ဒလမြို့ နာရီစင်သစ်ကြီးတွင် ကျပ်သိန်း ၁၀၀ တန် ဆိုလာနာရီ ၄ လုံး တပ်ဆင်
ဒလမြို့နယ် ကမ်းနားကားကွင်း လက်မှတ်ရုံအနီးတွင် မြို့၏ အထိမ်းအမှတ်အဖြစ် တည်ဆောက်လျက်ရှိသည့် နာရီစင်သစ်ကြီးတွင် ကျပ်သိန်း ၁၀၀ တန် ဆိုလာနာရီ ၄ လုံး တပ်ဆင်ပြီးဖြစ်ကြောင်း ရန်ကုန်မြို့တော် စည်ပင်သာယာရေးကော်မတီမှ သိရသည်။
အဆိုပါနာရီ၏ တန်ဖိုးမှာ ကျပ်သိန်း ၁၀၀ တန်ဖိုးရှိပြီး နာရီစင်၏ လေးဘက်တွင် တပ်ဆင်ထားခြင်းဖြစ်ကြောင်း၊ အချိန်မှန်ကန်စေရန်အတွက် ဆိုလာစနစ်ဖြင့် လည်ပတ်နိုင်အောင် ပြုလုပ်ထားပြီး ယင်းစနစ်ကို မက်စ်မြန်မာက လှူဒါန်းထားခြင်းဖြစ်သည်။
ဒလမြို့ရှိ နာရီစင်သစ်ကြီးကို ယခင်ရှိခဲ့သည့် နာရီစင်အဟောင်းကို ဖျ-က်သိမ်းကာ ရန်ကုန်တိုင်းဒေသကြီး အစိုးရအဖွဲ့၏ အထူးခွင့်ပြုရန်ပုံငွေဖြင့် ပြန်လည်တည်ဆောက်နေခြင်းဖြစ်သည်။
ဆောက်လုပ်ရေးလုပ်ငန်း၏ ပထမအဆင့်ဖြစ်သည့် ဘိုးပိုင်စိုက်ထူကွန်ကရစ်လောင်းခြင်းကို ၂၀၂၅ ခုနှစ် စက်တင်ဘာလ ၁၀ ရက်တွင် စတင်ဆောင်ရွက်ခဲ့ကြောင်း သိရသည်။
နာရီစင်သစ်ကြီးကို ရန်ကုန်မြို့တော် စည်ပင်သာယာရေးကော်မတီ အင်ဂျင်နီယာဌာန (လမ်းနှင့် တံတား)က တာဝန်ယူဆောက်လုပ်နေပြီး အောက်ခြေခုံတုံးအမြင့် ၃ ပေ၊ ခုံတုံးပေါ်မှ နာရီစင်အမြင့် ၄၀ ပေရှိကာ စုစုပေါင်း အမြင့် ၄၃ ပေရှိသည့် လေးဘက်မြင် နာရီစင်တစ်ခုဖြစ်ကြောင်း သိရသည်။
