ပရီးမီးယားလိဂ်တစ်လတာအကောင်းဆုံးနည်းပြဆုကို မိုက်ကယ်ကာရစ် ဆွတ်ခူး
======================
မိုက်ကယ်ကာရစ်ဟာ ယူနိုက်တက်ယာယီနည်းပြအဖြစ် ရလဒ်ကောင်းများ ဆက်တိုက် ရရှိအောင် စွမ်းဆောင်ပေးနိုင်ခဲ့ပြီးနောက် ဇန်နဝါရီလအတွက် ပရီးမီးယားလိဂ်တစ်လတာအကောင်းဆုံးနည်းပြဆုအား ဆွတ်ခူးလာပါတယ်။
မိုက်ကယ်ကာရစ်ဟာ ဇန်နဝါရီလ ၁၃ ရက်နေ့တွင် ယူနိုက်တက်ယာယီနည်းပြအဖြစ် ခန့်အပ်ခြင်းခံရပြီးနောက် မန်စီးတီး၊ အာဆင်နယ်၊ ဖူလ်ဟမ်၊ စပါးစ်တို့ကို အနိုင်ရရှိခဲ့ပြီး ဝက်စ်ဟမ်းနှင့် သရေကျကာ ရလဒ်ကောင်းများ ရယူပေးထားနိုင်ပါတယ်။
သူဟာ ယူနိုက်တက်အား ကိုင်တွယ်တဲ့ကာလတိုအတွင်း ရလဒ်ကောင်းများ ရယူပေးနိုင်မှုနှင့်အတူ အန်ဒိုနီအိုင်ရာအိုလာ၊ ရှောင်ဒိုက်ချီတို့အား ကျော်ဖြတ်ကာ ပရီးမီးယားလိဂ်တစ်လတာအကောင်းဆုံးနည်းပြဆုကို ဆွတ်ခူးလာပါတယ်။
မိုက်ကယ်ကာရစ်ဟာ ပရီးမီးယားလိဂ်တစ်လတာအကောင်းဆုံးနည်းပြဆုကို ဆွတ်ခူးနိုင်မှုကြောင့် သူ့အရည်အချင်းသက်သက်ကြောင့် မဟုတ်ကြောင်း ဆိုသွားပါတယ်။
ကာရစ်က "ကျွန်တော်တို့ တာထွက်အရမ်းကောင်းတယ်ဆိုတာ ဒီဆုက ပြသနေပါတယ်။ ဒါပေမယ့် အရိုးသားဆုံးပြောရရင် ဒါက ကျွန်တော့်အတွက်ချည်းသက်သက် မဟုတ်ပါဘူး။ အားလုံးကို တွေးမိပါတယ်။ ဝန်ထမ်းတွေ၊ နည်းပြအဖွဲ့ဝင်တွေ၊ နောက်ကွယ်က ပံ့ပိုးသူတွေ၊ ပြီးတော့ ကစားသမားတွေကြောင့်ပါ။ ဒီဆုက ကျွန်တော်တို့ တာထွက်အရမ်းကောင်းတာ ပြသနေတဲ့အတွက် အရမ်းဝမ်းသာပါတယ်"လို့ ပြောကြားသွားပါတယ်။
ယူနိုက်တက်ဟာ အက်ဖ်အေဖလားပြိုင်ပွဲမှ ထွက်ခွာထားရမှုနှင့်အတူ ယခုအပတ် ပွဲကစားရန် မရှိဘဲ ဖေဖော်ဝါရီလ ၂၃ ရက်နေ့တွင်မှ အဲဗာတန်နှင့် ပရီးမီးယားလိဂ်ပွဲ ကစားရပါမယ်။
ဒါ့အပြင် ဇန်နဝါရီလအတွက် ပရီးမီးယားလိဂ်တစ်လတာအကောင်းဆုံးကစားသမားဆုကိုလည်း ဘရန့်ဖို့ဒ်တိုက်စစ်မှူးအိုင်ဂေါ်တီယာဂိုက ဒုတိယအကြိမ်မြောက် ဆွတ်ခူးသွားပါတယ်။
သူဟာ ပရီးမီးယားလိဂ်သမိုင်းတွင် တစ်လတာအကောင်းဆုံးကစားသမားဆုအား ဒုတိယအကြိမ်မြောက်ဆွတ်ခူးတဲ့ ပထမဆုံးဘရာဇီးကစားသမားဖြစ်လာပါတယ်။
တီယာဂိုဟာ ဇန်နဝါရီလအတွင်း ၂ ပွဲကစားရာတွင် ၅ ဂိုးသွင်းနိုင်ခဲ့ပြီးနောက် ပရီးမီးယားလိဂ်ဂိုး ၁၆ ဂိုးဖြင့် ပရီးမီးယားလိဂ်တစ်ရာသီတည်းတွင် ဂိုးအများဆုံးသွင်းနိုင်တဲ့ ဘရာဇီးကစားသမားအဖြစ်လည်း သမိုင်းမှတ်တိုင်စိုက်ထူထားပါတယ်။
