အိန္ဒိယနိုင်ငံအနေဖြင့် မြန်မာနိုင်ငံဘက်စုံဖွံ့ဖြိုးတိုးတက်လာစေရန် ဆက်လက်ရပ်တည်သွားမည်
အိန္ဒိယနိုင်ငံအနေဖြင့် မြန်မာနိုင်ငံဘက်စုံဖွံ့ဖြိုးတိုးတက်လာစေရန် ဆက်လက်ရပ်တည်သွားမည်ဟု မြန်မာနိုင်ငံဆိုင်ရာ အိန္ဒိယနိုင်ငံသံအမတ်ကြီး H.E. Mr. Abhay Thakur မှ မတ် ၁၃ ရက်ကကျင်းပသည့် မြန်မာ့မျက်နှာစာသစ်ဖိုရမ်(ယုံကြည်မှု၊ တည်ငြိမ်အေးချမ်းမှုနှင့် ဖွံ့ဖြိုးတိုးတက်မှု)တွင် ပြောကြားခဲ့ခြင်းဖြစ်သည်။
မြန်မာနိုင်ငံတွင် အစိုးရအသစ်ဖွဲ့စည်းပြီး လွှတ်တော်အ သစ်၊ ခေါင်းဆောင်အသစ်များပေါ်ထွန်းမည့်ကာလဖြစ်သည့်အပြင် သမိုင်းဝင်အကူးအပြောင်းကာလလည်း ဖြစ်၍ အိမ်နီးချင်းနိုင်ငံဖြစ်သော အိန္ဒိယနိုင်ငံအနေဖြင့် ယခုကျင်းပသည့် ဆွေးနွေးပွဲမှတစ်ဆင့် အနှစ်သာရပြည့်ဝသော ငြိမ်းချမ်းရေး၊ စီးပွားရေး၊ ဖွံ့ဖြိုးတိုးတက် မှုများ ဆောင်ကြဉ်းပေးနိုင်မည်ကိုယုံကြည်သည်ဟု ပြောသည်။
မြန်မာနိုင်ငံသည် အိန္ဒိယ၊ တရုတ်၊ အာဆီယံအစရှိသည့် ဒေသတွင်းနိုင်ငံများနှင့် ပေါင်းစည်းဆက်နွှယ် ချိတ်ဆက်မှုဆိုင်ရာကဏ္ဍများဆောင်ရွက်နိုင်ရန် မဟာဗျူဟာကျသည့်နေရာတွင်တည်ရှိနေကာ အထူးသဖြင့် ပူး ပေါင်းဆောင်ရွက်မှုများ ပိုမိုခိုင်မာအားကောင်းလာပါက မြန်မာနိုင်ငံ ဖွံ့ဖြိုးတိုးတက်လာမည်ဟု ပြောသည်။
အထူးသဖြင့် ကုန်သွယ်ရေး၊ ပညာရေး၊ လျှပ်စစ်ကဏ္ဍ၊ ခရီးသွားလုပ်ငန်းစသည့် ကဏ္ဍများဖွံ့ဖြိုးတိုးတက်လာမည်ဖြစ်ကာ ယင်းသို့ ဖွံ့ဖြိုးတိုးတက်မှုများသည် အိန္ဒိယနိုင်ငံမှ မြင်တွေ့လိုသည့်ဆန္ဒဖြစ်၍ မြန်မာနိုင်ငံဘက် စုံဖွံ့ဖြိုးတိုးတက်လာစေရန် အိန္ဒိယနိုင်ငံအနေဖြင့် ဆက်လက်ရပ်တည်သွားမည်ဟု အိန္ဒိယနိုင်ငံသံအမတ်ကြီး H.E. Mr. Abhay Thakur ကပြောကြားခဲ့သည်။
