တိုက်ခိုက်ခံခဲ့ရပါက ဒေသတွင်းရှိ အမေရိကန်စစ်စခန်းများကို ပြန်တိုက်ခိုက်သွားမည်ဟု အီရန် သတိပေး
ဒေသတွင်း စုစည်းနေသော အမေရိကန်တပ်ဖွဲ့များက အီရန်ကို တိုက်ခိုက်ခဲ့ပါက ဒေသတွင်းမှ အမေရိကန်စစ်စခန်းများကို ပြန်လည် တိုက်ခိုက်သွားမည်ဟု အီရန်နိုင်ငံခြားရေးဝန်ကြီးက အတိအလင်းပြောကြားပြီး ယင်းစစ်စခန်းများအား လက်ခံထားသည့် နိုင်ငံများကို တိုက်ခိုက်ခြင်းအဖြစ် မမြင်သင့်ကြောင်းလည်း ၎င်းက အလေးအနက်ပြောသည်
နှစ်ဖက်စလုံးက အပြုသဘောဆောင်သည်ဟု ဆိုကြသော အိုမန်နိုင်ငံမှ တစ်ဆင့်ခံ နျူကလီးယား ဆွေးနွေးမှုများကို ဆက်လုပ်သွားမည်ဟု တီဟီရန်နှင့် ဝါရှင်တန် ကတိကဝတ် ပြုခဲ့ကြပြီးနောက်တစ်နေ့ ကာတာမှ အယ်လ်ဂျာဇီးယား ရုပ်သံနှင့် တွေ့ဆုံချိန်တွင် အီရန်နိုင်ငံခြားရေး အဘတ်စ်အာရက်ချီက အထက်ပါအတိုင်း ပြောကြားခြင်း ဖြစ်သည်။
“အမေရိကန်မြေကို တိုက်ခိုက်ဖို့တော့ မဖြစ်နိုင်ပါဘူး။ ဒါပေမယ့်လည်း ဒေသတွင်းက သူတို့ရဲ့ စစ်စခန်းတွေကို ကျွန်တော်တို့ ပစ်မှတ်ထားသွားပါမယ်။ ကျွန်တော်တို့က အိမ်နီးချင်းနိုင်ငံတွေကို တိုက်ခိုက်မှာ မဟုတ်ပါဘူး အဲဒါ ထက် သူတို့ လက်ခံထားတဲ့ အမေရိကန်စစ်စခန်းတွေကို ကျွန်တော်တို့ ပစ်မှတ်ထားသွားပါမယ်။ ဒီနှစ်ခုကြားမှာ ကြီးမားတဲ့ ခြားနားချက်ရှိပါတယ်" ဟု အာရက်ချီက ပြောသည်။
ထို့ပြင် ၎င်းတို့၏ ယူရေနီယံ သန့်စင်ပိုင်ခွင့်အား အသိအ မှတ်ပြုမှု အလိုရှိကြောင်းနှင့် ၎င်းတို့၏ ဒုံးကျည်အစီအစဥ် အား ဆွေးနွေးပွဲသို့ ထည့်သွင်းလိုက်ခြင်းမှာ အီရန်အတွက် အစ္စရေးတိုက်ခိုက်မှု အန္တရာယ် ရှိသွားနိုင်သည်ဟုလည်း အီရန်က ပြောသည်။
"ဘယ်ဆွေးနွေးပွဲပဲ ဖြစ်ဖြစ် ခြိမ်းခြောက်မှုတွေ ဖိအားတွေ ရှောင်ရှားဖို့ လိုအပ်ပါတယ်။ တီဟီရန်က နျူကလီးယား ကိစ္စကိုပဲ ဆွေးနွေးတာပါ။ ကျွန်တော်တို့က အမေရိကန်နဲ့ တခြားကိစ္စတွေကို မဆွေးနွေးပါဘူး" ဟု အီရန်က ဆို သည်။
