ဗလက္ကာယမှုဖြင့် ထောင်ဒဏ် ၁၀ နှစ်ကျော် ကျခံရမယ့်အရေးနှင့် ရင်ဆိုင်နေရတဲ့ လာလီဂါတိုက်စစ်မှူးရာဖာမီယာ
=====================
အယ်ချီတိုက်စစ်မှူးရာဖာမီယာဟာ အသက် ၂၁ နှစ်အရွယ် အမျိုးသမီးတစ်ဦးအား ၂၀၂၄ ခုနှစ် စက်တင်ဘာလတုန်းက ဗလက္ကာယပြုကျင့်ခဲ့မှုအတွက် ထောင်ဒဏ် ၁၀ နှစ်ကျော် ချမှတ်ရန် အစိုးရရှေ့နေရဲ့ တောင်းဆိုခြင်းခံလာရပါတယ်။
ရာဖာမီယာဟာ ဗလင်စီယာအသင်းတွင် အငှားဖြင့် သွားရောက် ကစားနေစဉ် အထက်ပါ အဖြစ်အပျက် ဖြစ်ပျက်ခဲ့တာ ဖြစ်ပြီး တရားရင်ဆိုင်နေရကာ ကစားသမားဘဝ အဆုံးသတ်လာရမယ့်ကိန်း ဆိုက်နေပါတယ်။
Las Provincias က စပိန်အရပ်ဘက်ရှေ့နေက အသက် ၂၈ နှစ်ရှိ တိုက်စစ်မှူးမှာ လိင်ပိုင်းဆိုင်ရာ အတင်းဓမ္မကျူးလွန်မှု ပြုလုပ်ခဲ့ပြီး နစ်နာသူမှာ ဒဏ်ရာရရှိခဲ့ကာ ဗလက္ကာယမှုဖြင့် ထောင်ဒဏ် ၉ နှစ်၊ ဒဏ်ရာအနာတရ ရစေမှုအတွက် ထောင်ဒဏ် ၁၈ လ ချမှတ်ရန် တရားရုံးသို့ လျှောက်ထားလာတာလည်း ဖြစ်ပါတယ်။
ရာဖာမီယာဟာ အထက်ပါ အမှုအား ၂၀၂၄ ခုနှစ် စက်တင်ဘာလအစောပိုင်းတုန်းက ကျူးလွန်ပြီးနောက် နေအိမ်တွင်ပင် ဖမ်းဆီးခြင်းခံခဲ့ရပါတယ်။
ယင်းအမှုမှာ ၂၀၂၅ ခုနှစ် အောက်တိုဘာကတည်းက တရားရုံးသို့ ရောက်လာခဲ့တာပါ။
ရာဖာမီယာအနေဖြင့် အမှုအား စစ်ဆေးနေစဉ်အတွင်း ယင်းအမျိုးသမီးနှင့် မီတာ ၅၀၀ အကွာတွင် နေရန် ၁၃ နှစ် ချမှတ်ခံခဲ့ရသလို ကျူးလွန်ပါက ထောင်ဒဏ် ၇ နှစ် ချမှတ်ခံရမယ့် အရေးနှင့်လည်း ရင်ဆိုင်နေရပါသေးတယ်။
ဒါ့အပြင် အစိုးရရှေ့နေက ရာဖာမီယာအနေဖြင့် နစ်နာသူအား စိတ်ပိုင်းနှင့်ရုပ်ပိုင်း ထိခိုက်နစ်နာမှုများအတွက် နစ်နာကြေး ယူရို ၆၄၀၀၀ ပေးဆောင်ရန်လည်း ဆိုထားပါတယ်။
တဖက်တွင် ရာဖာမီယာကမူ အမှုနှင့်ပတ်သက်ပြီး တစုံတရာ စိုးရိမ်ပူပန်ခြင်းမရှိဘဲ တရားရုံးဘက်က ဆုံးဖြတ်ချက်ချမှတ်လာမယ့်အချိန်အား စိတ်အေးအေးဖြင့် စောင့်ဆိုင်းနေပါတယ်။
ရာဖာမီယာဟာ မကြာသေးမီတုန်းက အက်စ်ပန်ညိုနှင့် ကစားတဲ့ ပွဲတွင် အက်စ်ပန်ညိုကစားသမားအိုမာအယ်ဟီလာလီကို လူမျိုးရေးခွဲခြားဆက်ဆံမှု ပြုလုပ်ခဲ့ကြောင်း စွပ်စွဲခြင်းခံခဲ့ရပါသေးတယ်။ အက်စ်ပန်ညိုဘက်က ယင်းကို တိုင်ကြားထားပေမယ့်လည်း သက်သေအထောက်အထားခိုင်လုံစွာ တင်ပြထားနိုင်ခြင်း မရှိကြောင်းလည်း သိရပါတယ်။
