ဟော်မုဇ်ရေလက်ကြားတွင် သင်္ဘောများအား လိုက်ပါစောင့်ရှောက်ပေးရန် လောလောဆယ် မဖြစ်နိုင်သေးကြောင်း အမေရိကန်ရေတပ်က သင်္ဘောလုပ်ငန်းရှင်များကို ပြောကြား

ဟော်မုဇ်ရေလက်ကြားကို ဖြတ်သန်းရာတွင် စစ်ဘက်ဆိုင်ရာ လိုက်ပါစောင့်ရှောက်မှု ပေးရန် သင်္ဘောလုပ်ငန်းရှင်များဘက်မှ အီရန်နှင့် စစ်ပွဲစတင်ကတည်းက နေ့စဉ်နှင့်အမျှ တောင်းဆိုမှုများကို အမေရိကန်ရေတပ်က ငြင်းဆိုခဲ့သည်။

တိုက်ခိုက်ခံရနိုင်ခြေ အန္တရာယ်မှာ လောလောဆယ်တွင် အလွန်မြင့်မားနေကြောင်း အဆိုပါကိစ္စနှင့် နီးစပ်သည့် ရင်းမြစ်များ၏ ပြောကြားချက်အရ သိရသည်။

ရေတပ်၏ အကဲဖြတ်ချက်များအရ အရှေ့အလယ်ပိုင်း ရေနံတင်ပို့မှုများ ဆက်လက် အနှောင့်အယှက်ဖြစ်ပေါ်နေမည်ဖြစ်ပြီး၊ ပုံမှန်ကုန်သွယ်မှုများ ပြန်လည်စတင်ရန် လိုအပ်ပါက ရေတပ်အစောင့်အရှောက်များ ပေးရန် အသင့်ရှိသည်ဟူသော သမ္မတ ဒေါ်နယ်ထရန့်၏ ပြောကြားချက်များနှင့် ကွဲလွဲနေသည်။

လွန်ခဲ့သည့် တစ်ပတ်ကျော်က အမေရိကန်-အစ္စရေးနှင့် အီရန်တို့အကြား စစ်ပွဲစတင်ကတည်းက ဤကျဉ်းမြောင်းသော ရေလက်ကြားတစ်လျှောက် သင်္ဘောသွားလာမှုများမှာ ရပ်တန့်လုနီးပါး ဖြစ်နေသည်။ ၎င်းသည် ကမ္ဘာ့ရေနံထောက်ပံ့မှု၏ ငါးပုံတစ်ပုံခန့်ကို ပိတ်ဆို့ထားသကဲ့သို့ ဖြစ်နေပြီး ကမ္ဘာ့ရေနံဈေးနှုန်းများကို ၂၀၂၂ ခုနှစ်နောက်ပိုင်းတွင် အမြင့်ဆုံးအထိ မြင့်တက်စေခဲ့သည်။

အီရန်တော်လှန်ရေးအစောင့်တပ်ဖွဲ့မှ အဆင့်မြင့်အရာရှိတစ်ဦးက ရေလက်ကြားကို ပိတ်ထားကြောင်းနှင့် ဖြတ်သန်းရန် ကြိုးပမ်းသည့် မည်သည့်သင်္ဘောကိုမဆို ပစ်ခတ်မည်ဟု ပြောကြားခဲ့ကြောင်း အီရန်မီဒီယာများက ပြီးခဲ့သည့်အပတ်က ဖော်ပြခဲ့သည်။ သင်္ဘောအချို့မှာလည်း အတိုက်ခိုက်ခံခဲ့ရပြီးဖြစ်သည်။

အမေရိကန်ရေတပ်သည် သင်္ဘောလုပ်ငန်းနှင့် ရေနံလုပ်ငန်းရှင်များနှင့် ပုံမှန်တွေ့ဆုံဆွေးနွေးမှုများ ပြုလုပ်ခဲ့ပြီး၊ ထိုဆွေးနွေးပွဲများတွင် လောလောဆယ် လိုက်ပါစောင့်ရှောက်မှု မပေးနိုင်သေးကြောင်း ပြောကြားခဲ့သည်ဟု သင်္ဘောလုပ်ငန်းဆိုင်ရာ ရင်းမြစ်သုံးဦးက ဆိုသည်။ အဆိုပါကိစ္စ၏ ထိရှလွယ်မှုကြောင့် အမည်မဖော်လိုသည့် ထိုရင်းမြစ်များက ရေလက်ကြားကို ဖြတ်သန်းရန် ရေတပ်အစောင့်အရှောက်များပေးရန် လုပ်ငန်းရှင်များဘက်မှ နေ့စဉ်နီးပါး တောင်းဆိုနေကြကြောင်း ပြောသည်။

အင်္ဂါနေ့က ပြုလုပ်သော ဆွေးနွေးပွဲတွင် ရေတပ်၏ အကဲဖြတ်ချက်မှာ ပြောင်းလဲမှုမရှိဘဲ တိုက်ခိုက်ခံရနိုင်ခြေ လျော့နည်းသွားမှသာ လိုက်ပါစောင့်ရှောက်မှု ပေးနိုင်မည်ဖြစ်ကြောင်း ရင်းမြစ်တစ်ခုက ဆိုသည်။ ပန်တဂွန်စစ်ဌာနချုပ်ကမူ ယင်းကိစ္စနှင့်ပတ်သက်၍ မှတ်ချက်ပေးရန် ချက်ချင်းတုံ့ပြန်ခြင်း မရှိသေးပေ။

သမ္မတ ထရန့်ကမူ လိုအပ်ပါက ဟော်မုဇ်ရေလက်ကြားကို ဖြတ်သန်းမည့် ရေနံတင်သင်္ဘောများကို လိုက်ပါစောင့်ရှောက်ပေးရန် အမေရိကန်က အသင့်ရှိနေကြောင်း ပြီးခဲ့သည့်ရက်ပိုင်းအတွင်း အကြိမ်ကြိမ် ပြောကြားခဲ့သည်။

"အချိန်တန်တဲ့အခါ လိုအပ်မယ်ဆိုရင် အမေရိကန်ရေတပ်နဲ့ မဟာမိတ်တွေက သင်္ဘောတွေကို ရေလက်ကြားထဲကနေ လိုက်ပါစောင့်ရှောက်ပေးသွားမှာပါ။ အဲ့ဒီလိုမျိုး မလိုအပ်ပါစေနဲ့လို့ မျှော်လင့်ပေမဲ့ လိုအပ်လာရင်တော့ သူတို့ကို လိုက်ပို့ပေးမှာပါ" ဟု ၎င်းက ဖလော်ရီဒါရှိ Mar-a-Lago အပန်းဖြေစခန်းတွင် တနင်္လာနေ့က ပြုလုပ်သည့် သတင်းစာရှင်းလင်းပွဲတွင် ပြောကြားခဲ့သည်။

အမိန့်ရရှိပါက သင်္ဘောများကို လိုက်ပါစောင့်ရှောက်ပေးနိုင်မည့် နည်းလမ်းများကို အမေရိကန်စစ်တပ်က စတင်စစ်ဆေးနေပြီဖြစ်ကြောင်း ပူးတွဲစစ်ဦးစီးချုပ်များအဖွဲ့၏ ဥက္ကဋ္ဌ ဗိုလ်ချုပ်ကြီး ဒန်ကိန်း က အင်္ဂါနေ့တွင် ပြောကြားခဲ့သည်။ "ကျွန်တော်တို့ နည်းလမ်းမျိုးစုံကို စဉ်းစားနေပါတယ်" ဟု ဗိုလ်ချုပ်ကြီး ကိန်းက ပန်တဂွန်ရှိ သတင်းထောက်များကို ပြောကြားခဲ့သည်။

အမေရိကန်စစ်တပ်အနေဖြင့် ကုန်သွယ်ရေးသင်္ဘောများကို ရေလက်ကြားမှ လိုက်ပါစောင့်ရှောက်ပေးခဲ့ခြင်း မရှိသေးကြောင်း အမေရိကန်အရာရှိတစ်ဦးက Reuters သို့ ပြောကြားခဲ့သည်။ ထိုနေ့အစောပိုင်းတွင် အမေရိကန် စွမ်းအင်ဝန်ကြီး ခရစ်ရိုက် က ရေတပ်သည် သင်္ဘောတစ်စီးကို အောင်မြင်စွာ လိုက်ပါစောင့်ရှောက်ပေးနိုင်ခဲ့ကြောင်း X တွင် ရေးသားခဲ့သည့် ပို့စ်တစ်ခုကို ပြန်လည်ဖျက်သွားခဲ့သည်။