ဇနီးဟောင်းအား အဆက်အသွယ်လုပ်မှုဖြင့် တရားရင်ဆိုင်နေရတဲ့ လီဗာပူးစတားဟောင်းအင်ဒီကာရိုးလ်
======================
အင်္ဂလန်တိုက်စစ်မှူးဟောင်းအင်ဒီကာရိုးလ်ဟာ ဇနီးဟောင်းဘီလီမက်ကလိုးအား အဆက်အသွယ်ပြုလုပ်ကာ လိင်ပိုင်းဆိုင်ရာ စော်ကားမှု မပြုလုပ်ရ အမိန့်အား ချိုးဖောက်လာကြောင်း တရားရုံး ကြားနာမှုအရ သိရပါတယ်။
နယူးကာဆယ်နှင့် လီဗာပူးစတားဟောင်းဟာ ပြီးခဲ့တဲ့ ဧပြီလတုန်းက အားလပ်ခရီးစဉ်မှ ပြန်ရောက်လာစဉ် အမိန့်ချိုးဖောက်မှုအတွက် Stansted Airport တွင် ဖမ်းဆီးထိန်းသိမ်းခြင်းခံခဲ့ရပါတယ်။
အသက် ၃၇ နှစ်ရှိ ကာရိုးလ်ဟာ Chelmsford Magistrates's Court တွင် အမှုကြားနာ ရင်ဆိုင်ခဲ့ရပါတယ်။
ကာရိုးလ်ဟာ အရိုးနှင့် အရွတ်ဒဏ်ရာအား ခွဲစိတ်ကုသမှု ပြုလုပ်ထားရမှုနှင့်အတူ ဂျိုင်းထောက်ဖြင့် အမှုရင်ဆိုင်ရန် တရားရုံးသို့ လာရောက်ခဲ့ရပါတယ်။
တရားရုံးကြားနာမှုအရ အင်ဒီကာရိုးလ်ဟာ ပြီးခဲ့တဲ့ မတ်လတုန်းက ကလေး ၃ ဦး အတူ ရရှိခဲ့တဲ့ ဇနီးဟောင်း Towie စတားအား ဆက်တိုက် ဖုန်းဆိုမှု ပြုလုပ်ခဲ့ကြောင်း သိရပါတယ်။
၎င်းတို့နှစ်ဦးဟာ ၂၀၂၂ ခုနှစ်တွင် လက်ထပ်ကြပြီးနောက် ၂ နှစ်အကြာတွင် လမ်းခွဲ ပြတ်စဲခဲ့ကြပါတယ်။
လိင်ပိုင်းဆိုင်ရာ မနှောင့်ယှက်ရ အမိန့်အရ ကာရိုးလ်အနေဖြင့် ဇနီးဟောင်းအနီးသို့ သွားရောက်နိုင်ခြင်း မရှိသလို အဆက်အသွယ် ပြုလုပ်ခြင်းလည်း မပြုလုပ်ရပါဘူး။
ယင်းစည်းမျဉ်းကို ချိုးဖောက်ပါက ရာဇဝတ်မှုအရေးယူမှု ရင်ဆိုင်ရမည်ဖြစ်ကာ ထောင်ဒဏ် ၅ နှစ်အထိ ချမှတ်နိုင်ပါတယ်။
ကာရိုးလ်ဟာ ပြင်သစ်မှ ပြန်ရောက်လာချိန်တွင် ခေတ္တဖမ်းဆီးထိန်းသိမ်းခြင်းခံရပြီးနောက် ပြန်လည်လွတ်မြောက်လာခဲ့တာလည်း ဖြစ်ပါတယ်။
ကာရိုးလ်ဟာ နယူးကာဆယ်တွင် ပရော်ဖက်ရှင်နယ်ကစားသမားဘဝစတင်ကာ ၂၀၀၆ မှ ၂၀၁၁ ခုနှစ်အတွင်း ပွဲ ၈၀ တွင် ၃၁ ဂိုးသွင်းပြီးနောက် လီဗာပူးသို့ ပေါင် ၃၅ သန်းဖြင့် ပြောင်းကာ ထိုစဉ်တုန်းက ဗြိတိန်ကစားသမားတစ်ဦးအတွက် ပြောင်းရွှေ့ကြေးအမြင့်မားဆုံး ဖြစ်ခဲ့ပါတယ်။
သူဟာ အန်ဖီးလ်တွင် ၂ ရာသီကစားပြီးနောက် ဝက်စ်ဟမ်း၊ နယူးကာဆယ်၊ ရီးဒင်း၊ ဝက်စ်ဘရွန်း၊ အေမီယန်၊ ဘော်ဒိုးကလပ်များသို့ ပြောင်းကစားခဲ့ကာ လက်ရှိအချိန်တွင် National League South ကလပ် Dagenham & Redbridge တွင် ကစားနေပါတယ်။
သူဟာ ၂၀၂၄ ခုနှစ်မှ စတင်ကာ ဆံပင်အလှပညာရှင် လူတီးစ်ဒေးလ်နှင့် ချစ်ကြိုက်လာခဲ့ပါတယ်။
