ငလျင်ဒဏ်သင့်လို့ ပြိုကျပျက်စီးခဲ့တဲ့ အဆောက်အဦတွေနဲ့ပတ်သက်ပြီး နစ်နာသူတွေအတွက် ဥပဒေဆိုင်ရာ ဆွေးနွေးမျှဝေခြင်း အခမ်းအနားကျင်းပ
ငလျင်ဒဏ်သင့်လို့ ပြိုကျပျက်စီးခဲ့တဲ့ အဆောက်အဦတွေနဲ့ ပတ်သက်ပြီး နစ်နာဆုံးရှုံးခဲ့ကြသူတွေ၊ အရောင်းအဝယ်ပြုလုပ်ခဲ့ကြတဲ့ အဆောက်အဦမြေရှင်နဲ့ ကန်ထရိုက်တွေရဲ့ကြားက အငြင်းပွားဖွယ်ရာ ဥပဒေတွေကို ဆွေးနွေး မျှဝေတဲ့အခမ်းအနားကို အောင်မြေသာစံမြို့နယ်၊ ၂၂ လမ်း၊ ၈၂ လမ်း ၈၃ လမ်းကြားမှာရှိတဲ့ ယူတိုးပီးယားဟိုတယ်မှာ ကျင်းပခဲ့ပါတယ်။
ပြီးခဲ့တဲ့ ၂၀၂၅ ခုနှစ် မတ်လ ၂၈ ရက်နေ့ကလှုပ်ခတ်ခဲ့တဲ့ ငလျင်ကြောင့် နောက်ဆက်တွဲ ပြဿနာတွေဖြစ်တဲ့ ကန်ထရိုက်နဲ့ မြေရှင်တွေရဲ့ စာချုပ်မှာ ပါလာတဲ့ ပြဿနာတွေ ဖြေရှင်းရေးအတွက် ဥပဒေအထောက်အကူပြုအဖွဲ့တွေနဲ့ ကြားဝင်ဖြေရှင်းပေးတယ် မပြေလည်ကြဘူး၊ မကြာခင်မှာလည်း လွှတ်တော်ပေါ်ပေါက်လာမှာဖြစ်တဲ့အတွက် ခိုင်မာတဲ့ ဥပဒေ တရပ် ပေါ်ထွက်လာဖို့ လွှတ်တော်မှာ တင်ပြနိုင်ဖို့ မြေပြင်မှာ ဘယ်လိုနစ်နာနေတဲ့ ပြည်သူတွေအတွက် အကောင်းဆုံးပြုလုပ်ဆောင်ရွက်ပေးဖို့ ရည်ရွယ်ပြီး ဒီအခမ်းအနားကို ပြုလုပ်ရတာဖြစ်တယ် လို့ အခမ်းအနားတာဝန်ခံ တရားလွှတ်တော်ရှေ့နေ ဦးနေဝင်းသန့် က ပြောပါတယ်။
အဲ့ဒီအခမ်းအနားမှာ ရန်ကုန် နဲ့ မန္တလေး က ရှေ့နေတွေနဲ့ အောင်မြေသာစံ ခရိုင်အုပ်ချုပ်ရေးမှူး ဒေါက်တာအောင်ဆွေ၊ မြို့နယ်စည်ပင်အုပ်ချုပ်ရေးမှူး ဦးလင်းဝင်းထွန်း၊ အိမ်ခြံမြေရောင်းဝယ်လုပ်ငန်းလုပ်ကိုင်သူများအသင်း ဥက္ကဋ္ဌ ဦးကြည်စိုး၊ မန္တလေးများ ရှေ့နေကြီးများအသင်း ဥက္ကဋ္ဌ ဦးဝမ်းမောင်၊ မြန်မာနိုင်ငံလွတ်လပ်သောရှေ့နေများ အသင်း ဥက္ကဋ္ဌ ဦးညွန့်ဝေ၊ ဆရာကြီး ဦးမြရဲ့ တပည့် ဦးလှကို တို့က အမှာစကားပြောကြားခဲ့ပါတယ်။
အခမ်းအနားကိုတော့ AL- HAADI CENTER - MYANMAR (လမ်းပြသူဗဟို- မြန်မာ) အသင်းက ကြီးမှူးကျင်းပတာဖြစ်ပြီး မန္တလေးနဲ့ ရန်ကုန်က ရှေ့နေကြီးတွေနဲ့ ဥပဒေဆိုင်ရာ ပညာပေးအဖွဲ့တွေ တက်ရောက်ခဲ့ပြီး နစ်နာသူ ပြည်သူတွေအတွက် ဥပဒေဆိုင်ရာ ပညာပေးနဲ့ အကြံပြုတာတွေ အတွက် အမေးအဖြေကဏ္ဍတွေ လုပ်ဆောင်ပေးခဲ့ပါတယ်။
ပညာရေး၊ ကျန်းမာရေး၊ ပြန်လည်ထူထောင်ရေး၊ မူးယစ်ဆေးပပျောက်ရေး၊ ဥပဒေအထောက်အကူပြု ကော်မတီတွေနဲ့၊ ဘာသာဝင် အချင်းချင်းကြားမှာ အငြင်းပွားဖွယ်ရာ ကိစ္စတွေကို ဖြေရှင်းညှိနှိုင်း ဆောင်းရွက်ပေးတဲ့ ကိစ္စတွေကို ဘာသာရေး လမ်းညွှန်ချက်နဲ့အညီ ဆောင်ရွက်ပေးနိုင်ဖို့ အမှတ် ၂၃၂၊ ပထမထပ်၊ ၈၁ လမ်း၊ ၂၀၂၁ လမ်းကြား၊ ပုလဲငွေရောင်ရပ်ကွက်၊ အောင်မြေသာစံမြို့နယ်၊ မန္တလေးမြို့မှာ ရှိတဲ့ လမ်းပြသူ ဗဟို - မြန်မာ အသင်းကို ဆက်သွယ်ပြီး အကူအညီတောင်းခံနိုင်တယ်လို့ သိရပါတယ်။
