ကမ္ဘာ့ဖလားခြေစစ်ပွဲ ကျပြီးနောက် လုပ်ခလျှော့ယူရန် ငြင်းဆိုကာ နည်းပြရာထူးမှ နုတ်ထွက်လာတဲ့ ယူနိုက်တက်ဂန္ထဝင်
====================
ဒွိုက်ယော့ခ်ဟာ ထရီနီဒတ်နှင့် တိုဘာဂိုအား ကမ္ဘာ့ဖလားခြေစစ်ပွဲ အောင်မြင်အောင် စွမ်းဆောင်နိုင်ခဲ့ခြင်း မရှိပြီးနောက် လုပ်ခလျှော့ယူရန် ငြင်းဆိုကာ နည်းပြချုပ် ရာထူးမှ နုတ်ထွက်လာပါတယ်။
ယူနိုက်တက်ဂန္ထဝင်တိုက်စစ်မှူးဟာ ၂၀၀၆ ခုနှစ်တုန်းက ထရီနီဒတ်နှင့် တိုဘာဂိုအား ကမ္ဘာ့ဖလားခြေစစ်ပွဲအောင်မြင်အောင် စွမ်းဆောင်ခဲ့သူ ဖြစ်ပြီး ၂၀၂၄ ခုနှစ်မှ စတင်ကာ ထရီနီဒတ်နှင့်တိုဘာဂိုနည်းပြအဖြစ် ဆောင်ရွက်လာသူ ဖြစ်ပါတယ်။
ဒါပေမယ့် ဒွိုက်ယော့ခ်ဟာ နည်းပြအဖြစ်တော့ ထရီနီဒတ်နှင့် တိုဘာဂိုအား ကမ္ဘာ့ဖလားခြေစစ်ပွဲအောင်မြင်အောင် စွမ်းဆောင်နိုင်ခဲ့ခြင်း မရှိပါဘူး။
ယခုအခါ ထရီနီဒတ်နှင့် တိုဘာဂိုဘောလုံးအဖွဲ့ချုပ်က ၎င်းတို့ဘက်မှ စာချုပ်သစ် ကမ်းလှမ်းခဲ့ပေမယ့်လည်း သဘောတူညီမှု ရရှိခဲ့ခြင်း မရှိမှုနှင့်အတူ ဒွိုက်ယော့ခ်မှာ နည်းပြချုပ်ရာထူးမှ နုတ်ထွက်သွားပြီ ဖြစ်ကြောင်း ကြေညာလာပါတယ်။
ဒါပေမယ့်လည်း ထရီနီဒတ်နှင့် တိုဘာဂိုဘောလုံးအဖွဲ့ချုပ်က ဒွိုက်ယော့ခ်အတွက် တံခါးဖွင့်ထားဆဲ ဖြစ်ကြောင်းလည်း ဆိုသွားပါတယ်။
ဒွိုက်ယော့ခ်ဟာ ကစားသမားဘဝတုန်းက ထရီနီဒတ်နှင့် တိုဘာဂိုအတွက် ၇၂ ပွဲကစားခဲ့ရာတွင် ၁၈ ဂိုးသွင်းယူပေးနိုင်ခဲ့သူလည်း ဖြစ်ပါတယ်။
ဒွိုက်ယော့ခ်ဟာ ၂၀၀၉ ခုနှစ်တွင် ကစားသမားဘဝမှ အနားယူပြီးနောက် ၂၀၂၂ ခုနှစ်တွင် ဩစတြေးလျကလပ် Macarthur FC အား ကိုင်တွယ်ကာ နည်းပြလောကသို့ ဝင်ရောက်ခဲ့ပါတယ်။
သူဟာ ပထမဆုံးရာသီတွင် Macarthur FC အား Australia Cup ဆွတ်ခူးနိုင်အောင် ဦးဆောင်ခဲ့ပေမယ့်လည်း ၂၀၂၃ ခုနှစ် ဇန်နဝါရီလတွင် ကလပ်အား ရပ်ကွက်အသင်းလို့ ဝေဖန်ပြောဆိုမှုအတွက် ထုတ်ပယ်ခြင်းခံခဲ့ရပါတယ်။
သူဟာ ထုတ်ပယ်မှုအား မကျေမနပ်ဖြစ်ကာ အားကစားသမာဓိခုံရုံးတွင် တိုင်ကြားချက်ဖွင့်လှစ်ခဲ့ရာ နစ်နာကြေး ပေါင် ၁၅၇၃၇၄ ရရှိခဲ့ပါတယ်။
