ရေနံတင်သင်္ဘောတစ်စင်း ဟော်မုဇ်ရေလက်ကြားကို ဖြတ်သန်းသွား

အီရန်စစ်ပွဲစတင်ခဲ့ပြီးနောက် အရှေ့အလယ်ပိုင်းရှိ သင်္ဘောတင်ပို့များကို အနှောင့်အယှက်ဖြစ်နေခဲ့ချိန်တွင် ရေနံတင်သင်္ဘောတစ်စင်းသည် အင်္ဂါနေ့က ဟော်မုဇ်ရေလက်ကြားကို ဖြတ်သန်းခုတ်မောင်းခဲ့သည်ဟု ရေကြောင်းကုန်သွယ်ရေးသတင်းရင်းမြစ်များနှင့် သင်္ဘောခြေရာခံအချက်အလက်များအရ သိရသည်။

တူးမြောင်းဖြတ် Suezmax ရေနံတင်သင်္ဘောဖြစ်သော Pola သည် ရေလက်ကြားကို ချဉ်းကပ်လာချိန်ဖြစ်သော မတ်လ ၂ ရက်နေ့အနှောင်းပိုင်းတွင် သင်္ဘော၏ အေအိုင်အက်စ် ခြေရာခံကိရိယာကို ပိတ်ပစ်ခဲ့ပြီး ယင်းနောက် မတ်လ ၃ ရက်နေ့တွင် အဘူဒါဘီကမ်းလွန်၌ ပြန်ပေါ်လာကြောင်း LSGE အချက်အလက်တွင် ဖော်ပြသည်။

ထိုသင်္ဘောသည် ထိုင်းနိုင်ငံအတွက် အဘူဒါဘီမာဘန်ရေနံစိမ်းတင်ဆောင်ရန် Jebel Dhanna ဆိပ်ကမ်းသို့ ဦးတည်ခုတ်မောင်းနေခြင်းဖြစ်ကြောင်း အမည်မဖော်လိုသည့် ကုန်သွယ်သတင်းရင်းမြစ်နှစ်ခုက ပြောကြားခဲ့သည်။

သင်္ဘောကို စီမံခန့်ခွဲသော Dynacom Tankers ကို ရုံးချိန်အတွင်း ဆက်သွယ်ကာ မှတ်ချက်တောင်းခဲ့သော်လည်း လတ်တလောတွင် ဆက်သွယ်၍ မရခဲ့ဟု သိရသည်။

အီရန်အပေါ် အမေရိကနှင့် အစ္စရေးတို့၏ စစ်ဆင်နွှဲမှုကြောင့် အရှေ့အလယ်ပိုင်းမှ စွမ်းအင်တင်ပို့မှုများ ရပ်တန့်သွားခဲ့ပြီး တေရန်သည် သင်္ဘောများနှင့် စွမ်းအင်အဆောက်အအုံများကို တိုက်ခိုက်ခဲ့ကာ ပင်လယ်ကွေ့ ရေကြောင်းသွားလာမှုကို ပိတ်ပစ်ခဲ့သကဲ့သို့ ကာတာမှသည် အီရတ်အထိ နိုင်ငံများတွင် ရေနံထုတ်လုပ်မှုများ ရပ်ဆိုင်းသွားစေခဲ့သည်။

Vortexa သင်္ဘောခြေရာခံဒေတာများအရ ဇန်နဝါရီလမှစ၍ ၂၄ နာရီတစ်ရက်လျှင် ပျှမ်းမျှ ၂၄ စင်းနှုန်းဖြတ်သန်းခဲ့သော ရေလက်ကြားတွင် တိုက်ခိုက်မှုများစတင်ပြီး နောက်တစ်ရက်ဖြစ်သော မတ်လ ၁ ရက်နေ့၌ သင်္ဘောအရေအတွက်သည် လေးစင်းအထိ ကျဆင်းသွားခဲ့သည်။

Ref: အီးတီ