အာဖရိကဖလားဗိုလ်လုပွဲ နိုင်ပွဲမှ ရုပ်ပျက်ဆင်းပျက်ပြဿနာအတွက် ပွဲပယ်ခံလာရတဲ့ ဆီနီဂေါနည်းပြ
==================
ဆီနီဂေါနည်းပြပါပီသီယော်ဟာ ယခုလအစောပိုင်းတုန်းက မော်ရိုကိုအား အနိုင်ရတဲ့ အာဖရိကဖလားဗိုလ်လုပွဲမှ ရုပ်ပျက်ဆင်းပျက်အဖြစ်အပျက်အတွက် ၅ ပွဲပယ်ပြစ်ဒဏ် ချမှတ်ခြင်းခံလာရပါတယ်။
အာဖရိကဘောလုံးအဖွဲ့ချုပ်ဟာ သီယော်ရဲ့ အားကစားသမားစိတ်ဓာတ်မရှိတဲ့ လုပ်ရပ်အတွက်၊ ပွဲကို မတည်မငြိမ်ဖြစ်အောင် လုပ်မှုတို့အတွက် ဒေါ်လာ ၁၀၀၀၀၀ လည်း ဒဏ်ရိုက်ခဲ့ပါတယ်။
ဇန်နဝါရီလ ၁၈ ရက်နေ့တုန်းက ရာဘက်တွင် ဆီနီဂေါတို့ ၁-၀ ဂိုးဖြင့် အနိုင်ရတဲ့ အာဖရိကဖလားဗိုလ်လုပွဲတွင် ဆီနီဂေါနည်းပြသီယော်ဟာ မော်ရိုကိုဘက်သို့ အချိန်ပို ပင်နယ်တီပေးလာမှုအပေါ် ဆန့်ကျင်တဲ့အနေဖြင့် ကစားသမားများအား အဝတ်အစားလဲခန်းသို့ ဝင်ရန် ညွှန်ကြားခဲ့ပါတယ်။
ယင်းအဖြစ်အပျက်ကြောင့် ပွဲမှာ ၁၇ မိနစ်ခန် ရပ်ဆိုင်းခဲ့ရပြီး ဆီနီဂေါတိုက်စစ်သမားဆာဒေယိုမာနေးက ကစားသမားများအား ကွင်းအတွင်းသို့ ပြန်ဝင်လာအောင် ဖျောင်းဖျခဲ့ရပါတယ်။
ဒါ့အပြင် ဆီနီဂေါတိုက်စစ်သမားများဖြစ်ကြတဲ့ လီမန်အန်ဒီယာယီနှင့် ဆားတို့မှာလည်း ဒိုင်လူကြီးအား အားကစားသမားမပီသတဲ့ အပြုအမူများ ပြုလုပ်မှုအတွက် ၂ ပွဲပယ်ပြစ်ဒဏ်ချမှတ်ခြင်းခံလာရသလို ဆီနီဂေါဘောလုံးအဖွဲ့ချုပ်မှာလည်း ဒေါ်လာ ၆၁၅၀၀၀ ဒဏ်ရိုက်ခြင်းခံခဲ့ရပါတယ်။
မော်ရိုကိုတိုက်စစ်သမားအစ္စမေးလ်ဆိုင်ဘာရီမှာ ၃ ပွဲပယ်နှင့် ဒေါ်လာ ၁၀၀၀၀၀ ဒဏ်ရိုက်ခြင်းခံခဲ့ရသလို နောက်ခံလူဟာကီမီမှာလည်း ၂ ပွဲပယ်ခံလာရကာ ၁ ပွဲအား ၁၂ လ ဆိုင်းငံ့ပြစ်ဒဏ်ချမှတ်ခြင်းခံ့ခဲ့ရပါတယ်။
မော်ရိုကိုဘောလုံးအဖွဲ့ချုပ်ဟာ ကွင်းအတွင်းမှ ထွက်ခွာသွားတဲ့ ဆီနီဂေါကစားသမားများရဲ့ လုပ်ရပ်အတွက် ပွဲအား အနိုင်ပေးရန် အယူခံဝင်ခဲ့ပေမယ့်လည်း အာဖရိကဘောလုံးအဖွဲ့ချုပ်က ပယ်ချခဲ့ပါတယ်။
သီယော်နှင့် ပွဲပယ်ခံရတဲ့ ကစားသမားများမှာ ပွဲပယ်ပြစ်ဒဏ်အား အာဖရိကဖလားပွဲစဉ်များတွင်သာ ကျခံရမှာ ဖြစ်ပြီး ကမ္ဘာ့ဖလားတွင် ကျခံလာရမှာ မဟုတ်ပါဘူး။
ဆီနီဂေါဘောလုံးအဖွဲ့ချုပ်မှာ ဒေါ်လာ ၆၁၅၀၀၀မှ ဒေါ်လာ ၃၀၀၀၀၀ ကို ဆီနီဂေါကစားသမားများနှင့် နည်းပြအဖွဲ့ဝင်များရဲ့ စည်းကမ်းချိုးဖောက်မှုကြောင့်လည်းကောင်း၊ ဒေါ်လာ ၃၀၀၀၀၀ ကို ပရိသတ်များ စည်းကမ်းချိုးဖောက်မှုကြောင့်လည်းကောင်း ချမှတ်ခံခဲ့ရတာပါ။
ယင်းပွဲတွင် ဆီနီဂေါပရိသတ်များဟာ မော်ရိုကိုဘက်သို့ ပင်နယ်တီပေးလိုက်ပြီးနောက် ကွင်းအတွင်း ဝင်ရောက်ခဲ့သလို လုံခြုံရေးများနှင့် ပြဿနာတက်ခဲ့ကြပါတယ်။
ကျန် ဒေါ်လာ ၁၅၀၀၀ မှာ ဆီနီဂေါကစားသမား ၅ ဦးတို့ အဝါကတ်ပြသခြင်းခံရမှုကြောင့် ဖြစ်ပါတယ်။
တဖက်တွင် မော်ရိုကိုဘောလုံးအဖွဲ့ချုပ်ဟာ ဗိုလ်လုပွဲစဉ်မှ ဘောကောက်လူငယ်များရဲ့ အပြုအမူအတွက် ဒေါ်လာ ၂၀၀၀၀၀ ဒဏ်ရိုက်ခြင်းခံခဲ့ရပါတယ်။
