VAR နှင့်အသုံးပြုရေးနှင့်ပတ်သက်ပြီး အလုပ်ရုံဆွေးနွေးမှု ပြုလုပ်လာမယ့် ဥရောပလိဂ်များ
==================
ဥရောပထိပ်သီးလိဂ်များဟာ နွေရာသီတွင် VAR နည်းပညာအား ဘယ်လို အသုံးပြုမယ်ဆိုတာနှင့်ပတ်သက်ပြီး ယူအီးအက်ဖ်အေနှင့် အလုပ်ရုံဆွေးနွေးမှု ပြုလုပ်လာပါမယ်။

ပရီးမီးယားလိဂ်၊ လာလီဂါ၊ စီးရီးအေ၊ ဘွန်ဒက်စ်လီဂါနှင့် လီဂူး ၁ တို့မှ ဒိုင်လူကြီးအကြီးအကဲများဟာ VAR အကူအညီကို ဘောလုံးပွဲရဲ့ မည်သည့်အချိန်အခါမျိုးတွင် အသုံးပြုမယ်ဆိုတာနှင့်ပတ်သက်ပြီး အသေးစိတ် ဆွေးနွေးမှုများ ပြုလုပ်လာပါတယ်။

ယူအီးအက်ဖ်အေရဲ့ ဒိုင်အကြီးအကဲ ရောဘတ်ရိုဆက်တီဟာ ပြီးခဲ့တဲ့တုန်းက VAR မှာ မည်သည့်အခါမျိုးတွင် ဝင်ရောက် ပါဝင်လုပ်ဆောင်သင့်သလဲဆိုတာနှင့်ပတ်သက်ပြီး အသေးစိတ်ဆွေးနွေးမှုများ ပြုလုပ်ရေး တိုက်တွန်းမှုများ ပြုလုပ်ပြီးနောက် ယခုကဲ့သို့ အလုပ်ရုံဆွေးနွေးပွဲ ကျင်းပရန် ဆုံးဖြတ်လာတာပါ။

ဥရောပတလွှားလိဂ်များတွင် VAR အား ကွဲပြားတဲ့စနစ်များဖြင့် အသုံးပြုနေကြပါတယ်။

ပရီးမီးယားလိဂ်မှာ ယခုရာသီတွင် တစ်ပွဲလျှင် VAR ပါဝင်ပတ်သက်မှုနှုန်း ၀.၂၇၅ နှုန်းဖြင့် အနည်းဆုံး ပါဝင်ပတ်သက်နေပါတယ်။ ယင်းသို့ VAR ပါဝင်ပတ်သက်မှု နည်းပါးမှုက အငြင်းပွားဖွယ် ဖြစ်ရပ်များ ပိုမို ဖြစ်ပေါ်လာစေနေပါတယ်။

ပြီးခဲ့တဲ့လတုန်းက ထွက်ပေါ်ခဲ့တဲ့ မှတ်တမ်းအရ ဘွန်ဒက်စ်လီဂါနှင့် လာလီဂါတို့မှာ တစ်ပွဲပျမ်းမျှ VAR ပါဝင်နှုန်း ၀.၃၈ နှုန်းရှိတာ တွေ့ရပြီး စီးရီးအေက ၀.၄၄ နှင့် လီဂူး ၁ က ၀.၄၇ နှုန်းရှိတာ တွေ့ရပါတယ်။

ချန်ပီယံလိဂ်တွင် VAR ပါဝင်ပတ်သက်မှုနှုန်း တစ်ပွဲလျှင် ၀.၄၅ နှုန်း ရှိပါတယ်။

ယခုကဲ့သို့ VAR အား အသုံးပြုရေးနှင့်ပတ်သက်ပြီး အလုပ်ရုံ ဆွေးနွေးမှု ပြုလုပ်လာမှုနှင့်အတူ VAR စည်းမျဉ်းနှင့်ပတ်သက်ပြီး ကျယ်ပြန့်မှု ရှိလာစေမယ်လို့လည်း ယုံကြည်နေကြပါတယ်။