ချန်ပီယံလိဂ် ၁၆ သင်းရှုံးထွက်အဆင့်တွင် ပရီးမီးယားလိဂ်ကလပ်များ နိုင်ပွဲ ပျောက်ဆုံးပြီးနောက် အသင်းတိုင်းနီးပါး ပြိုင်ပွဲမှ ထွက်ခွာရနိုင်ခြေ ရှိလာ
===================
ရီးရဲလ်မက်ဒရစ်က မန်စီးတီးကို ပြတ်ပြတ်သားသား အနိုင်ယူလိုက်ပြီးနောက် ပရီးမီးယားလိဂ်ရဲ့ ကမ္ဘာ့အကောင်းဆုံးလိဂ်ဆိုတဲ့ ဂုဏ်ပုဒ်က ၂၄ နာရီအတွင်း တစစီပျက်စီးသွားခဲ့ပြီ ဖြစ်ပါတယ်။

မန်စီးတီးမတိုင်မီ စပါးစ်ဟာလည်း မက်ဒရစ်သို့ သွားရောက်ကာ အက်သလက်တီကိုနှင့် ရင်ဆိုင်ကစားခဲ့ရာမှာ ၅-၂ ဂိုးဖြင့် ပြတ်ပြတ်သားသား ရှုံးနိမ့်ခဲ့ပါတယ်။

ရီးရဲလ်မက်ဒရစ်ဟာ အသင်းခေါင်းဆောင်ဗယ်ဗာဒီရဲ့ ပထမပိုင်း ဟက်ထရစ်ဂိုးဖြင့် မန်စီးတီးကို ၃-၀ ဂိုးဖြင့် အနိုင်ရရှိခဲ့ပြီး ချန်ပီယံလိဂ်ကွာတားဖိုင်နယ်သို့ တက်ရောက်ရန် အခြေအနေအကောင်းဆုံး ဖြစ်သွားခဲ့ပြီ ဖြစ်ပါတယ်။

တဖက်တွင် ပရီးမီးယားလိဂ်ကလပ်အသင်းတိုင်း နီးပါးတို့ဟာ ချန်ပီယံလိဂ်ကွာတားဖိုင်နယ်သို့ တက်ရောက်ရေး အစွမ်းကုန်တိုက်ပွဲဝင်လာရတော့မှာလည်း ဖြစ်ပါတယ်။

ချဲလ်ဆီးက ပီအက်စ်ဂျီကို ၅-၂ ဖြင့်လည်းကောင်း၊ လီဗာပူးက ဂါလာတာစာရေးကို ၁-၀ ဖြင့်လည်းကောင်း ရှုံးနိမ့်ခဲ့ပါတယ်။

ပရီးမီးယားလိဂ်ကလပ်များတွင် နယူးကာဆယ်က ဘာစီလိုနာကို သရေ၊ အာဆင်နယ်က လေဗာကူဆင်ကို သရေသာ ကစားနိုင်ခဲ့ပြီး ချန်ပီယံလိဂ် ၁၆ သင်း ရှုံးထွက်အဆင့် ပထမအကျော့တွင် ပရီးမီးယားလိဂ်ကလပ်တွေထဲမှာ တစ်သင်းမျှ နိုင်ပွဲ မရခဲ့ကြပါဘူး။

ယင်းသို့ ပရီးမီးယားလိဂ်ကလပ်များ ချန်ပီယံလိဂ် ၁၆ သင်း ရုံးထွက်အဆင့်ပထမအကျော့တွင် နိုင်ပွဲ ပျောက်ဆုံးခဲ့မှုနှင့်အတူ ချန်ပီယံလိဂ် ကွာတားဖိုင်နယ်သို့ တက်ရေး မျှော်လင့်ချက်လည်း နည်းပါးလာလျက်ရှိပါတယ်။

ပရီးမီးယားလိဂ်ကလပ်များဟာ ပထမအကျော့တွင် နိုင်ပွဲပျောက်ဆုံးခဲ့မှုနှင့်အတူ အာဆင်နယ်က လွဲပြီး ကျန်အသင်းအားလုံးနီးပါး ချန်ပီယံလိဂ်မှ ထွက်ခွာရတော့မယ်လို့ Opta ရဲ့ စူပါကွန်ပျူတာက ဟောကိန်းထုတ်လာပါတယ်။

Opta ရဲ့ စူပါကွန်ပျူတာက ချန်ပီယံလိဂ် ၁၆ သင်း ရုံးထွက်အဆင့်ပွဲစဉ်များ မကစားမီ ကွာတားဖိုင်နယ်သို့ တက်နိုင်ခြေအဖြစ် အာဆင်နယ်ကို ၈၅.၈ ရာခိုင်နှုန်း၊ လီဗာပူးကို ၈၂.၃ ရာခိုင်နှုန်း၊ မန်စီးတီးကို ၆၄.၃ ရာခိုင်နှုန်း၊ ချဲလ်ဆီးကို ၅၃.၃ ရာခိုင်နှုန်း၊ နယူးကာဆယ်ကို ၄၄.၇ ရာခိုင်နှုန်း၊ စပါးစ်ကို ၄၆.၃ ရာခိုင်နှုန်းပေးထားခဲ့တာပါ။

ဒါပေမယ့် Opta ရဲ့ စူပါကွန်ပျူတာဟာ ပထမအကျော့ကစားပြီးချိန်မှာတော့ အာဆင်နယ်နှင့် လီဗာပူးတို့ကိုသာ ကွာတားဖိုင်နယ်သို့ တက်နိုင်ခြေ ၇၇.၉ ရာခိုင်နှုန်း၊ လီဗာပူးကို ၅၃.၈ ရာခိုင်နှုန်းပေးလာပါတယ်။

ကျန်အသင်းများဖြစ်ကြတဲ့ မန်စီးတီးကို ၉.၄ ရာခိုင်နှုန်း၊ ချဲလ်ဆီးကို ၇.၃ ရာခိုင်နှုန်း၊ နယူးကာဆယ်ကို ၃၂.၂ ရာခိုင်နှုန်း၊ စပါးစ်ကို ၃.၃ ရာခိုင်နှုန်းတို့သာ ကွာတားဖိုင်နယ်သို့ တက်နိုင်ခြေ ပေးလာပါတယ်။

တဖက်တွင် ပရီးမီးယားလိဂ်ကလပ်များရဲ့ ချန်ပီယံလိဂ်ကွာတားဖိုင်နယ်အဆင့်သို့ တက်နိုင်ခြေနည်းပါးလာမှုနှင့်အတူ ဥရောပစွမ်းဆောင်ရည်အဆင့်သတ်မှတ်ချက်မှ တဆင့် ၅ သင်းမြောက်အသင်းအဖြစ် ချန်ပီယံလိဂ်ဝင်ခွင့် ရရှိနိုင်မယ့်အခွင့်အရေးကို များစွာ ထိခိုက်လာနိုင်ခြေ ရှိနေပါတယ်။