မြတ်မော်တင်စွန်းဘုရားပွဲတော် စတင်ကျင်းပ
မြတ်မော်တင်စွန်းဘုရားပွဲတော်ဖွင့်ပွဲ အခမ်းအနားကို ဖေဖော်ဝါရီ ၁၆ ရက်က ကျင်းပခဲ့ပြီး အမျိုးသားကာကွယ်ရေးနှင့်လုံခြုံရေးကောင်စီအဖွဲ့ဝင်မန်းငြိမ်းမောင်နှင့် တိုင်းဒေသကြီးအစိုးရအဖွဲ့ဝန်ကြီးချုပ် ဦးတင်မောင်ဝင်း တက်ရောက်ဖွင့်လှစ်ပေးခဲ့ကြောင်း သိရသည်။
အဆိုပါမြတ်မော်တင်စေတီဘုရားပွဲတော်ဖွင့်ပွဲအခမ်းအနားကို အမျိုးသားကာကွယ်ရေးနှင့် လုံခြုံရေးကောင်စီအဖွဲ့ဝင် မန်းငြိမ်းမောင်၊ တိုင်းဒေသကြီးဝန်ကြီးချုပ် ဦးတင်မောင်ဝင်း၊ သဲဖြူဆရာတော် ဘဒ္ဒန္တပညာဇောတ၊ မြတ်မော်တင် ကျောင်းတိုက်ဆရာတော် ဘဒ္ဒန္တသုဇာတ၊ သယံဇာ တရေးရာဝန်ကြီး ဦးအုန်းမြင့်တို့မှဖဲကြိုးဖြတ်ဖွင့်လှစ်ပြီး ဘုရားပွဲတော်မင်္ဂလာမုဒ်ဦးအား ဝန်ကြီးချုပ်နှင့်သဲဖြူဆရာတော်တို့မှ စက်ခလုပ်နှိပ်ဖွင့်လှစ်ပေးခြင်းနှင့် အမွှေးနံသာ ပတ်ဖျန်းခြင်းများပြုလုပ်ခဲ့ကြောင်း သိရသည်။
ထို့နောက် မြတ်မော်တင်စေတီရင်ပြင်ရှိ အနေကဇာဆောင်တွင် ပုသိမ်မြို့၊ ညောပင်သာကျောင်းတိုက်ဆရာတော် ဘဒ္ဒန္တ သောဘိတပါ သံဃာတော် (၄၅)ပါးတို့ မှ ဗုဒ္ဓါဘိသေကအနေဇာတင် ပရိတ် တရားတော်များရွတ်ဖတ်ခဲ့ပြီး သဲဖြူဆရာတော် ဘဒ္ဒန္တ ပညာဇောတမှ လှူဖွယ်ဝတ္ထုအစုစုတို့အား ရေစက်သွန်းချအမျှဝေခဲ့ကြကြောင်းသိရသည်။
ထို့နောက် လုံခြုံရေးကောင်စီ အဖွဲ့ဝင် မန်းငြိမ်းမောင်နှင့် တိုင်းဒေသကြီးဝန်ကြီးချုပ် ဦးတင်မောင်ဝင်းသည် မြတ်မော်တင်စေတီတောင်ခြေ ပင်လယ်ကမ်းစပ်တွင် နဂါးစာ ဖောင်မျှောလှူဒါန်းခြင်းများပြုလုပ်ခဲ့ကြပြီးနောက်ကျေးလက်ဒေသဖွံ့ဖြိုး တိုးတက်ရေးဦးစီးဌာနနှင့် ဒေသခံပြည်သူများ ပူးပေါင်းဖောက်လုပ်ထားသည့် ခမောက်မော်-သံကြိုးလမ်း ကျေးရွာချင်းဆက်ကွန်ကရစ်လမ်းဖွင့်ပွဲသို့ တက်ရောက်ခဲ့ကြောင်းသိရသည်။
