ပီအက်စ်ဂျီနှင့် ချန်ပီယံလိဂ်ကွာတားဖိုင်နယ်ပွဲစဉ်မတိုင်မီ လီဗာပူးစတားများကို ပြင်းထန်စွာ သတိပေးလာတဲ့ အန်းဆလော့
====================
လီဗာပူးနည်းပြအန်းဆလော့က စနေနေ့တုန်းက မန်စီးတီးနှင့်ပွဲစဉ်တုန်းက ခြေစွမ်းမျိုးဖြင့် ဆက်လက်ကစားလာမည်ဆိုပါက ပီအက်စ်ဂျီနှင့် ချန်ပီယံလိဂ်ကွာတားဖိုင်နယ်ပထမအကျော့ပွဲစဉ်တွင် နောက်ထပ် ၄ ဂိုးသွင်းခြင်းခံရလိမ့်မယ်လို့ လီဗာပူးစတားများကို သတိပေးပြောကြားလာပါတယ်။
ဆလော့ဦးဆောင်တဲ့ လီဗာပူးဟာ စနေနေ့တုန်းက အက်ဖ်အေဖလားကွာတားဖိုင်နယ်တွင် မန်စီးတီးအား ၄-၀ ဂိုးဖြင့် အရေးနိမ့်ခဲ့ပြီး ယင်း ၄ ဂိုးမှာ ပွဲချိန် ၅၈ မိနစ်အတွင်း ပေးခဲ့ရတာလည်း ဖြစ်ပါတယ်။
ယင်းပွဲအပြီးတွင် လီဗာပူးအသင်းခေါင်းဆောင်ဗာဂယ်ဗန်ဒိုက်က လီဗာပူးကစားသမားများမှာ ပထမပိုင်းနှင့် ဒုတိယပိုင်းတို့တွင် ပွဲချိန် မိနစ် ၂၀ တွင် ဆိုးရွားစွာ ကစားမှုနှင့်အတူ ၄ ဂိုးပေးလိုက်ရတာလို့ ဆိုသွားပါတယ်။
ယခုအခါ အန်းဆလော့က လီဗာပူးအနေဖြင့် မန်စီးတီးနှင့်ပွဲစဉ်တုန်းက ပထမဆုံး ၃၅ မိနစ်တုန်းကကဲ့သို့ ကစားမည်ဆိုပါက ပီအက်စ်ဂျီကို ကျော်ဖြတ်ကာ ချန်ပီယံလိဂ်ဆီမီးဖိုင်နယ်သို့ တက်နိုင်စွမ်း ရှိကြောင်း ဆိုလာပါတယ်။
ယနေ့ည Parc des Princes ပွဲစဉ်မတိုင်မီ အန်းဆလော့က "မန်စီးတီးနဲ့ပွဲတုန်းက မိနစ် ၂၀ မျိုးသာ ကစားရင် ကျုပ်တို့ နောက်ထပ် လေးဂိုးထပ်ပေးရပါလိမ့်မယ်။ ကျုပ်တို့သာ အဲဒီလို မိနစ် ၂၀ မျိုး ကစားလာရင် ဒီပီအက်စ်ဂျီကစားသမားတွေက ဘာလုပ်ရမလဲဆိုတာ သိကြပါတယ်။ ဒီတော့ ပထမမိနစ်ကနေ နောက်ဆုံးစက္ကန့်အထိ မန်စီးတီးနဲ့ပွဲတုန်းက ၃၅ မိနစ်တုန်းက ခြေစွမ်းနဲ့ကစားဖို့က စိန်ခေါ်မှု ဖြစ်နေပါတယ်။ အဲဒီလိုသာ မကစားနိုင်ရင် ခက်ခဲတဲ့ ညတစ်ညထပ်ကြုံလာပါမယ်။ ပြီးခဲ့တဲ့နှစ်တုန်းက ဒီမှာ ကျုပ်တို့ ၄-၀ နဲ့တောင် ရှုံးဖို့ ထိုက်တန်ခဲ့တယ်။ ဒီထက်လည်း ပေးရနိုင်တယ်။ ဒါပေမယ့် ဘောလုံးရဲ့အလှအပတရားဆိုတာ ၈၅ မိနစ်မှာ ဂိုးသွင်းလိုက်ပြီဆိုတာနဲ့ အခိုးခံလိုက်ရတယ်လို့ ပြောတတ်ကြတယ်"လို့ ပြောကြားသွားပါတယ်။
လီဗာပူးဟာ ပြီးခဲ့တဲ့ရာသီတုန်းက ဂိုးသမားအလစ်ဆင်ရဲ့ လက်စွမ်းပြမှုကြောင့် ပီအက်စ်ဂျီကို အဝေးကွင်းမှာ ၁-၀ ဖြင့် အနိုင်ရခဲ့ပေမယ့် ဒုတိယအကျော့ အန်ဖီးလ်ပွဲစဉ်တွင် ၁-၀ ဖြင့်ပင် ရှုံးနိမ့်ပြီးနောက် ပင်နယ်တီအဆုံးအဖြတ်တွင် အရေးနိမ့်ခဲ့ပါတယ်။
