ပုသိမ်မြို့ ဘိုးဘွားရိပ်သာတွင် အဘိုးအဘွား ၃၇ ဦးစောင့်ရှောက်ထားရှိပြီး အလှူရှင်များ၏ နေ့စဥ်လှူဒါန်းမှုများဖြင့် ရပ်တည်နေ

ပုသိမ်မြို့ ဘိုးဘွားရိပ်သာတွင် အဘိုးအဘွား ၃၇ ဦးစောင့်ရှောက်ထားရှိပြီး အလှူရှင်များ၏ နေ့စဥ်လှူဒါန်းမှုများဖြင့် ရပ်တည်နေကြောင်း အဆိုပါဘိုးဘွားရိပ်သာမှ သိရသည်။

ပုသိမ်မြို့၊ ဘိုးဘွားရိပ်သာကို စက်တော်ရာဘုရားဝန်းအတွင်း ပုသိမ်မြို့ခံ သူဌေးများနှင့် ပြည်သူများ စုပေါင်းလှူဒါန်းမှုဖြင့် ၁၉၈၂ ခုနှစ်တွင် စတင်ဆောက်လုပ်ခဲ့ကာ အဘိုး၊ အဘွား ၅၀ဦးထိ လက်ခံနိုင်ကြောင်း သိရသည်။

လက်ရှိအချိန်အတွင် အဘိုး ၁၃ဦးနှင့် အဘွား၂၄ဦး လက်ခံစောင့်ရှောက်ပေးထားပြီး တစ်နေ့လျှင် ထမင်းနှစ်ကြိမ်၊အဆာပြေအဟာရ နှစ်ကြိမ်ကျွေးမွေးလျက်ရှိကြောင်း၊ ယင်းသို့ကျွေးမွေးသည့် တစ်နေ့တာကုန်ကျစားရိတ်အနေဖြင့် ကျပ် ၄၅၀၀၀၀ ကျသင့်ကြောင်း သိရသည်။

ဘိုးဘွားရိပ်သာသို့ အလှူရှင်များမှ တစ်နေ့စာ လှူဒါန်းမှုများရှိသကဲ့သို့ တစ်ကြိမ်စာအနေဖြင့်သာ တတ်နိုင်သမျှ လှူဒါန်းမှုများလည်းရှိကြောင်း၊ အကျွေးအမွေးအစီအစဥ်နှင့် ကုန်ကျစားရိတ်များကို တစ်ပတ်စာအစီအစဉ်နှင့် ဖော်ပြပေးထားကြောင်းသိရသည်။

ကျန်းမာရေးစောင့်ရှောက်မှုအနေဖြင့် အလှူရှင်များ၏လှူဒါန်းမှုကို ဆေးပဒေသာပင် စိုက်ထူပေးထားပြီး ပုံမှန်အားဖြင့် ဗုဒ္ဓဟူးနေ့တိုင်း သမားတော်များက လာရောက်ကြည့်ရှုစစ်ဆေးမှုများ ပြုလုပ်ပေးလေ့ရှိကာ
ဘိုးဘွားများ နာမကျန်းဖြစ်ပါက လာရောက်ကုသပေးလေ့ရှိကြောင်း သိရသည်။

ပုသိမ်ပြည်သူ့ဆေးရုံမှလည်း ဆေးရုံတက်ရောက်သည့်ရိပ်သာမှ ဘိုးဘွားများကို ဆေးအခမဲ့(foc) ဖြင့် ကုသပေးကြောင်းသိရသည်။