၂၀၂၂ ခုနှစ်နောက်ပိုင်း ပထမဆုံးအကြိမ် အင်္ဂလန်အသင်းတွင် ရွေးချယ်ခံလာရတဲ့ ဘင်ဝှိုက်
=====================
အာဆင်နယ်နောက်ခံလူဘင်ဝှိုက်ဟာ သုံးနှစ်ကျော်ကာလအတွင်း ပထမဆုံးအကြိမ်အဖြစ် အင်္ဂလန်အသင်းတွင် ရွေးချယ်ခြင်းခံလာရပါတယ်။
အသက် ၂၇ နှစ်ရှိနောက်ခံလူဟာ ၂၀၂၂ ခုနှစ်ကာတာကမ္ဘာ့ဖလားပြိုင်ပွဲအတွင်းတွင် ကိုယ်ရေးကိုယ်တာပြဿနာကြောင့် အင်္ဂလန်အသင်းလေ့ကျင့်ရေးစခန်းမှ ထွက်ခွာသွားပြီးနောက် အင်္ဂလန်အသင်းနှင့် ရွေးချယ်ခြင်းမခံလာခဲ့ရပါဘူး။
ယင်းနောက်ပိုင်းတွင် ဘင်ဝှိုက်ဟာ ဂါရတ်ဆောက်ဂိတ်လက်ထက် နောက်ပိုင်းကာလများအတွက် အင်္ဂလန်အသင်းတွင် ကစားရန် ငြင်းဆိုလာခဲ့ပါတယ်။
အင်္ဂလန်အသင်းဟာ ဝင်ဘာလေကွင်းတွင် လာမယ့် မတ်လ ၂၇ ရက်နေ့တွင် ဥရုဂွေးနှင့်လည်းကောင်း၊ မတ်လ ၃၁ ရက်နေ့တွင် ဂျပန်နှင့်လည်းကောင်း ခြေစမ်းပွဲ ကစားပါမယ်။
ဘင်ဝှိုက်ဟာ ၂၀၂၂ ခုနှစ် မတ်လတုန်းက အိုင်ဗရီကို့စ်အား ၃-၀ ဂိုးဖြင့် အနိုင်ရတဲ့ နိုင်ငံတကာခြေစမ်းပွဲတွင် အင်္ဂလန်အတွက် နောက်ဆုံးအကြိမ် ကစားခဲ့တာပါ။
ယခုအခါ ဆောက်ဂိတ်ဟာ ပေါင်ကြွက်သားဒဏ်ရာကြောင့် အင်္ဂလန်အသင်းမှ နုတ်ထွက်သွားတဲ့ လေဗာကူဆင်ညာနောက်ခံလူဂျာရတ်ကွန်ရှာနေရာတွင် အစားထိုးရန်အတွက် ဘင်ဝှိုက်ကို ရွေးချယ်လာပြီ ဖြစ်ပါတယ်။
ဘင်ဝှိုက်ဟာ ယခုရာသီတွင် အာဆင်နယ်အတွက် ပရီးမီးယားလိဂ်ပွဲ ၇ ပွဲတည်းသာ ကစားခွင့်ရထားသူပါ။
ဒါပေမယ့် သူဟာ ချန်ပီယံလိဂ်ကွာတားဖိုင်နယ်သို့အထိ တက်ရောက်ထားတဲ့ အာဆင်နယ်ရဲ့ ချန်ပီယံလိဂ်ပွဲ ၁၀ ပွဲတွင် ၈ ပွဲကစားခွင့်ရထားပါတယ်။
သူဟာ တနင်္ဂနွေနေ့ညတုန်းက ဝင်ဘာလေကွင်းတွင် မန်စီးတီးကို ၂-၀ ဂိုးဖြင့် ရှုံးနိမ့်တဲ့ ခါရာဘောင်ဖလားဗိုလ်လုပွဲတွင်လည်း ပွဲထွက်ကစားခဲ့ပါတယ်။
ဒါ့အပြင် အင်္ဂလန်နည်းပြသောမတ်စ်တူချယ်ဟာ ဒဏ်ရာကြောင့် အင်္ဂလန်အသင်းမှ နုတ်ထွက်သွားတဲ့ အီဘီရီချီအီးဇီးနေရာတွင် နယူးကာဆယ်တောင်ပံကစားသမားဟာဗေးဘန်းစ်အား ရွေးချယ်လာပါတယ်။
ဘန်းစ်ဟာ ၂၀၂၀ ခုနှစ် အောက်တိုဘာလတုန်းက အင်္ဂလန်အသင်းအတွက် တစ်ပွဲကစားခွင့်ရထားခဲ့သူဖြစ်ပါတယ်။
သူဟာ စကော့တလန်အသင်းတွင် ကစားရန် ချဉ်းကပ်ခြင်းခံခဲ့ရပေမယ့်လည်း အင်္ဂလန်အသင်းတွင် အခွင့်အရေးရလာမယ်ဆိုတဲ့ ယုံကြည်ချက်ဖြင့် စောင့်ဆိုင်းလာခဲ့သူလည်း ဖြစ်ပါတယ်။
သူဟာ ယခုရာသီတွင် နယူးကာဆယ်အတွက် ပြိုင်ပွဲအရပ်ရပ်တွင် ၁၄ ဂိုးအထိ သွင်းယူထားပါတယ်။
