အမိုရမ်မှာ ယူနိုက်တက်သမိုင်းတွင် အရေးအပါဆုံးနည်းပြဖြစ်ခဲ့ပြီး မိုင်နူးအတွက်ပင် အကျိုးရှိစေခဲ့ကြောင်း ယူနိုက်တက်စတားဖွင့်ဟလာ
====================
ဒီယေဂိုဒါလော့က ရူဘင်အမိုရမ်မှာ ယူနိုက်တက်သမိုင်းတွင် အရေးအပါဆုံးနည်းပြဖြစ်ပြီး ကိုင်ဘီမိုင်နူးအတွက်ပင် အကျိုးများစွာ ရှိစေခဲ့ကြောင်း ဖွင့်ဟပြောကြားလာပါတယ်။
ယူနိုက်တက်နောက်တန်းအစွန်လူက အမိုရမ်မှာ အိုးထရက်ဖို့ဒ်တွင် ကလပ်ပိုမိုကောင်းမွန်ရေးအတွက် အစဉ်အလာများကို အပြောင်းအလဲပြုလုပ်ခဲ့ကြောင်း ပြောကြားလာတာပါ။
အမိုရမ်ဟာ ယူနိုက်တက်အား ၁၈ လကြာ ကိုင်တွယ်ခဲ့သူ ဖြစ်ပြီး ဇန်နဝါရီလအစောပိုင်းတုန်းက ကလပ်တာဝန်ရှိသူများအား ဝေဖန်ပြောဆိုမှု ပြုလုပ်ခဲ့ပြီးနောက် ထုတ်ပယ်ခြင်းခံခဲ့ရပါတယ်။
လခ်ရှောပြီးလျှင် ယူနိုက်တက်တွင် သက်တမ်းအရှည်ဆုံးကစားသမားဖြစ်တဲ့ ဒါလော့က "ရူဘင်က ဒီကလပ်သမိုင်းမှာ အရမ်းအရေးပါတဲ့သူတွေထဲက တစ်ဦးပါ။ လူတွေ ယုံချင်မှ ယုံလိမ့်မယ်။ ဒါပေမယ့် သူ ရောက်လာပြီးတဲ့နောက် လူတွေ မမြင်ရတဲ့အရာတွေ အများကြီး ပြောင်းလဲသွားတယ်။ သူက စည်းကမ်းရှိတဲ့ နေရာဖြစ်အောင် လုပ်ပေးခဲ့တယ်။ အဆင့်အတန်းအရမ်းမြင့်တယ်။ သူ အများကြီး ပြောင်းလဲဖို့ ကြိုးစားခဲ့တယ်။ သူ့နည်းလမ်းတွေမှာ အလျှင်အမြန်အံဝင်အောင် ကျွန်တော်တို့ လုပ်ခဲ့ကြရတယ်"လို့ ပြောကြားသွားပါတယ်။
အမိုရမ်ဟာ ယူနိုက်တက်အား ကိုင်တွယ်စဉ်အတွင်း ကွင်းတွင်း ကွင်းပြင်အပြုအမူ မကောင်းမွန်တဲ့ မားကပ်စ်ရက်ဖို့ဒ်နှင့် ဂါနာချိုတို့အား အသင်းမှ ကန်ထုတ်ခဲ့ပါတယ်။
ဆက်လက်ပြီး အသက် ၂၆ နှစ်ရှိ ဒါလော့က "ကျုပ်တို့ ကွင်းထဲမှာ ရလဒ်ကောင်းရအောင် မလုပ်နိုင်ခဲ့ကြဘူး။ ဒါပေမယ့် ရူဘင်က အခု ကျွန်တော်တို့ ရှိနေတဲ့ ကြီးကျယ်တဲ့ ကစားသမားအုပ်စုကို ဖန်တီးခဲ့တာပါ။ ကျွန်တော်တို့အသင်းကို ကြည့်လိုက်ရင် ကစားသမားသစ်တွေလည်း ကျွန်တော်တို့ကို မြှင်တင်ပေးနေတာ မြင်ရပါလိမ့်မယ်။ ဒါပေမယ့် ရလဒ်နဲ့ပဲ ဘာမဆို ဆုံးဖြတ်တာဆိုတော့ စိတ်မကောင်း ဖြစ်ရတယ်။ သူက ရောက်လာပြီး ချက်ချင်းဆိုသလို အရမ်းစည်းကမ်းသေဝပ်အောင် အဆင့်အတန်းမြင့်မားအောင် လုပ်ခဲ့တယ်။ ဒါပေမယ့် ပရီးမီးယားလိဂ်မှာက ကိုယ်ဘယ်လောက်ကောင်းလဲဆိုတာ သက်သေပြဖို့ အချိန်အလုံအလောက် မရပါဘူး။ ကံဆိုးစွာပဲ ကျွန်တော်တို့လည်း အောင်မြင်မှု မရခဲ့ဘူး"လို့ ပြောကြားသွားပါတယ်။
ဇန်နဝါရီလအစောပိုင်းတွင် အမိုရမ် ထုတ်ပယ်ခြင်းခံရပြီးနောက် ယူနိုက်တက်ကစားသမားအမြောက်အမြား အံ့ဩတုန်လှုပ်ခဲ့ကြပါတယ်။
တဖက်တွင် အမိုရမ် ထုတ်ပယ်မှုရဲ့ နောက်ဆက်တွဲ အကျိုးဆက်ကောင်းတစ်ခုကို ရရှိခဲ့တာက ကိုဘီမိုင်နူး ဖြစ်ပါတယ်။
မိုင်နူးဟာ အမိုရမ်လက်ထက်တွင် နေရာပျောက်နေခဲ့ပေမယ့် ယာယီနည်းပြမိုက်ကယ်ကာရစ်လက်ထက်မှာတော့ ပုံမှန်ပွဲထွက်ကစားခွင့် ရရှိကာ ခြေစွမ်းပြနေပါတယ်။
သူဟာ အမိုရမ်လက်ထက်တုန်းက ပရီးမီးယားလိဂ်တွင် ၁၇၁ မိနစ်သာ ကစားခွင့်ရသလို ပွဲထွက်ခွင့်လည်း မရခဲ့ပါဘူး။
ဆက်လက်ပြီး ဒါလော့က "ကိုဘီလည်း အခြားလမ်းတစ်ခုမှာ လျှောက်လှမ်းနိုင်တယ်။ အသက် ၂၀ နှစ်အရွယ်ဆိုတော့ ခက်ခဲတယ်။ ယူနိုက်တက်အတွက် ပွဲ ၈၀ ကစားလာတဲ့သူ၊ အင်္ဂလန်အတွက်လည်း ကစားလာရတဲ့သူဆိုတော့ ပိုဆိုးတာပေါ့။ ထိပ်ဆုံးသို့ ရောက်နေပြီးမှ ချက်ချင်းဆိုသလို ကစားခွင့်မရလာဘူး။ ကိုဘီဟာ ဒီအတွေ့အကြုံကို ဖြတ်သန်းခဲ့ရတယ်။ သူ ဒီဖြတ်သန်းမှုကနေ အကျိုးကျေးဇူးအများကြီး ရရှိလာမယ်လို့ထင်တယ်။ အခုဆို သူ အချိန်ပြည့်လေ့ကျင့်ခန်းဆင်းနေခဲ့တော့ အကျိုးကျေးဇူးခံနေရပြီ။ မကစားရတုန်းက လေ့ကျင့်ခန်းဆင်းခဲ့မှုတွေကို တန်ဖိုးထားတတ်သွားပြီ"လို့ ပြောကြားသွားပါတယ်။
