၂ ရက်အတွင်း စားလို့ရမယ့် မုန်လာပိုးတီချဉ်စိမ်နည်း
ချစ်တို့ရေ... မုန်လာဥ အချဉ်မလုပ်တတ်သူတွေအတွက် ပြုလုပ်နည်းလေး မျှဝေပေးပါရစေရှင့်။
၁။ မုန်လာဥကို ရေစင်အောင် အရင်ဆေးကြောရပါမယ်။
(သဲနဲ့ ပိုးမွှားတွေ ကင်းစင်သွားအောင်လို့ပါ)
၂။ မုန်လာဥကို မိမိကြိုက်သလို လှီးဖြတ်ပါ။
(ပိုးတီအရစ်လေးဖြစ်ဖြစ်၊ အကွင်းလိုက်ဖြစ်ဖြစ် လှီးလို့ရပါတယ်)
၃။ လှီးပြီးသားကို ဆားရေ (သို့မဟုတ်) ရေနွေးနဲ့ ခဏစိမ်ပေးပါ။
(ဒါမှ မုန်လာဥသား နူးညံ့ပြီး စားလို့ကောင်းမှာပါ)
၄။ မုန်လာဥပြင်နေတုန်းမှာ ထမင်းပျော့လေး တစ်ဗူးခန့် ကြိုထားပါ။
(နို့ဆီဗူးနဲ့ ချိန်ပြီး ကြိုပေးရပါမယ်)
၅။ အားလုံးအဆင်သင့်ဖြစ်ရင် မုန်လာဥထဲ ဆားအနည်းငယ်နဲ့ ထမင်းပျော့ကို ထည့်ပြီး ခပ်ဖွဖွလေး နယ်ပေးပါ။
(လက်နဲ့ အသာအယာ နှံ့စပ်အောင် လုပ်ပေးရုံပါပဲ၊ အရမ်းနယ်ဖို့ မလိုပါဘူး)
ပြုလုပ်ပြီး နောက် ၂ ရက် ဆိုရင် ငရုတ်သီးစပ်စပ်၊ နံနံပင်လေးနဲ့သုတ်ပြီး မြိန်ယှက်စွာ စားသုံးနိုင်တဲ့ မုန်လာဥချဉ်လေး ရပါပြီ။
တကျွပ်ကျွပ်နဲ့ စားမြိန်စေမယ့် မုန်လာပိုးတီသုတ်နည်း
မုန်လာဥကို မပြတ်စေဘဲ နှစ်ဖက်လုံးကို စောင်းစောင်းလေးတွေ လှီးပေးပါ။
ဆားနယ်ပြီး ၁၅ မိနစ်ခန့် နှပ်ထားကာ ရေစင်အောင်ဆေးပြီး ရေညှစ်ထုတ်ပါ။
မုန်လာဥ ၅ ဥအတွက် ရှာလကာရည် (၃) ဇွန်း၊ သကြား (၁) ဇွန်း ထည့်ပြီး တစ်ညသိပ် စိမ်ထားပါ။ (အရသာနှံ့အောင် ခဏခဏ လှန်ပေးပါ)
မနက်ကျရင် ကြက်သွန်နီဆီချက်လေးထည့်၊ နှမ်းလေးဖြူးပြီး နယ်လိုက်ရင် တကျွပ်ကျွပ်နဲ့ ချိုချဉ်အရသာရှိတဲ့ မုန်လာပိုးတီသုတ်လေး ရပါပြီ။
