ဘိုင်ယန်ဘက်က အပြီးသတ်ခေါ်ယူရန် အစီအစဉ်မရှိဘဲ စတမ်းဖို့ဒ်ဘရစ်ချ်သို့ ပြန်ရတော့မယ့် နီကိုလပ်စ်ဂျက်ဆင်
====================
နီကိုလပ်စ်ဂျက်ဆင်ဟာ ဘိုင်ယန်မြူးနစ်ဘက်က အပြီးသတ်ခေါ်ယူရန် ဆန္ဒမရှိမှုနှင့်အတူ ရာသီအကုန်တွင် ချဲလ်ဆီးသို့ ပြန်ရတော့မှာ ဖြစ်ပါတယ်။
နီကိုလပ်စ်ဂျက်ဆင်ဟာ ဘိုင်ယန်မြူးနစ်တွင် အခွင့်အရေးရတိုင်း ခြေစွမ်းပြနေသလို နည်းပြဗင်းဆင့်ကွန်ပနီရဲ့ ယုံကြည်မှုလည်း ရှိနေပါတယ်။
ဒါပေမယ့် ဘိုင်ယန်မြူးနစ်ဟာ ဟယ်ရီကိန်းမှာ အကောင်းဆုံးပုံစံဖြင့် ခြေစွမ်းပြနေတဲ့အပြင် ဆီနီဂေါလက်ရွေးစင်အား ရေရှည်စီမံကိန်းဖြင့် ခေါ်ယူလာပါက ကုန်ကျလာမယ့် စရိတ်များကြောင့် အပြီးသတ် မခေါ်ယူရန် ဆုံးဖြတ်ခဲ့တာလည်း ဖြစ်ပါတယ်။
နီကိုလပ်စ်ဂျက်ဆင်ဟာ နွေရာသီအပြောင်းအရွှေ့ဈေးကွက်နောက်ဆုံးနေ့တွင် ချဲလ်ဆီးမှ ဘိုင်ယန်မြူးနစ်သို့ တစ်ရာသီငှားရမ်းခ ယူရို ၁၆.၅ သန်းဖြင့် အငှားဖြင့် ရောက်လာခဲ့တာ ဖြစ်ပါတယ်။
ဘိုင်ယန်မြူနစ်ဟာ အသက် ၂၄ နှစ်ရှိ တိုက်စစ်မှူးမှာ ၉ ဂိုးသွင်းကာ ၄ ကြိမ် ဖန်တီးထားနိုင်တဲ့ စွမ်းဆောင်ရည်အပေါ် ကျေနပ်နေပေမယ့်လည်း အပြီးသတ် မခေါ်ယူရန် ဆုံးဖြတ်လိုက်ပြီ ဖြစ်ပါတယ်။
နီကိုလပ်စ်ဂျက်ဆင်ဟာ ဘိုင်ယန်မြူးနစ်နှင့်အတူ ဘွန်ဒက်စ်လီဂါဖလား ဆွတ်ခူးထားပြီး ဖြစ်ကာ ဂျာမန်ပိုကယ်ဖလားတွင် ဗိုလ်လုပွဲ၊ ချန်ပီယံလိဂ်တွင် ဆီမီးဖိုင်နယ်သို့ တက်ရောက်ထားနိုင်ကာ ဆုဖလား ၃ လုံးဆွတ်ခူးနိုင်မယ့် အခွင့်အရေး ရရှိထားပါတယ်။
နီကိုလပ်စ်ဂျက်ဆင်ဟာ ၂၀၂၃ ခုနှစ် နွေရာသီတွင် ဗီလာရီးရဲလ်မှ ပြောင်းလာပြီးနောက် ချဲလ်ဆီးအတွက် ၈၁ ပွဲကစားထားရာမှာ ဂိုး ၃၀ သွင်းပြီး ၁၂ ကြိမ်ဖန်တီးထားကာ ကွန်ဖရင့်လိဂ်ဖလား၊ ကလပ်ကမ္ဘာ့ဖလားတို့ ဆွတ်ခူးထားနိုင်ပါတယ်။
