တစ်နေ့ ၁၆ နာရီအထိ အလုပ်လုပ်ရမှုအတွက် နေမာကို တရားစွဲဆိုလာတဲ့ ဘရာဇီးစားဖိုမှူး
=================
နေမာရဲ့ အထူးသီးသန့်စားဖိုမှူးဟာ အလုပ်ချိန်များစွာ အလုပ်လုပ်ရမှု၊ ကစားသမားနှင့် သူငယ်ချင်းများအတွက် အစားအသောက် ချက်ပြုတ်ရာမှ ဒဏ်ရာများစွာ ရရှိမှုတို့အတွက် တရားစွဲဆိုမှု ပြုလုပ်လာပါတယ်။
အသက် ၃၄ နှစ်ရှိ နေမာဟာ ဒူးအရွတ်ဒဏ်ရာကြောင့် ကာလရှည်ကြာ အနားယူရပြီးနောက် ဆော်ဒီကလပ် Al-Hilal နှင့် စာချုပ်ဖျက်သိမ်းကာ ပြီးခဲ့တဲ့နှစ်မှ စတင်ပြီး ကစားသမားဘဝစတင်ရာ ဆန်းတို့စ်တွင် ကစားလာသူ ဖြစ်ပါတယ်။
ပီအက်စ်ဂျီစူပါစတားဟာ ဘရာဇီးသို့ ပြန်ရောက်လာပြီးနောက် ရီယိုဒီဂျနဲလ်ရိုးရှိ မန်ဂါရာတီဂါမြူနီစပယ်တွင် နေအိမ်နှစ်လုံး ပိုင်ဆိုင်ထားကာ ယင်းတွင် အခြေချနေထိုင်နေပါတယ်။
ယင်းတွင် နေထိုင်နေစဉ်အတွင်း နေမာဟာ အထူးသီးသန့်စားဖိုမှူးအဖြစ် ကာဆာဟိုတယ်ပေါ်တိုဘယ်လိုအား ၂၀၂၅ ခုနှစ် ဇူလိုင်လမှ ယခုနှစ် ဖေဖော်ဝါရီလအထိ ငှားရမ်း အသုံးပြုခဲ့ပါတယ်။
ယနေ့တွင် ဘရာဇီးသတင်းစာ Metropoles ရဲ့ဖော်ပြလာမှုအရ သူမဟာ နေမာအတွက် အလုပ်လုပ်စဉ်အတွင်း တစ်ရက်လျှင် ၁၆ နာရီအထိ အလုပ်လုပ်ခဲ့ရသလို နေ့စဉ် သူငယ်ချင်းနှင့်မိသားစုဝင်ပေါင်း ၁၅၀ တို့အတွက် တည်ခင်းကျွေးမွေးခဲ့ရကြောင်း ဆိုလာပါတယ်။
သူမဟာ နေမာရဲ့ ငှားရမ်းခန့်အပ်ခြင်းခံရစဉ်တုန်းက တစ်နေ့လျှင် နံနက် ၇ နာရီမှ ညနေ ၅ နာရီအထိ တနင်္လာနေ့မှ ကြာသပတေးနေ့အထိသာ အလုပ်လုပ်ရမယ်လို့ ပါဝင်ပေမယ့်လည်း တကယ်တမ်းတွင် ညနေ ၁၁ နာရီ သို့မဟုတ် သန်းခေါင်အချိန်အထိ အလုပ်လုပ်ရသလို နားရက်များတွင်လည်း အလုပ်လုပ်ရတယ်ဆိုပြီး ဒေသတွင်းအလုပ်သမားတရားရုံးတွင် တိုင်ကြားလာပါတယ်။
ဒါ့အပြင် သူမက ၁၀ ကီလိုအလေးချိန် အသားအိတ်များကို ထမ်းခဲ့ရသလို စူပါမားကက်များတွင် ဈေးဝယ်ချိန်တွင်လည်း အလွန်လေးလံတဲ့ ပစ္စည်းများ ထမ်းပိုးခဲ့ရကာ ဒဏ်ရာများ ရရှိခဲ့ကြောင်းလည်း ဆိုထားပါတယ်။
သူမဟာ နေမာထံတွင် အလုပ်လုပ်စဉ်တုန်းက တစ်လလုပ်ခ ပေါင် ၁၀၆၅ ဖြင့် အလုပ်လုပ်ခဲ့တာ ဖြစ်ပြီး နစ်နာကြေး ပေါင် ၃၇၅၄၄ ရရှိရေးအတွက် တရားစွဲဆိုလာတာပါ။
နေမာဟာ ယင်းအမျိုးသမီးစားဖိုမှူးအား ကြားခံအဖွဲ့အစည်းတစ်ခုထံမှ တဆင့် ထပ်ဆင့် ငှားရမ်းခဲ့တာပါ။
နေမာဟာ မကြာသေးမီတုန်းက ဆန်းတို့စ်တွင် ယခုနှစ်အကုန်အထိ ရှိနေမယ့် စာချုပ်အား သက်တမ်းတိုးချုပ်ဆိုခဲ့ပြီး တစ်နှစ်လုပ်ခ ပေါင် ၁၁.၈ သန်း ရရှိနေသူလည်း ဖြစ်ပါတယ်။
