးရန် ပစ်မှတ်ထားနေတာပါ။
ဟယ်ရီကိန်းဟာ ပြီးခဲ့တဲ့ရာသီတုန်းက ဘိုင်ယန်မြူးနစ်အတွက် ၆၁ ဂိုးသွင်းယူကာ ပြည်တွင်းဆုဖလား ၂ လုံး ဆွတ်ခူးနိုင်အောင် ကူညီခဲ့သူလည်း ဖြစ်ပါတယ်။
ကမ္ဘာ့ဖလားပြိုင်ပွဲအတွက် အမေရိကန်သို့ ရောက်နေပြီ ဖြစ်တဲ့ ဟယ်ရီကိန်းက "ကမ္ဘာ့ဖလားကိုင်မြှောက်နေတာကို မစိတ်ကူးဖူးဘူးဆိုရင် လိမ်ရာကျပါလိမ့်မယ်။ ဒီဖလားရဖို့ ရည်မှန်းထားတယ်။ ဒါက ကျွန်‌တော်တို့ရဲ့ ဦးတည်ချက်ပါ။ မလွယ်မှန်းလည်း သိပါတယ်။ ဒါပေမဲ့ ပြီးခဲ့တဲ့နှစ်တွေမှာ ကျွန်တော်တို့ အ‌ရေးပါတဲ့ ဆုဖလား ရယူနိုင်ဖို့ နီးစပ်ခဲ့ကြတယ်။ ယူရိုဗိုလ်လုပွဲ နှစ်ကြိမ် တက်ခဲ့တယ်။ ကမ္ဘာ့ဖလားဆီမီးဖိုင်နယ်၊ ကွာတားဖိုင်နယ်(၂၀၂၂)တို့မှာ တက်ခဲ့တယ်။ ဒီနှစ်နည်းပြသစ်၊ ကစားသမားသစ်အချို့ ရှိနေတယ်။ ဒီလိုပြိုင်ပွဲက အရမ်းကို ဖိအားများပေမဲ့ စိတ်လှုပ်ရှားစရာကောင်းပါတယ်"လို့ ပြောကြားသွားပါတယ်။
Ballon d'Or ဆုပေးပွဲကို အောက်တိုဘာလ ၂၆ ရက်နေ့တွင် လန်ဒန်တွင် ကျင်းပလာပါမယ်။
ကမ္ဘာ့ဖလားဆွတ်ခူးလာပါက Ballon d'Or ဆွတ်ခူးလာနိုင်မလားလို့ မေးမြန်းလာချိန်တွင် ဟယ်ရီကိန်းက "ကျွ်တော်က ရေပန်းစားနေတဲ့သူတွေထဲမှာ ပါဝင်ဖို့ သေချာပါတယ်။ ဒီရာသီမှာ ရခဲ့တဲ့ ဆုဖလားတွေ၊ သွင်းခဲ့တဲ့ ဂိုးအရေအတွက်ကြောင့် ကျွန်တော်က ထိပ်ဆုံးက ရေပန်းစားနေသူဆိုတာ သေချာပါတယ်။ တကယ်လို့ အင်္ဂလန်သာ ကမ္ဘာ့ဖလားရခဲ့ရင် အင်္ဂလန်ကစားသမားတစ်ဦး ရလာနိုင်ပါတယ်။ Ballon d'Or ဆုအတွက် ရေပန်းစားသူတွေကို ကြည့်လိုက်ရင် မိုက်ကယ်အိုလီဆီ၊ ချန်ပီယံလိဂ်ဗိုလ်လုပွဲရောက် ကစားသမားတွေနဲ့ ကျွန်တော်ဆိုတာ မြင်ကြမှာပါ။ ဒါပေမဲ့ တချိန်တည်းမှာပဲ ကျွန်တော်က Ballon d'Or ဆုက ကျွန်တော်နဲ့ပဲ ထိုက်တန်တယ်လို့ ပြောတတ်တဲသူမျိုး မဟုတ်ပါဘူး။ ကွင်းထဲမှာပဲ စကားပြောတတ်တဲ့သူပါ"လို့ ပြောကြားသွားပါတယ်။