နွေရာသီဝင်ရောက်လာပြီဖြစ်သဖြင့် အပူခံဝါးခမောက်များ အရောင်းသွက်
နွေရာသီကာလသို့ ရောက်ရှိလာပြီး အပူချိန်မြင့်တက်လာခြင်းကြောင့် ဝါးခွံ၊ ဝါးဖတ်များဖြင့် ပြုလုပ်ထားသည့် အပူခံဝါးခမောက်များ ပြည်တွင်းဈေးကွက်အတွင်း အရောင်းသွက်လျက်ရှိကြောင်း နေပြည်တော်၊ ပျဉ်းမနားမြို့ရှိ ကြိမ်နှင့် ဝါးထည်ပစ္စည်း အရောင်းဆိုင်များထံမှ သိရသည်။
ကြိမ်နှင့်ဝါးထည်ပစ္စည်း ရောင်းချသူတစ်ဦး၏ ပြောကြားချက်အရ နွေရာသီဝင်ရောက်လာခြင်းနှင့်အတူ နေထိဒဏ်မှ ကာကွယ်ရန် ဝါးခမောက်များကို ဝယ်ယူသူများ ပိုမိုများပြားလာကြောင်း သိရသည်။
ကျေးလက်ဒေသများရှိ လယ်ယာလုပ်ကိုင်သူများ၊ တောင်သူများသည် လယ်ယာလုပ်ငန်းများ ဆောင်ရွက်ရာတွင် နေပူဒဏ်ကို ခံနိုင်ရည်ရှိသော ဝါးခမောက်များကို အဓိက အသုံးပြုကြကြောင်းလည်း ဆိုသည်။
“နွေရာသီဝင်လာတော့ နေပူပြင်းလာပါတယ်။ ဒါကြောင့် ဝါးခမောက်တွေ စရောင်းနေရပါတယ်။ ဝါးခမောက်က အခြားဦးထုပ်တွေလိုမဟုတ်ဘဲ အပူဒဏ်ခံနိုင်ပါတယ်။ အများဆုံးကတော့ ရွာတွေဘက်က တောင်သူလယ်သမားတွေ ဝယ်ကြတာများပါတယ်။ မြို့ပေါ်က လူတွေကလည်း နေပူထဲသွားလာရတဲ့အချိန်တွေမှာ ဆောင်းဖို့ ဝယ်ယူကြတာရှိပါတယ်” ဟု ကြိမ်နှင့်ဝါးထည်ပစ္စည်း ရောင်းချသူတစ်ဦးက ပြောသည်။
လက်ရှိဈေးကွက်အတွင်း ဝါးခမောက်ပုံစံ အလုံးနှင့် အပြန့် နှစ်မျိုးစလုံး အရောင်းအဝယ်ဖြစ်နေပြီး လက်ကားဈေးနှုန်းမှာ ကျပ် ၁၅၀၀ မှ ၂၀၀၀ ဝန်းကျင်ရှိကာ လက်လီရောင်းဈေးမှာ ကျပ် ၃၅၀၀ မှ ၆၀၀၀ အထိရှိကြောင်း သိရသည်။
အဆိုပါ အပူခံဝါးခမောက်များကို ဝါးခွံ၊ ဝါးဖတ်များဖြင့် ပြုလုပ်ထားပြီး နေပူဒဏ်ကိုသာမက မိုးရေစိုခြင်းကိုပါ ခံနိုင်သဖြင့် နွေရာသီသာမက မိုးရာသီတွင်ပါ အသုံးပြုနိုင်ကြောင်း သိရသည်။
ထို့ကြောင့် လယ်ယာလုပ်ကိုင်သူများ၊ စိုက်ပျိုးရေးလုပ်ငန်းလုပ်ကိုင်သူများနှင့် ကျေးလက်နေပြည်သူများအကြား အသုံးပြုမှုများပြားသည့် လူသုံးကုန်ပစ္စည်းတစ်မျိုး ဖြစ်လာကြောင်း သိရသည်။
