ဆိုရှယ်မီဒီယာပို့စ်များအတွက် ဘုန်းမောက်ရဲ့ စုံစမ်းစစ်ဆေးမှုခံရကာ ပထမအသင်းမှ ဖယ်ရှားခံလာရတဲ့ နောက်ခံလူဂျေမီနက်ဇ်
==================
ဘုန်းမောက်ဟာ ဆိုရှယ်မီဒီယာပို့စ်များအတွက် နောက်ခံလူအဲလက်စ်ဂျေမီနက်ဇ်ကို စုံစမ်းစစ်ဆေးမှုများ ပြုလုပ်လာပါတယ်။
နွေရာသီတုန်းက အေစီမီလန်မှ ရောက်လာတဲ့ အသက် ၂၁ နှစ်ရှိ ဂျေမီနက်ဇ်ဟာ ဘုန်းမောက်ပထမအသင်းမှ ဖယ်ရှားခြင်းခံလာရကာ ယနေ့ညတွင် ဖူလ်ဟမ်နှင့် ရင်ဆိုင်ရမဲ့ ပရီးမီးယားလိဂ်ပွဲစဉ်တွင် ပါဝင်လာမှာ မဟုတ်ပါဘူး။
ဘုန်းမောက်ဘက်က ဂျေမီနက်ဇ်ကို ဆိုရှယ်မီဒီယာပို့စ်များကြောင့် စစ်ဆေးနေကြောင်းသာ ကြေညာထားပြီး အတိအကျ ပြောဆိုရေးသားထားခြင်း မရှိပါဘူး။
ဒါပေမဲ့ ဗြိတိန်မီဒီယာများရဲ့ ဖော်ပြမှုအရ ဘုန်းမောက်ရဲ့ စစ်ဆေးမှုများတွင် အသက် ၁၅ နှစ်အရွယ် အမျိုးသမီးငယ်တစ်ဦးကို မက်ဆေ့ချ်များ ပေးပို့တဲ့ အဖြစ်အပျက်လည်း ပါဝင်နေကြောင်း သိရပါတယ်။
ဂျေမီနက်ဇ်ဟာ နွေရာသီတုန်းက အေစီမီလန်မှ အငှားဖြင့် ပြောင်းလာပြီးနောက် ဖေဖော်ဝါရီလတွင် ၂၀၃၁ ခုနှစ်အထိ စာချုပ်ဖြင့် အပြီးသတ်ပြောင်းရွှေ့ခဲ့သူ ဖြစ်ပါတယ်။
ညာနောက်ခံလူဟာ ယခုရာသီတွင် ဘုန်းမောက်အတွက် ၃၂ ပွဲကစားထားပြီး ၁ ဂိုးသွင်းထားပါတယ်။
