ဂိုး ၉၀၀ ပြည့် သွင်းနိုင်ဖို့ ၁ ဂိုးတည်းသာ လိုတော့တဲ့ လီယွန်နယ်မက်ဆီ
====================
လီယွန်နယ်မက်ဆီဟာ ဒီစီယူနိုက်တက်အား အင်တာမိုင်ယာမီက အနိုင်ရတဲ့ပွဲတွင် ဂိုးသွင်းယူနိုင်ခဲ့ပြီးနောက် ကစားသမားဘဝ ဂိုး ၉၀၀ ပြည့်သွင်းယူနိုင်ရန် ၁ ဂိုးတည်းသာ လိုတော့တဲ့ အခြေအနေသို့ ရောက်ရှိလာခဲ့ပါတယ်။
အင်တာမိုင်ယာမီအသင်းခေါင်းဆောင်ဟာ ဒီစီယူနိုက်တက်အား ၂-၁ ဖြင့် အနိုင်ရတဲ့ပွဲရဲ့ ပထမပိုင်း ၂၇ မိနစ်တွင် အသင်းရဲ့ ဒုတိယဂိုးကို သွင်းယူပေးခဲ့တာလည်း ဖြစ်ပါတယ်။
၂၀၂၃ ခုနှစ် ဇူလိုင်လတွင် မေဂျာလိဂ်သို့ ရောက်လာခဲ့တဲ့ Ballon d'Or ၈ ကြိမ်ရ မက်ဆီဟာ အင်တာမိုင်ယာမီအတွက် ဂိုး ၈၀ သွင်းယူထားနိုင်ပြီးလည်း ဖြစ်ပါတယ်။
မက်ဆီဟာ ဘာစီလိုနာအတွက် ၆၇၂ ဂိုး၊ ပီအက်စ်ဂျီအတွက် ၃၂ ဂိုးနှင့် ကမ္ဘာ့ဖလား ၃ ကြိမ် ချန်ပီယံ အာဂျင်တီးနားအတွက် ၁၁၅ ဂိုးသွင်းပေးထားပါတယ်။
မက်ဆီဟာ လာမယ့် မတ်လ ၁၁ ရက်နေ့ နက်စ်ဗီးလ်နှင့်ပွဲစဉ်တွင် ကစားသမားဘဝ ဂိုး ၉၀၀ ပြည့် သွင်းယူနိုင်ရေး ကြိုးပမ်းရပါမယ်။
မက်ဆီဟာ ကစားသမားဘဝ ဂိုး ၉၀၀ ပြည့် သွင်းနိုင်ဖို့ ၁ ဂိုးတည်းသာ လိုတော့မှုနှင့်အတူ ကာလရှည်ကြာ ပြိုင်ဘက် ခရစ္စတီယာနိုရော်နယ်ဒိုနှင့်အတူ ပရော်ဖက်ရှင်နယ်ကစားသမားဘဝ ဂိုး ၉၀၀ ပြည့်သွင်းနိုင်သူအဖြစ် သမိုင်းမှတ်တိုင်စိုက်ထူလာနိုင်တော့မှာလည်း ဖြစ်ပါတယ်။
ခရစ္စတီယာနိုရော်နယ်ဒိုဟာ ၂၀၂၄ ခုနှစ် စက်တင်ဘာလတုန်းက ခရိုအေးရှားနှင့်ပွဲမှာ ဂိုးသွင်းယူပြီးနောက် ကစားသမားဘဝ ဂိုး ၉၀၀ ပြည့်သွင်းနိုင်ခဲ့ပါတယ်။ ယူနိုက်တက်နှင့် ရီးရဲလ်မက်ဒရစ်ဂန္ထဝင်ဟာ လက်ရှိအချိန်တွင် ပရော်ဖက်ရှင်နယ်ကစားသမားဘဝ ၉၆၅ ဂိုးသွင်းယူထားပြီး ဂိုးတစ်ထောင်ပြည့် သွင်းယူနိုင်ရေး ကြိုးပမ်းနေပါတယ်။
