၅၃ နှစ်အတွင်း ပထမဆုံးအကြိမ် ယူရိုပါလိဂ်ဝင်ခွင့်ရရှိလာတဲ့ ဆန်းဒါးလန်း
======================
ဆန်ဒါးလန်းဟာ ရာသီသိမ်းပွဲတွင် ချဲလ်ဆီးအား အနိုင်ယူကာ ၅၃ နှစ်အတွင်း ပထမဆုံးကြိမ် ဥရောပဝင်ခွင့် ရရှိလာမှုအဖြစ် ယူရိုပါလိဂ်ဝင်ခွင့်ရလာပါတယ်။
ဆန်းဒါးလန်းဟာ ချဲလ်ဆီးအား ၂-၁ ဖြင့် အနိုင်ရရှိကာ ပရီးမီးယားလိဂ်အဆင့် ၇ နေရာမှာသာ ရပ်တည်လာပေမဲ့လည်း တန်းတက်ပြီး တစ်နှစ်အကြာမှာ ဥရောပဝင်ခွင့် ရရှိလာတဲ့ ၅ သင်းမြောက်အသင်း ဖြစ်လာပါတယ်။
ချဲလ်ဆီးကတော့ ယခုရှုံးပွဲကြောင့် အမှတ်ပေးဇယားအဆင့် ၁၀ နေရာဖြင့် ဇာတ်သိမ်းခဲ့ရကာ ဥရောပဝင်ခွင့်လွဲချော်ခဲ့ရပါတယ်။
ဆန်းဒါးလန်းဟာ ဟူမီရဲ့ ဂိုးဖြင့် ပွဲကို ဦးဆောင်နိုင်ခဲ့ပြီးနောက် ဒုတိယပိုင်း အစ ၅ မိနစ်မှာ ဂပ်စ်တိုရဲ့ OG ဂိုးကြောင့် ပွဲကို ၂-၀ ဖြင့် ဦးဆောင်နိုင်ခဲ့ပါတယ်။
ချဲလ်ဆီးဟာ ၅၆ မိနစ်မှာ ကိုးလ်ပါလ်မာရဲ့ ဂိုးဖြင့် ချေပနိုင်ခဲ့လို့ မျှော်လင့်ချက် လင်းလက်လာခဲ့ပါသေးတယ်။
ဒါပေမဲ့ ၆၂ မိနစ်မှာ ဖိုဖာနာ နှစ်ဝါတစ်နီဖြင့် အထုတ်ခံရပြီးတဲ့နောက် ချဲလ်ဆီးရဲ့မျှော်လင့်ချက် အဆုံးသတ်သွားပါတော့တယ်။
ဒီအနီကတ်က ယခုရာသီမှာ ချဲလ်ဆီးရဲ့ ၈ ကြိမ်မြောက် အနီကတ်ပြသခံလာရတာ ဖြစ်ပြီး ပရီးမီးယားလိဂ်တစ်ရာသီအတွင်း အနီကတ်အများဆုံးပြသခံရတဲ့ အသင်းအဖြစ်လည်း မှတ်တမ်းဝင်လာပါတယ်။
ဒါ့အပြင် တနင်္ဂနွေနေ့ ရာသီသိမ်းပွဲတွင် နိုင်ပွဲ မရရှိခဲ့ကြတဲ့ ဘုန်းမောက် (ယူရိုပါလိဂ်)၊ ဘရိုကတန် (ကွန်ပဖရင့်လိဂ်)တို့လည်း ဥရောပဝင်ခွင့်အသီးသီး ရရှိခဲ့ကြပါတယ်။
