မြစ်ကြီးနားလေဆိပ် တိုက်ခိုက်ခံရပြီးနောက် လေယာဉ်ခရီးစဉ်များ ဖျက်သိမ်းထား

ဖေဖော်ဝါရီ ၂၁

ကချင်ပြည်နယ် ၊ မြစ်ကြီးနားလေဆိပ် တိုက်ခိုက်ခံရပြီးနောက် လေယာဉ်ခရီးစဉ်များ ဖျက်သိမ်းထားကြောင်း လေယာဉ်လက်မှတ်အရောင်းကိုယ်စားလှယ်တစ်ဦးက NP News ကို ပြောသည်။

ယမန်နေ့ (ဖေဖော်ဝါရီ ၂၀ ရက်) က မြန်မာအမျိုးသားလေကြောင်းလိုင်း(MNA) သည် ခရီးသည်များတင်ဆောင်ပြီး မြစ်ကြီးနားလေဆိပ်မှ မန္တလေးမြို့သို့ထွက်ခွာရန် ပြင်ဆင်နေစဉ် KIA နှင့် PDF အဖွဲ့များမှ FPV Suicide Drone များ အသုံးပြု၍ တိုက်ခိုက်ခဲ့ခြင်းသဖြင့် လေယာဉ်၏ ခေါင်းပိုင်း၊ ကိုယ်ထည်အလယ်ပိုင်း နှင့် နောက်မီးပိုင်းတို့တွင် ဗုံးစ ထိမှန်၍ အနည်းငယ်ပျက်စီးခဲ့ပြီး ထိခိုက်ဒဏ်ရာရရှိသူမရှိကြောင်း သိရသည်။

လက်ရှိတွင် လေယာဉ်ခရီးများစဉ်ဖျက်သိမ်းထားပြီး ဖေ့စ်ဘွတ်ခ်လူမှုကွန်ယက်စာမျက်နှာတွင်လည်း မြစ်ကြီးနားလေဆိပ် (၃)လပိတ်မည် ဖြစ်ကြောင်း ရေးသားဖြန့်ဝေမှုများရှိသော်လည်း NP News အနေဖြင့် အတည်ပြုနိုင်ခြင်းမရှိသေးပေ။

“ဒီနေ့ကတော့ Flight Cancel ပဲ။ မနက်ဖြန်ကတော့ မသိသေးဘူးရှင့်” ဟု လေယာဉ်လက်မှတ်အရောင်း ကိုယ်စားလှယ်တစ်ဦးက ပြောသည်။

ပြီးခဲ့သည့် (ဖေဖော်ဝါရီ ၁၂ ရက်)၊ နံနက်ပိုင်းကလည်း KIA နှင့် PDF ပူးပေါင်းအဖွဲ့များက FPV Suicide Drone များ အသုံးပြု၍ တိုက်ခိုက်မှုများ ရှိခဲ့သောကြောင့် မင်္ဂလာလေကြောင်းလိုင်း ၊ အဲသံလွင် လေကြောင်းလိုင်း ၊ မန်းရတနာပုံ လေကြောင်းလိုင်း နှင့် မြန်မာအမျိုးသားလေကြောင်းလိုင်း (မိုင်းဖုန်း) စသည့် ခရီးစဉ်များအား ဖျက်သိမ်းခဲ့ကြောင်း သိရသည်။