အင်္ဂလန်အသင်းလူစာရင်းတွင် ဟယ်ရီမက်ဂွိုင်းယားတို့ ပြန်လည်ပါဝင်လာ
===================
အင်္ဂလန်နည်းပြသောမတ်စ်တူချယ်ဟာ မတ်လအတွင်း ကစားမယ့် နိုင်ငံတကာခြေစမ်းပွဲစဉ်များအတွက် အင်္ဂလန်အသင်းလူစာရင်းကို ကြေညာလာပါတယ်။

သောမတ်စ်တူချယ်ဟာ နောက်ဆုံးထုတ်ပြန်ခဲ့တဲ့ အင်္ဂလန်အသင်းလူစာရင်းတွင် ပါဝင်ခဲ့ခြင်း မရှိတဲ့ ကစားသမား ၁၃ ဦးအထိ လာမယ့်မတ်လနှောင်းပိုင်း လူစာရင်းတွင် ရွေးချယ်လာခဲ့တာ တွေ့ရပါတယ်။

အင်္ဂလန်အသင်းလူစာရင်းတွင် ပါဝင်လာတဲ့ တူချယ်လက်ထက်တွင် ရွေးချယ်ခြင်းမခံရဖူးတဲ့ (သို့မဟုတ်) အင်္ဂလန်အသင်းတွင် ပထဆုံးအကြိမ် ရွေးချယ်ခံရတဲ့ (သို့မဟုတ်) နောက်ဆုံးလူစာရင်းတွင် မပါဝင်ခဲ့တဲ့ ကစားသမား ၁၃ ဦးကတော့ အေရွန်ရမ်ဒေးလ်(နယူးကာဆယ်)၊ ဂျေဆင်စတီး(ဘရိုက်တန်)၊ လီဝစ်ဟေးလ်(နယူးကာဆယ်)၊ တီနိုလီဗရာမန်တို(နယူးကာဆယ်)၊ ဟယ်ရီမက်ဂွိုင်းယား(ယူနိုက်တက်)၊ ဖီကာယိုတိုမိုရီ(မီလန်)၊ ဂျိမ်းစ်ဂါနာ(အဲဗာတန်)၊ ကိုဘီမိုင်နူး(ယူနိုက်တက်)၊ ဒိုမီနစ်ကယ်ဗတ်လီဝစ်(လိဒ်)၊ အန်တိုနီဂေါ်ဒွန်(နယူးကာဆယ်)၊ နိုနီမာဒူကီ(အာဆင်နယ်)၊ ကိုးလ်ပါလ်မာ(ချဲလ်ဆီး)၊ ဒိုမီနစ်ဆိုလန်ကီ(စပါးစ်)တို့ ဖြစ်ကြပါတယ်။

ယူနိုက်တက်ရဲ့ ဟယ်ရီမက်ဂွိုင်းယားနှင့် ကိုဘီမိုင်နူးတို့ဟာ ယခုရာသီတွင် ယူနိုက်တက်ယာယီနည်းပြမိုက်ကယ်ကာရစ်လက်အောက်တွင် အရေးပါတဲ့ ကစားသမားအဖြစ် ခြေစွမ်းပြကစားနေမှုနှင့်အတူ တူချယ်ရဲ့ အင်္ဂလန်အသင်းတွင် ပြန်လည်ရွေးချယ်ခြင်းခံလာရတာလည်း ဖြစ်ပါတယ်။

ယူနိုက်တက်နောက်ခံလူမက်ဂွိုင်းယားမှာ ယခင်နည်းပြဆောက်ဂိတ်လက်ထက်တုန်းက အရေးပါတဲ့ ကစားသမားဖြစ်ခဲ့ပေမယ့်လည်း ၂၀၂၅ ခုနှစ် ဇန်နဝါရီလ ၁ ရက်နေ့မှ စတင်ကာ အင်္ဂလန်အသင်းတွင် ရွေးချယ်ခြင်းမခံခဲ့ရသူပါ။

အင်္ဂလန်အတွက် ၆၄ ပွဲကစားကာ ၇ ဂိုးသွင်ထားတဲ့ မက်ဂွိုင်းယားဟာ ယခုရာသီတွင် ယူနိုက်တက်အား ချန်ပီယံလိဂ်ဝင်ခွင့် ရရှိရေး အရေးပါတဲ့ အခန်းကဏ္ဍမှ ပါဝင်ကစားနေမှုနှင့်အတူ ပြန်လည် ရွေးချယ်ခံလာရတာပါ။

ဒါ့အပြင် ကိုဘီမိုင်နူးမှာလည်း ယူရို ၂၀၂၄ ပြိုင်ပွဲတုန်းက အရေးပါတဲ့ ကစားသမားအဖြစ် ခြေစွမ်းပြခဲ့ပေမယ့်လည်း ယူနိုက်တက်တွင် ရူဘင်အမိုရမ်လက်အောက်မှာ ပုံမှန်ကစားခွင့် ရရှိရေး ရုန်းကန်ရပြီးနောက် အင်္ဂလန်အသင်းနှင့် ဝေးကွာလာခဲ့ပါတယ်။

ဒါပေမယ့် သူဟာ ယာယီနည်းပြမိုက်ကယ်ကာရစ်လက်ထက်မှာတော့ အရေးပါတဲ့ ကစားသမားအဖြစ် ခြေစွမ်းပြကစားပြီးနောက် အင်္ဂလန်အသင်းတွင် ပါဝင်လာပါတယ်။

ဒါ့အပြင် အဲဗာတန်ကွင်းလယ်ကစားသမားဂျိမ်းစ်ဂါနာမှာလည်း ယခုရာသီတွင် အဲဗာတန်အတွက် ပွဲတိုင်း ပွဲထွက်ကစားခွင့်ရထားပြီး ၂ ဂိုးသွင်းကာ ၅ ကြိမ် ဖန်တီးမှု ပြုလုပ်နိုင်ပြီးနောက် အင်္ဂလန်အသင်းတွင် ပထမဆုံးအကြိမ်အဖြစ် ရွေးချယ်ခြင်းခံလာရပါတယ်။

တူချယ်ဟာ ယခုလူစာရင်းတွင် ရီးရဲလ်မက်ဒရစ်ညာနောက်ခံလူထရန်းအလက်ဇန္ဒားအာနိုးကိုလည်း ချန်လှပ်မှု ပြုလုပ်ခဲ့တာ တွေ့ရပါတယ်။

အင်္ဂလန်အသင်းဟာ လာမယ့် မတ်လ ၂၇ ရက်နေ့တွင် ဥရုဂွေးနှင့်လည်းကောင်း၊ မတ်လ ၃၁ ရက်နေ့တွင် ဂျပန်နှင့်လည်းကောင်း ခြေစမ်းပွဲ ကစားသွားပါမယ်။

အင်္ဂလန်ဟာ ကမ္ဘာ့ဖလားမတိုင်မီ ဇွန်လတွင် နယူးဇီလန်၊ ကော့စတာရီကာတို့နှင့်လည်း ခြေစမ်းသွားပါဦးမယ်။

အင်္ဂလန်အသင်းဟာ ကမ္ဘာ့ဖလားအုပ်စုတွင်းတွင် ခရိုအေးရှား၊ ဂါနာ၊ ပနားမားတို့နှင့် တစ်အုပ်စုတည်း ကျရောက်နေပါတယ်။

အင်္ဂလန်အသင်းလူစာရင်း
--------------------------------
ဂိုးသမား - ဒိန်းဟင်ဒါဆင်(ပဲလေ့စ်)၊ ဂျော်ဒန်ပစ်ဖို့ဒ်(အဲဗာတန်)၊ ဂျိမ်းစ်ထရက်ဖို့ဒ်(မန်စီးတီး)၊ အေရွန်ရမ်ဒေးလ်(နယူးကာဆယ်)၊ ဂျေဆင်စတီး(ဘရိုက်တန်)။

နောက်တန်း - ဒန်ဘန်း(နယူးကာဆယ်)၊ မာ့ခ်ဂူဟီ(မန်စီးတီး)၊ လီဝစ်ဟေးလ်(နယူးကာဆယ်)၊ အီဇရီကွန်ဆာ(ဗီလာ)၊ တီနိုလီဗရာမန်တို(နယူးကာဆယ်)၊ ဟယ်ရီမက်ဂွိုင်းယား(ယူနိုက်တက်)၊ နီကိုအိုရေလီ(မန်စီးတီး)၊ ဂျာရဲလ်ကွန်ရှာ(လေဗာကူဆင်)၊ ဒီဂျက်စပင့်(စပါးစ်)၊ ဂျွန်စတုန်း(မန်စီးတီး)၊ ဖီကာယိုတိုမိုရီ(မီလန်)။

အလယ်တန်း - အီးလီးယော့အင်ဒါဆင်(နော်တင်ဟမ်ဖောရက်စ်)၊ ဂျူ့ဘယ်လင်ဂမ်(ရီးရဲလ်မက်ဒရစ်)၊ ဂျိမ်းစ်ဂါနာ(အဲဗာတန်)၊ ဂျော်ဒန်ဟင်ဒါဆင်(ဘရန့်ဖို့ဒ်)၊ ကိုဘီမိုင်နူး(ယူနိုက်တက်)၊ ဒီကလန်ရိုက်စ်(အာဆင်နယ်)၊ မော်ဂန်ရိုဂျာ(ဗီလာ)၊ အဒမ်ဝါတွန်(ပဲလေ့စ်)။

ရှေ့တန်း - ဂျာရော့ဒ်ဘိုဝင်း(ဝက်စ်ဟမ်း)၊ ဒိုမီနစ်ကယ်ဗတ်လီဝင်း(လိဒ်)၊ အီဘီရီချီအီးဇီး(အာဆင်နယ်)၊ ဖီးလ်ဖိုဒန်(မန်စီးတီး)၊ အန်တိုနီဂေါ်ဒွန်(နယူးကာဆယ်)၊ ဟယ်ရီကိန်း(ဘိုင်ယန်မြူးနစ်)၊ နိုနီမာဒူကီ(အာဆင်နယ်)၊ ကိုးလ်ပါလ်မာ(ချဲလ်ဆီး)၊ မားကပ်စ်ရက်ဖို့ဒ်(ဘာစီလိုနာ)၊ ဘူကာယိုဆာကာ(အာဆင်နယ်)၊ ဒိုမီနစ်ဆိုလန်ကီ(စပါးစ်)။