ကာရစ်မှာ ၁၀ နှစ်အတွင်း ယူနိုက်တက်ရဲ့အကောင်းဆုံးနည်းပြဖြစ်ကြောင်း ဒေးဗစ်ဘက်ဟမ်း ချီးကျူးပြောကြားလာ
=======================
ယူနိုက်တက်ဂန္ထဝင်ဒေးဗစ်ဘက်ဟမ်းက လက်ရှိ ယာယီနည်းပြမိုက်ကယ်ကာရစ်မှာ ၁၀ နှစ်အတွင်းတွင် ယူနိုက်တက်ရဲ့ အကောင်းဆုံးနည်းပြဖြစ်ကြောင်း ချီးကျူးပြောဆိုလာပါတယ်။
အင်္ဂလန်အသင်းခေါင်းဆောင်ဟောင်းက မိုက်ကယ်ကာရစ်မှာ အသင်းကို ညက်ညောတဲ့ အပြောင်းအလဲ ဖြစ်လာအောင် လုပ်ဆောင်နေတဲ့အပြင် ချန်ပီယံလိဂ်ဝင်ခွင့် ရနိုင်တဲ့အထိပါ စွမ်းဆောင်ပေးထားမှုကြောင့် အမြဲတမ်းနည်းပြအဖြစ် ခန့်အပ်ရေး ထောက်ခံပြောဆိုလာတာလည်း ဖြစ်ပါတယ်။
ကာရစ်ဟာ ဇန်နဝါရီလ ၁၃ ရက်နေ့တွင် ရူဘင်အမိုရမ်နေရာမှာ ယာယီနည်းပြအဖြစ် အစားထိုးခန့်အပ်ခြင်းခံရပြီးနောက် ပရီးမီးယားလိဂ်ပွဲ ၁၀ ပွဲကိုင်တွယ်ရာတွင် ၇ ပွဲ နိုင်ပွဲ ရယူပေးထားကာ တစ်ပွဲပျမ်းမျှ ၂.၃၀ မှတ် ရယူပေးထားနိုင်ပါတယ်။
ဒေးဗစ်ဘက်ဟမ်းက "အရိုးသားဆုံး ပြောရရင် လွန်ခဲ့တဲ့လအချို့က ယခင် ၁၀ နှစ်တုန်းကထက် ပိုပြီးတော့ သက်သာသက်သာ ရှိတယ်လို့ ဝန်ခံရပါမယ်။ ခက်ခဲတဲ့ကာလကြုံခဲ့တယ်။ ဒါပေမယ့် မိုက်ကယ်မှာ အတွေ့အကြုံရှိပါတယ်။ ကလပ်ကို သူယူဆောင်ရမယ့်အရာနဲ့ပတ်သက်ပြီး စိတ်အေးလက်အေး ရှိတယ်။ သူက ဒီကလပ်ကို သိတယ်။ ကစားသမားတွေကို သိတယ်။ ယူနိုက်တက် ကစားပုံကို သိတယ်။ ယူနိုက်တက်ဘယ်လိုကစားရမလဲဆိုတာကိုလည်း သိတယ်"လို့ ပြောကြားသွားပါတယ်။
ဒါ့အပြင် အင်တာမိုင်ယာမီပူးတွဲပိုင်ရှင်က "မိုက်ကယ်ကို နည်းပြတစ်ဦးအနေနဲ့လည်း သဘောကျပါတယ်။ သူ့ကို ကြည့်လိုက်ရင် သွေးအေးအေးနဲ့ ရှိနေတာ မြင်ရပါမယ်။ ကွင်းဘေးကို ကြည့်လိုက်ရင် လှပနေတာ မြင်ရမယ်။ ဒီလို ပြောသင့် မပြောသင့်တော့ မသိပါဘူး။ ဒါပေမယ့် လှပနေပါတယ်။ သူ့အောင်ပွဲခံပုံ၊ ဒေါသထွက်ပုံ၊ သူ့မှာထိပ်တန်းနည်းပြတစ်ဦးမှာ ရှိရမယ့်အရာတွေ အားလုံး ရှိတယ်။ သူ့ရဲ့အသင်းကို တည်ဆောက်ပုံ၊ စည်းလုံးအောင် လုပ်ဆောင်ပုံတွေက တကယ့်ကို ကြီးကျယ်ခမ်းနားပါတယ်။ ယူနိုက်တက်ပရိသတ်တစ်ဦးအနေနဲ့ ကျွန်တော်တို့ လိုချင်တာ ရနေပြီလို့ ထင်တယ်"လို့ ပြောကြားသွားပါတယ်။
တဖက်တွင် ယူနိုက်တက်ဂန္ထဝင်တိုက်စစ်မှူးဝိန်းရွန်းနီကလည်း ယူနိုက်တက်အနေဖြင့် နည်းပြသစ်ရှာတော်ပုံဖွင့်မှုကို ရပ်ဆိုင်းကာ ကာရစ်ကို အမြဲတမ်းနည်းပြအဖြစ် ခ့န်အပ်ရန် တိုက်တွန်းသွားပါတယ်။
