ရီးရဲလ်မက်ဒရစ်ကစားသမားတစ်ဦးမျှ မပါဝင်တဲ့ ကမ္ဘာ့ဖလားလူစာရင်းအား စပိန်ကြေညာလာ
===================
စပိန်အသင်းဟာ ၂၀၂၆ ကမ္ဘာ့ဖလားပြိုင်ပွဲအတွက် အပြီးသတ်လူစာရင်းအား ကြေညာလာရာမှာ ဒဏ်ရာရရှိနေတဲ့ လာမိန်းယာမဲလ် ပါဝင်လာပြီး ရီးရဲလ်မက်ဒရစ်ကစားသမားတစ်ဦးမျှ ပါဝင်လာခြင်း မရှိတာ တွေ့ရပါတယ်။
အသက် ၁၈ နှစ်အရွယ်ရှိ လာမိန်းယာမဲလ်ဟာ ဧပြီလ ၂၂ ရက်နေ့တုန်းက ဘာစီလိုနာအတွက် ကစားစဉ် ဘယ်ဖက်တံကောက်ကြောဒဏ်ရာရရှိပြီးနောက် အနားယူလာခဲ့ရသူလည်း ဖြစ်ပါတယ်။
ဒါ့အပြင် တံကောက်ကြောဒဏ်ရာကြောင့် အနားယူနေရတဲ့ ဘီလ်ဘာအိုတောင်ပံကစားသမားနီကိုဝီလီယံလည်း စပိန်အသင်းလူစာရင်းတွင် ပါဝင်ပါတယ်။
စပိန်နည်းပြလူးဝစ်ဒီဖူအန်တီဟာ ရီးရဲလ်မက်ဒရစ်နောက်ခံလူများဖြစ်ကြတဲ့ ဒိန်းဟွိုက်ဆင်၊ ဒါနီကာဗာဂျယ်တို့အား ချန်လှပ်ထားခဲ့တာ ဖြစ်ပါတယ်။
ကမ္ဘာဖ့လားပြိုင်ပွဲကို ဇွန်လ ၁၁ ရက်နေ့မှ ဇူလိုင်လ ၁၉ ရက်နေ့အထိ ကျင်းပလာမှာ ဖြစ်ပြီး စပိန်အသင်းမှာ ဇွန်လ ၁၅ ရက်နေ့တွင် ကိတ်ဗာဒီနှင့်လည်းကောင်း၊ ဇွန်လ ၂၁ ရက်နေ့တွင် ဆော်ဒီနှင့်လည်းကောင်း၊ ဇွန်လ ၂၆ ရက်နေ့တွင် ဥရုဂွေးနှင့်လည်းကောင်း အုပ်စုပွဲစဉ်များ ကစားရပါမယ်။
အရိုးအက်ဒဏ်ရာကြောင့် လေးလကြာ အနားယူခဲ့ရပြီးနောက် တနင်္ဂနွေနေ့ ပရီးမီးယားလိဂ်ရာသီသိမ်းပွဲတွင်မှ ပြန်လည်ကစားလာနိုင်ခဲ့တဲ့ အာဆင်နယ်အလယ်တန်းကစားသမားမီခေးလ်မီရီနိုလည်း စပိန်အသင်းလူစာရင်းတွင် ပါဝင်လာပါတယ်။
ပရီးမီးယားလိဂ်တွင် ကစားနေတဲ့ ဒေးဗစ်ရာယာ(အာဆင်နယ်)၊ မာတင်ဇူဘီမန်ဒီ(အာဆင်နယ်)၊ ပီဒရိုပေါ်ရို(စပါးစ်)၊ မာ့ခ်ကူကူရယ်လာ(ချဲလ်ဆီး)၊ ရိုဒရီ(မန်စီးတီး)၊ ယီရီမီပီနို(ပဲလေ့စ်)တို့လည်း ရွေးချယ်ခံထားရပါတယ်။
ဘာစီလိုနာနှင့် အက်သလက်တီကိုတို့တွင် ခြေစွမ်းပြကစားနေတဲ့ နောက်ခံလူ အဲရစ်ဂါစီယာနှင့် မာ့ခ်ပူဘေးလ်တို့မှာလည်း စပိန်အသင်းတွင် ရွေးချယ်ခြင်းခံခဲ့ရပါတယ်။
