မြန်မာ-ဂျပန် နှစ်နိုင်ငံ ပူးပေါင်းဆောင်ရွက်မှုဖြင့် တည် ဆောက်သည့် ဂျိုင်း(ဇာသပြင်)တံတားသစ်နှင့် အတ္တရံတံတားသစ်တို့စတင်ဖွင့်လှစ်
မြန်မာ-ဂျပန် နှစ်နိုင်ငံ ပူးပေါင်းဆောင်ရွက်မှုဖြင့် တည် ဆောက်သည့် ကရင်ပြည်နယ်၊ ဘားအံမြို့ရှိ ဂျိုင်း(ဇာသပြင်)တံတားသစ်နှင့် မွန်ပြည်နယ်၊ မော်လမြိုင်မြို့ရှိ အတ္တရံတံတားသစ်တို့ကို ယနေ့ မတ် ၈ ရက်က နိုင်ငံ တော်ဝန်ကြီးချုပ်ဦးညိုစောတက်ရောက်၍ ကမ္ဗည်းမော်ကွန်းများအား စက်ခလုတ်နှိပ်ဖွင့်လှစ်ပေးခဲ့သည်။
ထို့ပြင် ဂျိုင်း(ဇာသပြင်)တံတားသစ်အား ပြည်ထောင်စုဝန်ကြီးများဖြစ်သည့် ဦးထွန်းအုံ၊ ဦးမင်းနောင်၊ ဦးမျိုးသန့်၊ ကရင်ပြည်နယ်ဝန်ကြီးချုပ်ဦးစောမြင့်ဦးနှင့် မွန်လပြည်နယ်ဝန်ကြီးချုပ်ဦးအောင်ကြည်သိန်း၊ အတ္ထရံတံတားသစ်ကို ပြည်ထောင်စုဝန်ကြီးဦးမျိုးသန့်၊ မွန် ပြည်နယ်ဝန်ကြီးချုပ်ဦးအောင်ကြည်သိန်း၊ ဒု-ဝန်ကြီးများဖြစ်သည့် ဦးအောင်ကျော်ထွန်း၊ ဗိုလ်ချုပ်ဖြိုးသန့် နှင့် ဦးမျိုးမြင့်တို့ကဖဲကြိုးဖြတ်ဖွင့်လှစ်ပေးခဲ့ကြသည်။
ဂျိုင်း(ဇာသပြင်)တံတားသစ်သည် သံမဏိကြိုးဆိုင်းတံတားဖြစ်ပြီး တံတားအရှည်(၂,၆၁၅)ပေ၊ ယာဉ်သွားလမ်းအကျယ်(၄)လမ်းသွား၊ ရေလမ်းကင်းလွတ်အ ကျယ်(၇၅၀)ပေနှင့် အမြင့်(၄၀)ပေရှိကာ တံတားခံနိုင်ဝန်မှာယာဉ်တစ်စီးချင်း(၇၅တန်ဖြစ်သည်။
အတ္ထရံတံတားသစ်သည်လည်း သံမဏိကြိုးဆိုင်းတံ တားဖြစ်ပြီး တံတားအရှည်(၁,၅၇၅)ပေ၊ ယာဉ်သွားလမ်းအကျယ်(၄)လမ်းသွား၊ ရေလမ်းကင်းလွတ်အ ကျယ်(၄၀၀)ပေ၊ အမြင့်(၄၀)ပေရှိကာ တံတားခံနိုင်ဝန်မှာယာဉ်တစ်စီးချင်း(၇၅)တန်ဖြစ်သည်။
အဆိုပါ ခေတ်မီသံမဏိကြိုးဆိုင်းတံတားကြီးများ တည်ဆောက်ပြီးစီးခဲ့၍ နိုင်ငံတော်ဖွံ့ဖြိုးတိုးတက်မှုနှင့်အတူ ဒေသတွင်းလူမှုစီးပွားဘဝများနှင့် ပြည်တွင်း/ပြည်ပ စီးပွားရေးလုပ်ငန်းများ ဖွံ့ဖြိုးတိုးတက်လာမည်ဖြစ်၍ အလုပ်အကိုင်အခွင့်အလမ်းများ ပိုမိုရရှိလာမည်ဖြစ်သည်။
ထို့ပြင် ယင်းတံတားများအသုံးပြု၍ မွန်ပြည်နယ်၊ မော်လမြိုင်မြို့မှတစ်ဆင့် တနင်္သာရီတိုင်း၊ ထားဝယ်မြို့တွင်တည်ဆောက်မည့် အထူးစီးပွားရေးဇုန်၊ ရေနက်ဆိပ်ကမ်းနှင့် ရန်ကုန်မြို့ရှိ သီလဝါအထူးစီးပွားရေးဇုန်တို့သို့ ကုန်စည်စီးဆင်းမှုများပိုမိုကောင်းမွန်မြန်ဆန်လာမည်ဖြစ်ပြီး အရှေ့-အနောက် စီးပွားရေးစင်္ကြံလမ်းပေါ်ရှိ ဗီယက်နမ်၊ လာအို၊ ထိုင်းနိုင်ငံများနှင့်ပါ ဆက်သွယ်သွားလာနိုင်မည်ဖြစ်သည်။
