မြန်မာ–ဖိလစ်ပိုင် ပြောင်းတင်ပို့မှုမြှင့်တင်ရေး ကုန်သွယ်မှုစာချုပ် လက်မှတ်ရေးထိုး

မြန်မာ–ဖိလစ်ပိုင် ပြောင်းတင်ပို့မှုမြှင့်တင်ရေး ကုန်သွယ်မှုစာချုပ်ကို ဖေဖော်ဝါရီ ၂၇ ရက်က မနီလာမြို့တွင် လက်မှတ်ရေးထိုးခဲ့ကြောင်း သိရသည်။

အဆိုပါ သဘောတူညီမှုစာချုပ်ကို မြန်မာနိုင်ငံဘက်မှ မြန်မာနိုင်ငံ ပြောင်းလုပ်ငန်းအသင်း (MCIA) နှင့် ဖိလစ်ပိုင်နိုင်ငံဘက်မှ ဖိလစ်ပိုင် နိုင်ငံတကာကုန်သွယ်ရေး ကော်ပိုရေးရှင်း (PITC) တို့အကြား ချုပ်ဆိုခဲ့ခြင်းဖြစ်ပြီး မြန်မာ့ပြောင်းသီးနှံအား ဖိလစ်ပိုင်နိုင်ငံသို့ ပိုမိုတိုးမြှင့်တင်ပို့နိုင်ရေးကို အဓိက ရည်ရွယ်ထားကြောင်း မြန်မာ့ကုန်သွယ်မှုမြှင့်တင်ရေးအဖွဲ့ထံမှ သိရသည်။

လက်မှတ်ရေးထိုးပွဲ အခမ်းအနားသို့ မြန်မာကုန်သွယ်မှုမြှင့်တင်ရေးအဖွဲ့ ညွှန်ကြားရေးမှူးချုပ် ဒေါက်တာထိန်လင်း ဦးဆောင်သည့် ကိုယ်စားလှယ်အဖွဲ့နှင့် ဖိလစ်ပိုင်နိုင်ငံတကာကုန်သွယ်ရေးကော်ပိုရေးရှင်းမှ တာဝန်ရှိသူများ တက်ရောက်ခဲ့ကြသည်။

ယခုသဘောတူညီမှုမှတစ်ဆင့် နှစ်နိုင်ငံအကြား ကုန်သွယ်ရေးပူးပေါင်းဆောင်ရွက်မှုကို တိုးမြှင့်နိုင်မည်ဖြစ်ပြီး စိုက်ပျိုးရေးတန်ဖိုးကွင်းဆက်များကို အားကောင်းစေရန်နှင့် နှစ်နိုင်ငံလုံးရှိ စက်မှုလုပ်ငန်းအကျိုးတူပါဝင်သူများအတွက် ဈေးကွက်အခွင့်အလမ်းအသစ်များ ဖော်ထုတ်နိုင်မည်ဖြစ်ကြောင်း သိရသည်။

ထို့ပြင် မြန်မာနိုင်ငံအနေဖြင့် ကုန်သွယ်မှုလွယ်ကူချောမွေ့ရေးကို မြှင့်တင်နိုင်မည်ဖြစ်ပြီး နိုင်ငံတကာချိတ်ဆက်မှုများ တိုးချဲ့နိုင်ခြင်းအပြင် ပြည်တွင်းလုပ်ငန်းရှင်များအတွက် စီးပွားရေးအခွင့်အလမ်းများ ဆက်လက်ဖန်တီးနိုင်မည်ဟုလည်း သိရသည်။