ချန်ပီယံလိဂ်တွင် ဘယ်နောက်ခံလူမှ မရေးထိုးခဲ့ဖူးတဲ့ စံချိန်အား လီဗာပူးအသင်းခေါင်းဆောင်ရေးထိုးလာ
=======================
လီဗာပူးအသင်းခေါင်းဆောင်ဗာဂယ်ဗန်ဒိုက်ဟာ ချန်ပီယံလိဂ်တွင် ဘယ်နောက်ခံလူမျှ မရရှိခဲ့ဖူးတဲ့ စံချိန်အား ရေးထိုးလာပါတယ်။
လီဗာပူးဟာ ဗုဒ္ဓဟူးနေ့ညတုန်းက အန်ဖီးလ်ကွင်းတွင် ကွာရာဘတ်အား ၆-၀ ဂိုးဖြင့် သက်တောင့်သက်သာ အနိုင်ယူကာ ချန်ပီယံလိဂ် ၁၆ သင်း ရှုံးထွက်အဆင့်သို့ တက်ရောက်နိုင်ခဲ့ပါတယ်။
ဒီပွဲမှာ ဗာဂယ်ဗန်ဒိက်ဟာ ဂိုးသွင်းနိုင်ခဲ့ခြင်း မရှိပေမယ့်လည်း မက်အယ်လစ်စတာ၊ ဟူဂိုအီကီတီကီ၊ ချီယေဆာတို့ ဂိုးသွင်းနိုင်အောင် ဖန်တီးမှု ပြုလုပ်နိုင်ခဲ့မှုနှင့်အတူ ချန်ပီယံလိဂ်သမိုင်းတွင် တစ်ပွဲတည်းမှာ ဖန်တီးမှု ၃ ကြိမ်ပြုလုပ်နိုင်တဲ့ ပထမဆုံးဗဟိုနောက်ခံလူ ဖြစ်လာပါတယ်။
သူဟာ ပွဲချိန် ၁၅ မိနစ်တွင် ထောင့်ကန်ဘောမှ တဆင့် ခေါင်းတိုက်ချပေးကာ အယ်လစ်စတာ ဦးဆောင်ဂိုးသွင်းနိုင်အောင် စတင် ဖန်တီးပေးနိုင်ခဲ့ပါတယ်။
ယင်းနောက် သူဟာ ပွဲချိန် ၅၇ မိနစ်တွင် နောက်တန်းမှ ရှင်းထုတ်ကန်တင်ကာ ဟူဂိုအီကီတီကီ ဆွဲပြေးဂိုးသွင်းနိုင်အောင် ဖန်တီးခဲ့ပါတယ်။
သူဟာ တတိယဖန်တီးမှုအဖြစ် ပွဲချိန် မိနစ် ၉၀ တွင် လူစားဝင်ရောက်လာတဲ့ ချီယေဆာ ဂိုးသွင်းနိုင်အောင် ခင်းပေးပြီး ဖန်တီးပေးခဲ့ပါတယ်။
ဗန်ဒိုက်ဟာ ကွာရာဘတ်နှင့်ပွဲတွင် ဖန်တီးမှု ၃ ကြိမ်ပြုလုပ်ပြီးနောက် ယခုရာသီ ချန်ပီယံလိဂ်တွင် ဂိုး/ဖန်တီးမှု ၅ ကြိမ်အထိ ပြုလုပ်ထားနိုင်ပြီး ဆိုဘိုဆလိုင်း(၈ ကြိမ်)ပြီးလျှင် အများဆုံးလီဗာပူးကစားသမားအဖြစ် ရပ်တည်နေပါတယ်။
လီဗာပူးဟာ လာမယ့် တနင်္ဂနွေနေ့တွင် အန်ဖီးလ်ကွင်းမှာ နယူးကာဆယ်ကို ဧည့်ခံကစားရမှာ ဖြစ်ပြီး ယင်းပွဲအပြီးတွင် မန်စီးတီးအား ထပ်မံ ဧည့်ခံကစားရပါမယ်။
