တိုက်စစ်မှူးအိုလီဝတ်ကင် ဒဏ်ရာရရှိသွားမှုနှင့်အတူ ကြီးမားတဲ့ ထိုးနှက်ချက် ကြုံလာရတဲ့ အက်စတွန်ဗီလာ
=====================
အက်စတွန်ဗီလာဟာ အဓိကတိုက်စစ်မှူးအိုလီဝတ်ကင် တံကောက်ကြောဒဏ်ရာရရှိလာမှုနှင့်အတူ ပရီးမီးယားလိဂ်ဖလားတိုက်ပွဲအတွက် ကြီးမားတဲ့ ထိုးနှက်ချက်ကြုံလာရပါတယ်။
ဗီလာဟာ မနေ့ညတုန်းက ရက်ဘူးလ်လိုက်ဇစ်နှင့်ပွဲမတိုင်မီကတည်းက ယူရိုပါလိဂ် ၁၆ သင်းရှုံးထွက်အဆင့်သို့ တိုက်ရိုက်တက်ရောက်ရေး နေရာသေချာထားခဲ့တာပါ။
ဒါကြောင့်လည်း အူနိုင်းအမ်မရီဟာ အသက် ၁၈ နှစ်အရွယ် ဂျော့ဟမ်းမင်း၊ တိုင်ရွန်းမင်၊ နေရာပျောက်နေတဲ့ ဟာဗေးအီးလီးယော့စတဲ့ ကစားသမားများကို ထည့်သွင်း အသုံးပြုလာပေမယ့် အရေးပါတဲ့ အိုလီဝတ်ကင်ကိုလည်း အသုံးပြုလာပါတယ်။
အသက် ၃၀ နှစ်ရှိ အင်္ဂလန်တိုက်စစ်မှူးက ယခုရာသီ ပရီးမီးယားလိဂ်သွင်းဂိုး ၈ ဂိုးဖြင့် ကလပ်ရဲ့ဂိုးအများဆုံးသွင်းယူသူအဖြစ် ရပ်တည်နေသူပါ။
ဗီလာဟာ ပရီးမီးယားလိဂ်ရာသီသိမ်းရန် ၁၅ ပွဲတည်းသာ လိုတော့တဲ့အချိန်တွင် ထိပ်ဆုံးမှ အာဆင်နယ်နှင့် ၄ မှတ်သာ ကွာဟနေမှုကြောင့် ချန်ပီယံဆုအတွက် မျှော်လင့်ချက်အပြည့်အဝ ရှိနေပါတယ်။
ဒါပေမယ့် ဗီလာဟာ လိုက်ဇစ်နှင့်ပွဲစဉ်ရဲ့ ပွဲချိန် ၃၅ မိနစ်မှာပင် ဝတ်ကင် ဒဏ်ရာရရှိကာ မော်ဂန်ရိုဂျာနှင့် လူစားလဲလိုက်ရပါတယ်။ ဗီလာဟာ တိုက်စစ်မှူးဝတ်ကင်မပါဝင်ဘဲ ရက်သတ္တပတ်အတန်ကြာ ကစားလာရတော့မှာ ဖြစ်ပါတယ်။
မနေ့ညကပွဲတွင် ဗီလာဟာ လိုက်ဇစ်ကို ၂-၀ ဂိုးဖြင့် နောက်ကလိုက်ကစားခဲ့ရပေမယ့်လည်း မော်ဂန်ရိုဂျာ၊ တိုင်ရွန်မင်၊ ဂျီမိုတို့ရဲ့ ဂိုးတွေကြောင့် ၃-၂ ဖြင့် အနိုင်ရရှိခဲ့ပါတယ်။
ဗီလာဟာ ဝတ်ကင် ဒဏ်ရာရရှိသွားမှုနှင့်အတူ ဘီဆစ်တပ်မှ ပူပူနွေးနွေး ခေါ်ယူထားတဲ့ အင်္ဂလန်တိုက်စစ်မှူးတမ်မီအေဘရာဟမ်ကို အားကိုးလာရပါတော့မယ်။
အသက် ၂၈ နှစ်ရှိ ချဲလ်ဆီး၊ ရိုးမားနှင့် အေစီမီလန်တိုက်စစ်မှူးဟောင်းဟာ ၂၀၁၈-၁၉ ရာသီတုန်းက ဗီလာတွင် အငှားဖြင့် လာကစားဖူးပြီး ၂၆ ဂိုးသွင်းကာ ပရီးမီးယားလိဂ်သို့ တန်းတက်နိုင်အောင် ကူညီခဲ့ဖူးသူ ဖြစ်ပါတယ်။
