ခြင်းတောင်းနဲ့ ကောက်ရိုးမှိုစိုက်ပျိုးတာဟာ နေရာအနည်းငယ်ပဲ လိုအပ်ပြီး ရင်းနှီးမြှုပ်နှံမှု နည်းနည်းနဲ့ အကျိုးအမြတ် မြန်မြန်ရနိုင်တဲ့ စိုက်ပျိုးရေးနည်းလမ်းတစ်ခုဖြစ်ပါတယ်။ အထူးသဖြင့် ခြံဝင်းကျဉ်းသူတွေ ဒါမှမဟုတ် အပိုဝင်ငွေရှာချင်သူတွေအတွက် အထူးသင့်လျော်ပါတယ်။ စိုက်ပြီး (၇) ရက်ကနေ (၁၀) ရက်အတွင်းမှာတင် စတင်ခူးဆွတ်ရောင်းချနိုင်ပြီဖြစ်လို့ ဈေးကွက်ထဲမှာလည်း အမြဲဝယ်လိုအားရှိနေတဲ့ မှိုအမျိုးအစားဖြစ်ပါတယ်။
#ပြင်ဆင်ရမည့်ပစ္စည်းများ
၁။ အပေါက်ပါသော ပလတ်စတစ်ခြင်းတောင်း (အချင်း ၃၀-၄၀ စင်တီမီတာခန့်)
၂။ ခြောက်သွေ့သန့်ရှင်းသော ကောက်ရိုး (မှိုမတက်စေရ)
၃။ ကောက်ရိုးမှိုမျိုး (အဖြူရောင်အမျှင်များ အားကောင်းပြီး အနံ့မနံသောမျိုးကို ရွေးချယ်ပါ)
၄။ အားဖြည့်စာများ - ဖွဲနု၊ ကောက်ညှင်းမှုန့်၊ နွားချေးခြောက်မှုန့်
၅။ ရေနှင့် ပလတ်စတစ်စ သို့မဟုတ် ဂုန်နီအိတ် (အုပ်ရန်)
#ကောက်ရိုးပြင်ဆင်နည်း
ကောက်ရိုးကို ရေထဲမှာ ၆ နာရီကနေ ၁၂ နာရီအထိ စိမ်ထားပါ။
ပြီးနောက် ပြန်ဆယ်ပြီး ရေစစ်ထားပါ။ ကောက်ရိုးဟာ စိုစွတ်နေရပေမယ့် ရေတွေရွှဲမနေရပါဘူး (လက်နဲ့ညှစ်ကြည့်ရင် ရေစိမ့်ထွက်ရုံလောက်ပဲ ဖြစ်ရပါမယ်)။
#ခြင်းတောင်းထဲတွင်စိုက်ပျိုးပုံအဆင့်ဆင့်
၁။ ပထမအလွှာ - ကောက်ရိုးကို ခြင်းတောင်းအောက်ခြေမှာ ၈-၁၀ စင်တီမီတာအထူ ဖိထည့်ပါ။ ခြင်းတောင်းအနားပတ်လည်မှာ အားဖြည့်စာနဲ့ မှိုမျိုးကို ဖြန့်ချပါ (အလယ်ကို ချန်ထားပါ)။
၂။ ဒုတိယအလွှာ - ကောက်ရိုးထပ်ထည့်ပြီး ပထမအလွှာအတိုင်း အနားပတ်လည်မှာ အားဖြည့်စာနဲ့ မှိုမျိုးထည့်ပါ။
၃။ တတိယအလွှာ (အပေါ်ဆုံး) - ကောက်ရိုးနဲ့ အုပ်ပေးပြီး အားဖြည့်စာ အနည်းငယ်ဖြူးပေးပါ။ အပေါ်ဆုံးမှာတော့ မှိုမျိုးထည့်စရာမလိုပါဘူး။
#စောင့်ရှောက်ထိန်းသိမ်းနည်း
ရေလောင်းတဲ့အခါ ခြင်းတောင်းဘေးပတ်လည်ကိုပဲ လောင်းပေးပါ။ ကောက်ရိုးပုံပေါ် တိုက်ရိုက်မလောင်းပါနဲ့ (မှိုမျိုးပုပ်သွားနိုင်ပါတယ်)။
ခြင်းတောင်းကို ပလတ်စတစ်စ သို့မဟုတ် ဂုန်နီအိတ်နဲ့ လုံအောင်အုပ်ပြီး အရိပ်ထဲမှာ ထားပါ။ အပူချိန် ၃၅-၄၀ ဒီဂရီစင်တီဂရိတ်ဝန်းကျင် ရှိရပါမယ်။
၄ ရက်ကနေ ၅ ရက်မြောက်မှာ အုပ်ထားတဲ့အိတ်ကိုဖွင့်ပြီး လေပေးပါ။ မှိုငုံလေးတွေ စတင်ထွက်လာပါလိမ့်မယ်။
#ခူးဆွတ်ခြင်း
၇ ရက်ကနေ ၁၀ ရက်အတွင်းမှာ စတင်ခူးဆွတ်နိုင်ပါတယ်။
မှိုငုံလေးတွေ တင်းနေတဲ့အချိန်မှာ ခူးရင် ဈေးအကောင်းဆုံးရပါတယ်။
ခြင်းတောင်းတစ်လုံးဟာ ပျမ်းမျှ မှို ၅၀ သားကနေ ၁ ကီလိုအထိ ထွက်ရှိနိုင်ပါတယ်။
#အချက်အချာကျသောသတိပြုရန်များ
ကောက်ရိုး အလွန်အမင်း မစိုရပါစေနဲ့။
ကောက်ရိုးကို ကျပ်လွန်းအောင် မဖိရပါ၊ လေဝင်လေထွက်ရှိရပါမယ်။
မှိုပုံပေါ် ရေတိုက်ရိုက်မလောင်းရပါ။
မိမိအိမ်က နေရာလပ်လေးတွေမှာ ဒီနည်းလမ်းလေးကို အသုံးပြုပြီး တစ်ပိုင်တစ်နိုင် စိုက်ပျိုးကြည့်ကြဖို့ တိုက်တွန်းလိုက်ပါတယ်။
#
Credit : forevermmmedia