အီရန်ကစားသမားများကို နိုင်ငံရေးခိုလှုံခွင့်ပေးခဲ့တဲ့ ဩစတြေးလျမှာ ကစားသမားများကို ဓားစာခံအဖြစ် ဖမ်းဆီးထားခြင်းလို့ စွပ်စွဲလာတဲ့ အီရန်ဘောလုံးအဖွဲ့ချုပ်
===================
အီရန်ဘောလုံးအဖွဲ့ချုပ်စီနီယာဥက္ကဌက အီရန်လက်ရွေးစင်အသင်းအမျိုးသမီးအသင်းသားများကို နိုင်ငံရေးခိုလှုံခွင့်ပေးခဲ့တဲ့ ဩစတြေးလျအား ဓားစာခံလုပ်ထားတယ်လို့ စွပ်စွဲ ပြောဆိုလာပါတယ်။
ဒါ့အပြင် အီရန်အစိုးရက "ချစ်ရပါသော ကောင်မလေးတွေရေ၊ အီရန်က မင်းတို့ကို လက်ကမ်းကြိုဆိုနေပါတယ်။ ဘာမှ မစိုးရိမ်ပါနဲ့။ အိမ်ပြန်လာကြပါ"လို့လည်း အီရန်သို့ ပြန်ရန် ဆုံးဖြတ်ခဲ့ကြတဲ့ ကစားသမားများကို ကြိုဆိုသွားပါတယ်။
အီရန်အမျိုးသမီးအသင်းသားများဟာ မတ်လ ၂ ရက်နေ့တုန်းက တောင်ကိုရီးယားနှင့် အာရှအမျိုးသမီးဖလားအဖွင့်ပွဲတွင် နိုင်ငံတော်သီချင်း မသီဆိုဘဲ ဆန္ဒပြမှု ပြုလုပ်ပြီးနောက် လူအများရဲ့ အာရုံစိုက်ခြင်းခံခဲ့ရပါတယ်။
အီရန်အသင်းသားများဟာ ဩစတြေးလျ၊ ဖိလစ်ပိုင်တို့နှင့်ပွဲစဉ်များတွင် နိုင်ငံတော်သီချင်းသီဆိုကာ အလေးပြုမှုပြုလုပ်ခဲ့ပေမယ့်လည်း တောင်ကိုရီးယားပွဲစဉ်မှ လုပ်ရပ်ကြောင့် အီရန်သို့ ပြန်လာချိန်တွင် နိုင်ငံတော်ပုန်ကန်မှုကြောင့် ကွပ်မျက်ခြင်း (သိုမ့ဟုတ်) ဖမ်းဆီးထောင်ချခြင်းခံရမည်ကို စိုးရိမ်ခဲ့ရပါတယ်။
တဖက်တွင် ဩစတြေးလျအရပ်ဘက်ဆိုင်ရာအဖွဲ့အစည်းများကလည်း အီရန်အသင်းကို လိုအပ်တဲ့ အကူအညီပေးရန် ဩစတြေးလျအစိုးရအား တောင်းဆိုမှု ပြုလုပ်ခဲ့ကြပါတယ်။
ဒါကြောင့်လည်း ဩစတြေးလျအစိုးရဟာ တနင်္ဂနွေနေ့တုန်းက အုပ်စုပွဲ ၃ ပွဲလုံး ရှုံးနိမ့်ကာ အီရန်သို့ ပြန်ရန် ဖြစ်လာချိန်တွင် အီရန်အသင်းသားများအား နိုင်ငံရေးခိုလှုံခွင့်ပေးရေး စည်းရုံးမှု ပြုလုပ်ခဲ့ကြပါတယ်။
အီရန်အသင်းသား ၅ ဦးတို့ဟာ တနင်္လာနေ့တုန်းက နိုင်ငံရေးခိုလှုံခွင့်ပြုလုပ်ခဲ့ကြပါတယ်။
ယင်းနောက် အင်္ဂါနေ့တွင် အီရန်သို့ မထွက်မီ လေဆိပ်သို့ ရောက်ချိန်အထိ ဩစတြေးလျအာဏာပိုင်တို့ဟာ နိုင်ငံရေးခိုလှုံခွင့်ပေးရေး အကူအညီ ကမ်းလှမ်းခဲ့ကြပါတယ်။
နောက်ဆုံးအချိန်တွင် အီရန်ကစားသမား ၁ ဦးနှင့် အထောက်အကူပြု ဝန်ထမ်း ၁ ဦးတို့ ထပ်မံ နိုင်ငံရေးခိုလှုံခွင့်ရယူခဲ့ပါတယ်။
အီရန်ဘောလုံးအဖွဲ့ချုပ်ဥက္ကဌမီဒီတာက ဩစတြေးလျဝန်ကြီးချုပ်အန်တိုနီအယ်ဘာနက်စ်ဟာ အီရန်ကစားသမားများအား နိုင်ငံမှ ထွက်ခွာခြင်း မပြုရေး တားဆီးရန် ရဲတပ်ဖွဲ့အား ညွှန်ကြားခဲ့ကြောင်း ဆိုသွားပါတယ်။
မီဒီက"ပွဲပြီးတော့ ကံဆိုးစွာဘဲ ဩစတြေးလျရဲတပ်ဖွဲ့ ရောက်လာတယ်။ ကြားဝက်စွက်ဖက်လာတယ်။ ဟိုတယ်ကနေ ကစားသမား ၁ ဦး ၂ ဦးကို ဖယ်ရှားလိုက်တယ်။ ဒါကို သတင်းမှာ ဖတ်ရတယ်။ သူတို့ဟာ မီနက်မြို့က မိန်းကလေး ၁၆၀ (အီရန်စာသင်ကျောင်းကို ဗုံးကြဲရာမှ သေဆုံးမှု)ရဲ့အသက်ကို ရယူခဲ့တယ်။ ပြီးတော့ ကျုပ်တို့ ကောင်မလေးတွေကို ဓားစာခံ လုပ်ထားပြန်တယ်။ သူတို့ ဆိုးဆိုးရွားရွားလုပ်ခဲ့ကြတယ်။ တချို့ ဆို ရောက်လာပြီး ကားရှေ့မှာ လှဲချပြီး လေဆိပ်သို့ မမောင်းနိုင်အောင် တားကြတယ်။ သူတို့(ဩစတြေးလျရှိ အီရန်အမျိုးသမီးအသင်းအရေးကို ဆောင်ရွက်နေကြသူများ)က ဂိတ်ကနေ မထွက်နိုင်အောင် တားကြတယ်။ ပြီးတော့ လူတိုင်းကို ဒုက္ခသည်လုပ်ကြဖို့ ပြောတယ်"လို့ ပြောကြားသွားပါတယ်။
