အီရန်အသင်းသား ၂ ဦး ဩစတြေးလျတွင် နိုင်ငံရေးခိုလှုံမှု ထပ်မံ ပြုလုပ်လာ
==================
ဩစတြေးလျက အီရန်အမျိုးသမီးအသင်းနှင့် ဆက်စပ်နေတဲ့ နောက်ထပ် ၂ ဦးအား လူသားချင်းစာနာထောက်ထားတဲ့အနေဖြင့် နိုင်ငံတွင် ဆက်လက်နေထိုင်ခွင့်ပေးကာ နိုင်ငံရေးခိုလှုံခွင့်ပေးလာကြောင်း အတည်ပြုလာပါတယ်။
ယင်းနှစ်ဦးမှ တစ်ဦးမှာ ကစားသမားတစ်ဦးဖြစ်ပြီး ကျန်တစ်ဦးမှာ ပံ့ပိုးကူညီရေးဝန်ထမ်းတစ်ဦး ဖြစ်ပါတယ်။
ဩစတြေးလျဟာ အင်္ဂါနေ့တုန်းက အီရန်အမျိုးသမီးလက်ရွေးစင်အသင်းသား ၅ ဦးကို နိုင်ငံရေးခိုလှုံခွင့်ပေးပြီးနောက် ယခု နောက်ထပ် ၂ ဦးအား ခိုလှုံခွင့်ပေးလာတာပါ။
အီရန်အသင်းသားတို့ဟာ တောင်ကိုရီးယားနှင့် ကစားတဲ့ အဖွင့်ပွဲတွင် နိုင်ငံတော်သီချင်း မသီဆိုဘဲ ဆန္ဒပြသပိတ်မှောက်မှု ပြုလုပ်ပြီးနောက် ပြိုင်ပွဲမှ ထွက်ခွာရချိန်တွင် အီရန်သို့ ပြန်ရောက်ချိန်မှာ ကွပ်မျက်ခြင်း (သို့မဟုတ်) ထောင်ချခြင်းတို့ ကြုံလာနိုင်မှုနှင့်အတူ နိုင်ငံရေးခိုလှုံခွင့်တောင်းဆိုခဲ့ကြပါတယ်။
ကျန်အီရန်အသင်းသားများကတော့ အာရှဖလားပြိုင်ပွဲမှ ထွက်ခွာရပြီး ၂ ရက်အကြာ အင်္ဂါနေ့မှာတော့ ဩစတြေးလျမှ ထွက်ခွာသွားကြပြီလို့ ယူဆရပါတယ်။
အီရန်သို့ ပြန်သွားကြတဲ့သူများမှာလည်း အီရန်တွင် ကျန်ရစ်ခဲ့ကြတဲ့ မိသားစုဝင်များရဲ့ လုံခြုံရေးအပေါ် စိုးရိမ်ကြောက်လန့်ကာ ပြန်ခဲ့ကြရတာလည်း ဖြစ်ပါတယ်။
နောက်ထပ် ဩစတြေးလျတွင် ကျန်ရစ်ခဲ့တဲ့ သူ ၂ ဦးတို့ဟာ ဟိုတယ်တွင် နေထိုင်စဉ်ကတည်းက ကျန်အသင်းသားများနှင့် အတူ မနေခဲ့ကြတာပါ။
ဩစတြေးလျအာဏာပိုင်တို့ဟာ လူသားချင်း စာနာထောင်ထားတဲ့အနေဖြင့် နိုင်ငံရေးခိုလှုံခွင့်ပေးလာတဲ့ အီရန်အသင်းသား ၇ ဦးတို့အား အမြဲတမ်းနေထိုင်ခွင့် ရရှိရေး အလျှင်အမြန် ဆောင်ရွက်မှုများ ပြုလုပ်နေပါတယ်။
ဩစတြေးလျဟာ အီရန်အသင်းသားများအနေဖြင့် အီရန်သို့ ပြန်ရောက်ချိန်တွင် အရေးယူခံရနိုင်တဲ့ အခြေအနေကြောင့် အသင်းသား တစ်ဦးချင်းစီအား ဘာသာပြန် အကူအညီဖြင့် ဩစတြေးလျတွင် ဆက်လက်နေထိုင်နိုင်ရေး စီစဉ်ပေးမယ်လို့ အကူအညီလက်ကမ်းခဲ့သလို မိသားစုဝင်များနှင့်လည်း ဖုန်းခေါ်ဆိုနိုင်အောင် စီစဉ်ပေးခဲ့ပါတယ်။
ဒါပေမယ့် ကျန်အီရန်အသင်းသားတို့ဟာ အီရန်တွင် ကျန်ရှိနေတဲ့ မိသားစုဝင်များနှင့် ဆွေးနွေးမှုများ ပြုလုပ်ပြီးနောက် နေအိမ်သို့ ပြန်ရန် ရွေးချယ်ခဲ့ကြတာပါ။
ဩစတြေးလျရောက် အီရန်အသိုင်းအဝိုင်း ၂၀၀ တို့ဟာ ပြီးခဲ့တဲ့ တနင်္ဂနွေနေ့တုန်းက ဖိလစ်ပိုင်အား ၂-၀ ဂိုးဖြင့် ရှုံးနိမ့်ကာ အာရှဖလားပြိုင်ပွဲမှ ထွက်ခွာရပြီးနောက် နေအိမ်သို့ ပြန်ရမယ့် အီရန်အသင်းသားများအား အကာအကွယ်ပေးရေး လှုပ်ရှားမှုများ ပြုလုပ်နေခဲ့ကြတာပါ။
အီရန်အသင်းသားများဟာ တောင်ကိုရီးယားနှင့်အဖွင့်ပွဲတွင် နိုင်ငံတော်သီချင်း မသီဆိုမှုကြောင့် အီရန်အစိုးရပိုင် ရုပ်သံရဲ့ နိုင်ငံတော်သစ္စာဖောက်များအဖြစ် ကြေညာခြင်းခံခဲ့ရပါတယ်။
ယင်းနောက် အီရန်အသင်းသားများဟာ ဩစတြေးလျ၊ ဖိလစ်ပိုင်တို့နှင့်ပွဲတွင် နိုင်ငံတော်သီချင်း ပြန်လည်သီဆိုကာ အလေးပြုမှု ပြုလုပ်ခဲ့ကြပါတယ်။
ဒါပေမယ့် အီရန်တွင် နိုင်ငံတော်ပုန်ကန်မှုအား ကွပ်မျက်ခြင်း (သို့မဟုတ်) ထောင်ဒဏ်တစ်သက်တကျွန်းအထိ ချမှတ်နိုင်ရာ အီရန်အသင်းသားတို့မှာ အီရန်သို့ ပြန်ရောက်ချိန်တွင် ညှင်းပန်းနှိပ်စက်မှု ခံရမည်ကို စိုးရိမ်စရာ ရှိခဲ့ပါတယ်။
ယင်းနောက်မှာတော့ ဩစတြေးလျအာဏာပိုင်များဟာ အီရန်အသင်းသားများကို နိုင်ငံရေးခိုလှုံခွင့် ပေးရေး အစွမ်းကုန် ကူညီ လုပ်ဆောင်လာခဲ့ကြတာလည်း ဖြစ်ပါတယ်။
