စစ်ရေယာဉ်(သာလွန်မင်း)နှင့် မြစ်တွင်းသွားဘက်စုံ သုံးစစ်ရေယာဉ်(၄)စီးတပ်တော်ဝင်
ရန်ကုန်မြို့ရှိ ရေတပ်ဆိပ်ခံတံတား၌ မြန်မာ့တပ်မတော် (ရေ)၏ ဖရီဂိတ်စစ်ရေယာဉ်ကြီး စစ်ရေယာဉ်(သာလွန်မင်း)နှင့် မြစ်တွင်းသွားဘက်စုံသုံးစစ်ရေယာဉ်(၄)စီးတို့ ယနေ့ မတ် ၈ ရက်ကတပ်တော်ဝင်ရာ နိုင်ငံတော် ယာယီသမ္မတနှင့် ဇနီးတို့တက်ရောက်ခဲ့ကြသည်။
ကာကွယ်ရေးဦးစီးချုပ်(ရေ)ဗိုလ်ချုပ်ကြီးထိန်ဝင်းက စစ်ရေယာဉ်များ တပ်တော်ဝင်ခြင်းကိုရှင်းလင်းတင် ပြပြီး ရေတပ်သင်္ဘောကျင်းဌာနချုပ်၊ ဌာနချုပ်မှူးက အမှတ်(၁)ဗျူဟာစစ်ရေယာဉ်စု၊ ရေယာဉ်စုမှူးထံ တပ်တော်ဝင်စစ်ရေယာဉ်များနှင့်ပတ်သက်သည့် စာရွက်စာတမ်းများအား လွှဲပြောင်းပေးအပ်ခဲ့သည်။
ထို့နောက် ဗိုလ်ချုပ်မှူးကြီးမင်းအောင်လှိုင်က စစ်ရေ ယာဉ်များတပ်တော်ဝင်နိုင်ရန် တပ်တော်ဝင်တံခွန်အလံများအား ကာကွယ်ရေးဦးစီးချုပ်(ရေ)ထံလွှဲပြောင်းပေး အပ်ပြီးနောက် တပ်တော်ဝင်စစ်ရေယာဉ်များဖြစ်သည့် ဖရီဂိတ်စစ်ရေယာဉ်ကြီး စစ်ရေယာဉ်(သာလွန်မင်း)နှင့် မြစ်တွင်းသွားဘက်စုံသုံးစစ်ရေယာဉ်(၄)စီးတို့အားကြည့်ရှုခဲ့သည်။
ထို့ပြင် ဗိုလ်ချုပ်မှူးကြီးမင်းအောင်လှိုင်သည် စစ်ရေ ယာဉ်(မုတ္တမ)ပေါ်ရှိ အလေးပြုခံစင်မြင့်မှနေ၍ ဂုဏ်ပြုတပ်ဖွဲ့၏အလေးပြုခြင်းကိုခံယူပြီး ဂုဏ်ပြုတပ်ဖွဲ့ကိုစစ်ဆေးပြီး ဂုဏ်ပြုတပ်ဖွဲ့၏အလေးပြုခြင်းကိုခံယူစဉ် စစ်ရေယာဉ်(ရန်တိုင်းအောင်)နှင့် စစ်ရေယာဉ်(ရန်ကြီးအောင်)တို့မှ အမြောက် ၂၁ ချက်ပစ်ဖောက်ပြီးအလေး ပြုခဲ့ကြသည်။
ထို့နောက် ဗိုလ်ချုပ်မှူးကြီးမင်းအောင်လှိုင်မှ တပ်တော်ဝင်စစ်ရေယာဉ်များတည်ဆောက်ခဲ့ချိန်က ပါဝင်ဆောင်ရွက်ခဲ့ကြသည့် အရာရှိ၊ စစ်သည်များအတွက် တပ်မတော်ကာကွယ်ရေးဦးစီးချုပ်၏ အထိမ်းအမှတ်တံဆိပ်နှင့် ဂုဏ်ပြုမှတ်တမ်းလွှာတို့ကိုပေးအပ်ခဲ့သည်။
ယနေ့ တပ်တော်ဝင်ခဲ့သည့် ဖရီဂိတ်စစ်ရေယာဉ်ကြီး စစ်ရေယာဉ်(သာလွန်မင်း)သည် တပ်မတော်(ရေ) ရေယာဉ်တည်ဆောက်မှုသမိုင်း၌ အရွယ်အစားအားဖြင့်အကြီးမားဆုံး ကိုယ်တိုင်တည်ဆောက်၍တပ်တော်ဝင်နိုင်ခဲ့သည့် စစ်ရေယာဉ်ဖြစ်ကာ အချိန် တစ်လကျော်အတွင်း စုစုပေါင်းခုတ်မောင်းချိန်(၂၇၉)နာရီ၊ ခရီးအကွာအဝေးရေမိုင်(၃,၄၁၈)မိုင် ခရီးရှည်စမ်းသပ်မောင်းနှင်ခဲ့ပြီး စမ်းသပ်မောင်းနှင်သည့်ခရီးစဉ်အတွင်း စံချိန်စံညွှန်းပြည့်မီမှုဆိုင်ရာ စမ်းသပ်မောင်းနှင်ခြင်းများ၊ ရေယာဉ်၌တပ်ဆင်ထားသည့် ကိရိယာများအလိုက် သတ်မှတ်စံချိန်စံညွှန်းများအတိုင်း အသုံးပြုနိုင်မှုအားစမ်းသပ်ခြင်းတို့ကိုဆောင်ရွက်ခဲ့ပြီးဖြစ်သည်။
