မြန်မာ့အရေးနှင့်ပတ်သက်၍ ထိုင်းက ပြင်သစ်ကို ရှင်းပြခဲ့

ပြင်သစ်နိုင်ငံက မြန်မာနိုင်ငံတွင် ဖြစ်ပေါ်တိုးတက် ပြောင်းလဲမှုများအပေါ် စိတ်ဝင်စားမှုထက်သန်ကြောင်းကို ဖော်ပြခဲ့ပြီး ထိုင်းနိုင်ငံကလည်း နယ်စပ်လုံခြုံရေးကို ကာကွယ်စောင့်ရှောက်ရန်နှင့် ဒေသတွင်းတည်ငြိမ်မှုကို မြှင့်တင်ရန် မြန်မာ့အရေးကို ဦးစားပေးလုပ်ဆောင်နေကြောင်း ထိုင်းနိုင်ငံခြားရေးဝန်ကြီး စီဟာဆက် ဖောင်ကက်ကောက ရှင်းလင်းပြောကြားခဲ့သည်။

အင်္ဂါနေ့က ဂျီနီဗာတွင် သတင်းထောက်များနှင့် စကားပြောရာ၌ တနင်္လာနေ့က ပြင်သစ်၏ ဥရောပနှင့် နိုင်ငံခြားရေးရာဝန်ကြီး ရွန်နို့ဝယ်လ်ဘားရိုနှင့် ၎င်းတို့ ဆွေးနွေးပွဲ၏ ရလဒ်များကို မစ္စတာ စီဟာဆက်က အလေးပေးပြောကြားခဲ့သည်။

အင်ဒို-ပစိဖိတ်ဒေသတွင် ပိုမိုတက်ကြွသော အခန်းကဏ္ဍမှ ပါဝင်လိုသည့် ပြင်သစ်၏ ဆန္ဒနှင့် ယင်းကိစ္စနှင့် စပ်လျဉ်း၍ ထိုင်းနိုင်ငံ၏ သံတမန်ရေးရာ ထိတွေ့ဆက်ဆံမှု တိုးမြင့်လာမှုအပေါ် အသိအမှတ်ပြုမှုကို ထင်ဟပ်စေသည့် နောက်ထပ်အဓိကအကြောင်းအရာမှာ မြန်မာနိုင်ငံဖြစ်သည်။

ယင်းအခြေအနေနှင့် ပတ်သက်၍ ထိုင်းနိုင်ငံ၏ ရှုမြင်ပုံကို ပြင်သစ်က စူးစမ်းခဲ့ပြီး အထူးသဖြင့် ဖူးခက်တွင် မြန်မာနိုင်ငံခြားရေးဝန်ကြီး ဦးသန်းဆွေနှင့် မကြာသေးမီက ဆွေးနွေးမှုများအပြီးတွင်ဖြစ်ကြောင်း မစ္စတာ စီဟာဆက်က ပြောကြားခဲ့သည်။

ရွေးကောက်ပွဲတစ်ခုတည်းဖြင့် မြန်မာ၏ အကျပ်အတည်းကို ဖြေရှင်းနိုင်မည်မဟုတ်ဘဲ အားလုံးပါဝင်သော ဆွေးနွေးပွဲနှင့် စစ်မှန်သောငြိမ်းချမ်းရေးလုပ်ငန်းစဉ်ဖြင့် ဆက်လက်လုပ်ဆောင်ရမည်ဖြစ်ကြောင်းကို ထိုင်းနိုင်ငံက မြန်မာနိုင်ငံကို အသိပေး ပြောကြားခဲ့သည်ဟု ၎င်းကဆိုသည်။

နယ်နိမိတ်ထိစပ်နေမှုနှင့် မတည်ငြိမ်မှုက ထိုင်း၏ ပိုင်နက်နယ်မြေအပေါ် တိုက်ရိုက် အကျိုးသက်ရောက်မှုတို့ကြောင့် ထိုင်းနိုင်ငံအနေဖြင့် မြန်မာအာဏာပိုင်များ နှင့် လူနည်းစုတိုင်းရင်းသား အုပ်စုများနှင့် ထိတွေ့ဆက်ဆံမှုကို ရှောင်ရှား၍ မရကြောင်း မစ္စတာ စီဟာဆက်က ဆက်လက်ပြောကြားခဲ့သည်။

အွန်လိုင်းလိမ်လည်မှုများ၊ မူးယစ်ဆေးဝါးရောင်းဝယ်မှုနှင့် မြစ်များကို ထိခိုက်စေသော နယ်စပ်ဖြတ်ကျော် ပတ်ဝန်းကျင်ညစ်ညမ်းမှုအပါအဝင် နယ်စပ်ဒေသတ‌လျှောက်တွင် စိန်ခေါ်မှုမျိုးစုံနှင့် ရင်ဆိုင်နေရကြောင်း ၎င်းက ပြောကြားခဲ့ပြီး ထိုင်းနိုင်ငံ၏ ဦးတည်ချက်မှာ ငြိမ်းချမ်းရေး၊ တည်ငြိမ်ရေးနှင့် နယ်စပ်တလျှောက် ပုံမှန်ကုန်သွယ်မှုကို ပြန်လည်ထူထောင်ရန်ဖြစ်ကြောင်းဆက်လက်ပြောကြားခဲ့သည်။

ထိုင်းနိုင်ငံသည် မြန်မာအစိုးရနှင့် ပူးပေါင်းဆောင်ရွက်နေသည် သို့မဟုတ် အာဆီယံ ဘုံသဘောတူညီချက် ၅ ရပ်ကို စွန့်လွှတ်သွားပြီဟူသော ယူဆချက်များကိုမူ ၎င်းက ပယ်ချသွားခဲ့သည်။