ပရီးမီးယားလိဂ်တွင် VAR အသုံးပြုမှုအား ပရိသတ် ၇၅ ရာခိုင်နှုန်းက ဆန့်ကျင်နေ
===================
ပရီးမီးယားလိဂ်တွင် VAR အသုံးပြုမှုအား ပရိသတ် လေးပုံသုံးပုံက ကန့်ကွက်နေကြောင်း ဘောလုံးပရိသတ်များအဖွဲ့ချုပ်ရဲ့ စစ်တမ်းအရ သိရပါတယ်။
ဘောလုံးပရိသတ်များအဖွဲ့ချုပ်ဟာ ပရီးမီးယားလိဂ်ကလပ် ၂၀ ကို အားပေးကြတဲ့ ပရိသတ် ၈၀၀၀ နီးပါးအား VAR အသုံးပြုမှုနှင့်ပတ်သက်ပြီး စစ်တမ်းပြုစုခဲ့တာလည်း ဖြစ်ပါတယ်။
ပရိသတ်အားလုံးရဲ့ ၉၀ ရာခိုင်နှုန်းက VAR နည်းပညာအသုံးပြုမှုကြောင့် ပွဲအတွေ့အကြုံ ပိုမိုကောင်းမွန်လာခြင်း မရှိကြောင်း ဆိုခဲ့ကြသလို ၉၁ ရာခိုင်နှုန်းကလည်း VAR ကြောင့် ဂိုးသွင်းအောင်ပွဲခံမှုကို နှောင့်ယှက်နေကြောင်း ဆိုသွားပါတယ်။
ဒါ့အပြင် ပရိသတ် ၉၄ ရာခိုင်နှုန်းကလည်း VAR ကြောင့် ရုပ်သံမှ ဘောလုံးပွဲကြည့်ရတဲ့ ရသပျောက်ဆုံးနေစေကြောင်းလည်း ဆိုသွားပါတယ်။
ယင်းစစ်တမ်းကို ထောက်ရှုပါက ပရိသတ်များဟာ VAR အသုံးပြုမှုကို ဖယ်ရှားစေလိုနေကြတာလည်း ဖြစ်ပါတယ်။
ဒါ့အပြင် ဘောလုံးပရိသတ်များအဖွဲ့ချုပ်ရဲ့ စစ်တမ်းအရ ပရိသတ် ၇၂ ရာခိုင်နှုန်းက VAR ကြောင့် ဒိုင်လူကြီးရဲ့ ဆုံးဖြတ်ချက်ကို ပိုမို တိကျလာစေခြင်း မရှိကြောင်းဆိုထားသလို ပရိသတ် ၇၄ ရာခိုင်နှုန်းကလည်း ပွဲများတွင် VAR အသုံးပြုမှုနောက်ကွယ်မှ အကြောင်းရင်းမှာ ရှင်းလင်းမှု မရှိကြောင်းလည်း ဆိုထားပါတယ်။ တဖက်တွင် ပရိသတ် ၈၆ ရာခိုင်နှုန်းက VAR အား ပိုမိုတွင်ကျယ်စွာ အသုံးပြုလာမည်ကို စိုးရိမ်နေပါတယ်။
ဘောလုံးပရိသတ်များအဖွဲ့ချုပ်ရဲ့ စစ်တမ်းတွင် စိတ်ဝင်စားစရာကောင်းတာကတော့ ပရိသတ် ၇၂ ရာခိုင်နှုန်းက ထောင့်ကန်ဘောကန်ချိန်တွင် VAR အသုံးပြုမှုကို ကန့်ကွက်နေပြီး ၅၂ ရာခိုင်နှုန်းက ဒုတိယအဝါကတ်ပြသချိန်တွင် VAR အသုံးပြုမှုအား ကန့်ကွက်နေကြတာ ဖြစ်ပါတယ်။
ဖီဖာဟာ လာမယ့် ၂၀၂၆ ကမ္ဘာ့ဖလားပြိုင်ပွဲမှ စတင်ကာ ဒုတိယအဝါကတ်ပြသမှုအား VAR အသုံးပြုကာ ထပ်မံ စစ်ဆေးမှုပြုလုပ်လာတော့မှာ ဖြစ်ပါတယ်။
