စက်သုံးဆီ ဝယ်ယူရရှိမှုခက်လာလို့ ပြည်တွင်းခရီးသွားလုပ်ငန်းတွေ ခရီးစဥ်ပြေးဆွဲဖို့ ခက်ခဲလာသလို လက်မှတ်စျေးလည်းတက်
စက်သုံးဆီ ရရှိမှုအခက်အခဲနဲ့ စျေးနူန်းမြင့်တက်လာတဲ့အခြေအနေတွေကြောင့် ပြည်တွင်းအပန်းဖြေခရီးစဥ် package လက်မှတ်စျေးနူန်းတွေမြင့်တက်လာပြီး ခရီးစဥ်ပြေးဆွဲဖို့ပင် ခက်ခဲတဲ့ အခြေအတွေ ဖြစ်ပေါ်နေတယ်လို့ ပြည်တွင်းခရီးသွား လုပ်ငန်းတွေဆီက သိရပါတယ်။
စက်သုံးဆီ ဝယ်ယူရာမှာ အကန့်အသတ်နဲ့သာ ရရှိနေတဲ့အတွက် ဒီမတ်လအတွင်း ပြေးဆွဲမယ့် ပြည်တွင်းအပန်းအဖြေ ခရီးစဥ်တွေကို ပြေးဆွဲနိုင်ခြင်းရှိမရှိ အတိကျ မပြောနိုင်တဲ့ အခြေအနေ ဖြစ်တယ်လို့ သိရပါတယ်။
" စက်သုံးဆီစျေးဒီလောက်တက်လာမှတော့ ကျွန်တော်တို့လည်း မတတ်နိုင်ဘဲ တက်ရတာပါ ။ နောက်ပြီး ဆီကလည်း ခက်ခဲနေတယ် ။ ဆီရမှသာ ခရီးစဥ်က သွားလို့ရမှာလေ ။ ခရီးစဥ်က ဒီလတွေက သွားသူများကြတယ်။ ဆီက အကန့်အသတ်နဲ့ပဲရတော့ ကိုယ်သွားမယ့် ခရီးစဥ် ၊လမ်းကြောင်း အခြေအနေနဲ့တွက်ပြီး လုပ်နေရတယ်။ ဆီမလောက်ရင် စီစဥ်ထားတဲ့ ခရီးစဥ်တွေက ယာယီရပ်တာတို့ ရက်ရွှေ့တာတို့ လုပ်ရမယ့်အခြေအနေပါ ။ ခရီးစဥ်တွေကတော့ ရောင်းထားပြီးပြီ။ သတ်မှတ်ရက် ထွက်ဖြစ်မလား မထွက်နိုင်ဘူးလားဆိုတာကို ရက်ကြိုပြီး အကြောင်းကြားပေးသွားမှာပါ ။ ဆီလွယ်လွယ်ကူကူဝယ်လို့ရဖို့ လိုအပ်နေပါတယ်။ " လို့ ပြည်တွင်း ခရီးသွားလုပ်ငန်းတခုရဲ့ တာဝန်ရှိသူတယောက်က ပြောပါတယ်။
လက်ရှိမှာ ခရီးစဥ်ပက်ကေ့ချ်စျေးနူန်းတွေအနေနဲ့ ခရီးစဥ်တခုကို ၁၀၀၀၀ ကျပ်မှ ၃၀၀၀၀ ကျပ်လောက်အထိ စျေးတက်လာပြီး စက်သုံးဆီ ဝယ်ယူရာမှာလည်း လိုအပ်သလောက် ဝယ်ယူလို့မရဘဲ အကန့်အသတ်နဲ့သာ ရောင်းချပေးတာကြောင့် ခရီးစဥ်ပြေးဆွဲနိုင်ဖို့ အခက်အခဲ ကြုံနေကြရတာ ဖြစ်တယ်လို့ သိရပါတယ် ။
စက်သုံးဆီစျေး အတက်အကျပေါ်မူတည်ပြီး ခရီးစဥ်ပက်ကေ့ချ်စျေးနူန်းက အပြောင်းအလဲ ဖြစ်နိုင်ကြောင်းကို ခရီးသွားလုပ်ငန်းတွေက အသိပေးထားပြီး လက်မှတ်ဝယ်ဖို့အတွက် စရံငွေပေးသွင်းထားသူတွေကိုတော့ စျေးနူန်းမြင့်တက်တောင်းခံမှာမဟုတ်ဘဲ အရင်စျေးနူန်းတွေအတိုင်းသာ ရောင်းချမှာဖြစ်တယ်လို့ သိရပါတယ်။
" ဆီစျေးကဒီနေ့ဆို တော်တော်လေး တက်လာတယ်။ ဆီစျေးကျရင် ပက်ကေ့ချ်လက်မှတ်စျေးတွေလည်း ပြန်ချပေးမှာပါ ခင်ဗျ။ အခု စျေးတက်တာကလည်း စရံမပေးရသေးသူတွေကတော့ အတက်စျေးဝယ်ရမှာပါ ။ ကျွန်တော်တို့လည်း အဆင်မပြေလို့ တက်ရတာပါ။ " လို့ Travel & Tour လုပ်ငန်းမှ တာဝန်ရှိသူတယောက်က ပြောပါတယ်။
စက်သုံးဆီကို အဆင်ပြေပြေနဲ့ လိုအပ်သလောက် ဝယ်ယူလို့ မရရှိပါက ပြည်တွင်းခရီးသွားလုပ်ငန်းတွေ ပြေးဆွဲနိုင်တဲ့ ခရီးစဥ်ဒေသတွေ လျော့သွားနိုင်မယ့် အခြေအနေ ရှိနေတယ်လို့ သိရပါတယ်။
လက်ရှိကာလက နွေရာသီကျောင်းပိတ်ရက်ဖြစ်တာနဲ့အညီ ပြည်တွင်းဘုရားဖူးခရီးစဥ် ၊ အပန်းဖြေခရီးစဥ် သွားလာသူတွေများကြောင်း လာမယ့် ဧပြီလမှာဆိုရင်လည်း သင်္ကြန်ကာလအတွက် ကြိုတင်လက်မှတ် ဝယ်ယူထားသူတွေ အများအပြားရှိနေတယ်လို့ သိရပါတယ်။
" လေးလပိုင်းအတွက် ပက်ကေ့ချ်ဝယ်ထားတယ်။ ပုဂံခရီးစဥ်ပါ ။ ခရီးသွားလုပ်ငန်းဘက်က ပြောတာတော့ ခရီးစဥ် မတိုင်ခင် လေးရက်၊ငါးရက်ကြို အကြောင်းပြန်ပေးမယ်ပြောတယ်။ ဆီဝယ်ရခက်နေလို့ပြောတယ်။ " လို့ ခရီးထွက်ဖို့ ပြင်ဆင်ထားတဲ့ ရန်ကုန် နေထိုင်သူ တယောက်က ပြောပါတယ်။
အရှေ့အလယ်ပိုင်းဒေသမှာ ဖြစ်ပွားနေတဲ့ စစ်ပွဲကြောင့် စက်သုံးဆီလိုအပ်ချက်ရှိလာပြီး ပြည်တွင်းမှာ စက်သုံးဆီ စျေးနူန်းက ဆက်တိုက်မြင့် တက်လာတာဖြစ် လို ဆီဝယ်ယူရရှိမှုကလည်း အကန့်အသတ်နဲ့သာ ရရှိတဲ့အတွက် ပြည်တွင်းခရီးသွားလုပ်ငန်းတွေ အခက်အခဲ ကြုံနေရတာ ဖြစ်တယ်လို့ သိရပါတယ် ။
ပြည်တွင်းအပန်းဖြေခရီးစဥ်စျေးနူန်းတွေ မြင့်တက်လာသလို ခရီးသည်တင်အဝေးပြေးယာဥ်လိုင်း စျေးနူန်းတွေလည်း ထက်ဝက်လောက်နီးပါး မြင့်တက်လာတယ်လို့ သိရပါတယ်။
