အမေရိကန်၊ အစ္စရေးတို့နှင့် ဖြစ်ပွားနေတဲ့ စစ်ရေးပဋိပက္ခကြောင့် ကမ္ဘာ့ဖလားပြိုင်ပွဲတွင် အီရန် ပါဝင်တော့မှာ မဟုတ်ကြောင်း အားကစားဝန်ကြီးအတည်ပြုလာ
=====================
အီရန်အားကစားဝန်ကြီးက ကမ္ဘာ့ဖလားအိမ်ရှင် အမေရိကန်နှင့် ဖြစ်ပျက်နေတဲ့ စစ်ရေး ပဋိပက္ခကြောင့် အီရန်လက်ရွေးစင်အသင်းမှာ ကမ္ဘာ့ဖလားပြိုင်ပွဲတွင် ပါဝင်ယှဉ်ပြိုင်တော့မှာ မဟုတ်ကြောင်း အတည်ပြုလာပါတယ်။
အီရန်အသင်းဟာ ၂၀၂၆ ကမ္ဘာ့ဖလားခြေစစ်ပွဲအောင်မြင်ထားပေမယ့်လည်း အမေရိကန်-အစ္စရေးတို့ရဲ့ ပူးပေါင်း စစ်ဆင်နွဲမှု ခံနေရပါတယ်။
အစ္စရေး-အစ္စရေးတို့ ပူးပေါင်းစစ်ဆင်နွဲမှုကြောင့် အီရန်အဓိပတိခါမေနီ သေဆုံးခဲ့ပြီးနောက် အီရန်ကလည်း အမေရိကန်ရဲ့ အရှေ့အလယ်ပိုင်း မဟာမိတ်နိုင်ငံများကို ပြန်လည်တုံ့ပြန် တိုက်ခိုက်မှုများ ပြုလုပ်နေပါတယ်။
အမေရိကန်သမ္မတဒေါ်နယ်ထရမ့်က ၂၀၂၆ ကမ္ဘာ့ဖလားပြိုင်ပွဲတွင် အီရန်အသင်း ပါဝင်ကစားလာမှုအပေါ် "ကျုပ်ကတော့ လုံးဝဂရုမစိုက်ဘူး"လို့ တုံ့ပြန်ထားပါတယ်။
ဒါ့အပြင် ဖီဖာဥက္ကဌအင်ဖန်တီနိုကလည်း အမေရိကန်ဘက်က အီရန်အသင်း ကမ္ဘာ့ဖလားတွင် ပါဝင်ကစားလာမှုအပေါ် ကြိုဆိုကြောင်း ဆိုထားပါတယ်။
ဒါပေမယ့် အီရန်ဘောလုံးအဖွဲ့ချုပ်ဥက္ကဌကမူ လတ်တလော ဖြစ်ပျက်နေတဲ့ ပဋိပက္ခကြောင့် အီရန်အသင်းမှာ ကမ္ဘာ့ဖလားပြိုင်ပွဲ ယှဉ်ပြိုင်ရန် မဖြစ်နိုင်ကြောင်း ဆိုထားပါတယ်။
ယခုအခါ အီရန်အားကစားဝန်ကြီးအာမက်ဒွန်ယာမယ်က "ဒီအကျင့်ပျက်ခြစားနေတဲ့ အစိုးရက ကျုပ်တို့ရဲ့ ခေါင်းဆောင်ကို လုပ်ကြံသတ်ဖြတ်လိုက်တဲ့အတွက် ကမ္ဘာ့ဖလားမှာ ပါဝင်ယှဉ်ပြိုင်ဖို့ အခြေအနေ မရှိတော့ပါဘူး။ အီရန်အပေါ် ရက်စက်ကြမ်းကြုတ်တဲ့ လုပ်ဆောင်ချက်တွေကြောင့် ဒီ ရှစ်လ ကိုးလအတွင်းမှာ စစ်ပွဲ ၂ ကြိမ်ဖြစ်ခဲ့ပြီး ကျုပ်တို့ရဲ့ ပြည်သူထောင်ပေါင်းများစွာ အသက်သေဆုံးခဲ့ရပြီးပါပြီ။ ဒါကြောင့် ပါဝင်ဖို့ လုံးဝ မဖြစ်နိုင်ပါဘူး"လို့ ပြောကြားသွားပါတယ်။
၂၀၂၆ ကမ္ဘာ့ဖလားပြိုင်ပွဲကို အမေရိကန်၊ မက္ကဆီကို၊ ကနေဒါတို့က ဇွန်လ ၁၁ ရက်နေ့မှ ဇူလိုင်လ ၁၉ ရက်နေ့အထိ ပူးတွဲ အိမ်ရှင်အဖြစ် လက်ခံ ကျင်းပသွားပါမယ်။
အီရန်ဟာ ကမ္ဘာ့ဖလားအုပ်စုတွင်းတွင် နယူးဇီလန်၊ ဘယ်လ်ဂျီယံ၊ အီဂျစ်တို့နှင့် ရင်ဆိုင်ကစားရပါမယ်။
အီရန်အသင်းဟာ အာရှခြေစစ်ပွဲ အုပ်စု(က)တွင် အုပ်စုဗိုလ်အဖြစ် ရပ်တည်ကာ ၄ ကြိမ်ဆက် ကမ္ဘာ့ဖလားခြေစစ်ပွဲ အောင်မြင်လာတာ ဖြစ်ပါတယ်။
အီရန်အသင်းဟာ ကမ္ဘာ့ဖလားပြိုင်ပွဲတွင် အရီဇိုးနားပြည်နယ်၊ တူဆန်ရှိ Kino Sports Complex တွင် အခြေစိုက်ရန် စီစဉ်ထားပေမယ့်လည်း ယခုအခါ ကမ္ဘာ့ဖလားပြိုင်ပွဲယှဉ်ပြိုင်ရန် မရေမရာ ဖြစ်လာပြီ ဖြစ်ပါတယ်။
