ဘောကောက်လူငယ်အား တွန်းခဲ့မှုအတွက် ချဲလ်ဆီးရဲ့နီတိုတောင်းပန်လာ
=====================
ပီဒရိုနီတိုဟာ ချန်ပီယံလိဂ်တွင် ပီအက်စ်ဂျီအား ချဲလ်ဆီးတို့ ၅-၂ ဂိုးဖြင့် ရှုံးနိမ့်တဲ့ပွဲစဉ်တွင် ဘောကောက်လူငယ်လေးအား တွန်းခဲ့မှုအတွက် တောင်းပန်လာပါတယ်။
အသက် ၂၆ နှစ်ရှိနီတိုဟာ ချန်ပီယံလိဂ် ၁၆ သင်း ရှုံးထွက်အဆင့် ပထမအကျော့ပွဲပြီးခါနီး အချိန်ပိုတွင် ဘောကောက်လူငယ်လေးအား လက်နှစ်ဖက်ဖြင့် တွန်းခဲ့တာ ဖြစ်ပြီး ယင်းလူငယ်လေးမှာ ထိုင်ခုံပေါ်သို့ လဲကျသွားခဲ့ပြီးနောက် နှစ်ဖက်အသင်းသားများအကြား ရုန်းရင်းခန်ခတ်ဖြစ်ခဲ့ပါတယ်။
ပွဲအပြီးတွင် နီတိုက "ဒီဘောကောက်လူငယ်လေးကို တောင်းပန်လိုပါတယ်။ သူနဲ့ စကားပြောပြီးပါပြီ။ ကျွန်တော်တို့ ရှုံးနေတယ်၊ ပွဲရှိန်ကလည်း တက်နေတော့ ဘောလုံးအမြန်ရလိုနေခဲ့တယ်။ သူ့ကို နည်းနည်းတွန်းခဲ့မိတယ်။ ကျုပ်က ဒီလိုလူမျိုးမဟုတ်ပါဘူး။ အထွဋ်အထိပ်အခိုက်အတန့် ဖြစ်နေပါတယ်။ ပြီးတော့ တောင်းပန်လိုပါတယ်။ ကျွန်တော့်အင်္ကျီကို သူ့ကို ပေးခဲ့တယ်။ ဒီအတွက် အရမ်းစိတ်မကောင်း ဖြစ်ရတယ်။ သူ့ကို တောင်းပန်ဖို့ လိုအပ်တယ်လို့ ခံစားရတယ်။ ကျွန်တော့် ပြင်သစ်စကား သိပ်မကောင်းပါဘူး။ ဗီတင်ဟာ(ပေါ်တူဂီကစားဖော်) ရောက်လာတယ်။ သူ့ကိုလည်း ဒီလို လူစားမဟုတ်ကြောင်း ပြောခဲ့တယ်။ နောက်ဆုံးမှာတော့ ကောင်လေးလည်း ရယ်လာတယ်။ သူကို အင်္ကျီပေးခဲ့တယ်။ တောင်းပန်ကြောင်း ၃၅ ကြိမ်ပြောခဲ့တယ်။ သူလည်း ဖြစ်ပျက်တာကို နားလည်ပါတယ်။ ဒီအခြေအနေအပေါ် ပျော်နေပါပြီ"လို့ ပြောကြားသွားပါတယ်။
နီတိုဟာ ဘောကောက်လူငယ်လေးအား တွန်းခဲ့မှုအတွက် ယူအီးအက်ဖ်အေရဲ့ အရေးယူခြင်း ခံရ/မခံရ မသိရသေးပါဘူး။
ဒါ့အပြင် ချဲလ်ဆီးနည်းပြလီယမ်ရိုဆင်နီယာကလည်း "ဘောကောက်ကောင်လေးနဲ့ ပြဿနာတက်တာ တွေ့ခဲ့တယ်။ ကလပ်ရဲ့ အတွင်းပိုင်းမှာ မှားသည်ပဲ ဖြစ်ဖြစ် မှန်သည်ပဲ ဖြစ်ဖြစ် ကလပ်ကိုယ်စား တောင်းပန်ပါတယ်။ ပီဒရိုလည်း အင်တာဗျူးမှာ တောင်းပန်ပြီးပြီလို့ ထင်တယ်"လို့ ပြောကြားသွားပါတယ်။
