မန်စီးတီးရဲ့ ချန်ပီယံလိဂ်ကွာတားဖိုင်နယ်အခွင့်အရေးအား အမှန်အတိုင်းဖွင့်ဟလာတဲ့ ဘာနာဒိုဆေးလ်ဗား
=====================
မန်စီးတီးအသင်းခေါင်းဆောင်ဘာနာဒိုဆေးလ်ဗားက မန်စီးတီးရဲ့ ချန်ပီယံလိဂ်ကွာတားဖိုင်နယ်သို့ တက်ရောက်နိုင်ခြေမှာ အမှန်တကယ်အမှောင်အတိ ဖြစ်နေကြောင်း ဝန်ခံ ပြောကြားလာပါတယ်။
မန်စီးတီးဟာ ဗုဒ္ဓဟူးနေ့ညတုန်းက ဘာနေဗျူးတွင် ကစားတဲ့ ချန်ပီယံလိဂ် ၁၆ သင်း ရှုံးထွက်အဆင့် ပထမအကျော့တွင် ဗယ်ဗာဒီရဲ့ ဟက်ထရစ်ဂိုးဖြင့် ရီးရဲလ်မက်ဒရစ်အား ၃-၀ ဂိုးဖြင့် အရေးနိမ့်ခဲ့ပါတယ်။
မန်စီးတီးဟာ လာမယ့်အပတ် အင်္ဂါနေ့တွင် အီတီဟတ်ကွင်းတွင် ရီးရဲလ်မက်ဒရစ်အား ၄ ဂိုးပြတ် အနိုင်ယူပြီး ချန်ပီယံလိဂ်ကွာတားဖိုင်နယ်သို့ တက်ရေး ကြိုးပမ်းလာရတော့မှာလည်း ဖြစ်ပါတယ်။
ယင်းပွဲစဉ်တွင် မန်စီးတီးဟာ ဗီနီရှပ်စ်ဂျူနီယာရဲ့ ဒုတိယပိုင်း ပင်နယ်တီကို ဒွန်နာရမ်မာ ကာကွယ်နိုင်ခဲ့လို့ ၄ ဂိုးပြတ် မရှုံးနိမ့်ခဲ့တာလည်း ဖြစ်ပါတယ်။
မန်စီးတီးနည်းပြပက်ဂွါဒီယိုလာက ချန်ပီယံလိဂ်ကွာတားဖိုင်နယ်သို့ တက်ရေး အစွမ်းကုန် ကြိုးပမ်းသွားမယ်လို့ ကြွေးကြော်ထားပေမယ့်လည်း အသင်းခေါင်းဆောင်ဘာနာဒိုဆေးလ်ဗားကမူ "၃-၀ ဆိုတော့ နည်းနည်း ပိုခက်သွားပါပြီ။ အခု အရမ်းဆိုးရွားနေတယ်လို့ ခံစားရတယ်။ အခု တကယ့်ကို အမှောင်အတိ ပြီးနေပါတယ်။ ဒါပေမယ့် မနက်ဖြန်က နောက်တစ်နေ့ပါ။ လာမယ့်အပတ်ပွဲမှာ အခွင့်အရေး ရှိနေတယ်ဆိုတဲ့ စိတ်နဲ့ ကစားပါမယ်"လို့ ပြောကြားသွားပါတယ်။
ဘာနေဗျူးတွင် ရီးရဲလ်မက်ဒရစ်ကို မန်စီးတီးတို့ ၃-၀ ဂိုးဖြင့် အရေးနိမ့်ပြီးနောက် ယခုအပတ် ချန်ပီယံလိဂ် ၁၆ သင်း ရှုံးထွက်အဆင့် ပထမအကျော့တွင် အင်္ဂလိပ်ကလပ်တစ်သင်းမျှ နိုင်ပွဲ မရခဲ့ကြပါဘူး။
တဖက်တွင် မန်စီးတီးနည်းပြပက်ဂွါဒီယိုလာဟာ တောင်ပံကစားသမားများဖြစ်ကြတဲ့ ဂျီရီမီဒိုကူ၊ ဆာဗင်ဟို၊ အန်တိုနီဆီမန်ယိုတို့အား ပွဲထွက်လူစာရင်းတွင် စုပြုံအသုံးပြုမှုနှင့်အတူ အခွင့်အရေး ဖန်တီးနိုင်မှု နည်းပါးမှုအတွက် ဝေဖန်မှုများနှင့် ကြုံနေရပါတယ်။
