ဂီတလောကသို့ ဝင်ရန် အသင့် ဖြစ်နေပြီ ဖြစ်တဲ့ ယူနိုက်တက်ဂန္ထဝင်အဲရစ်ကန်တိုနာ
====================
အဲရစ်ကန်တိုနာဟာ ပထမဆုံးအယ်ဘတ် ထုတ်ဝေရန် အသင့်ဖြစ်နေပြီ ဖြစ်ပြီး ပရော်ဖက်ရှင်နယ်ဘဝသစ်သို့ ခြေလှမ်းလှမ်းလာတော့မှာ ဖြစ်ပါတယ်။
အသက် ၅၉ နှစ်ရှိ ယူနိုက်တက်ဂန္ထဝင်ဟာ ယူနိုက်တက်နှင့် ပြင်သစ်အသင်းတို့တွင် ကစားစဉ် ကြီးမားတဲ့ အောင်မြင်မှုများ ရယူနိုင်ခဲ့သူ ဖြစ်ပါတယ်။
သူဟာ ယူနိုက်တက်နှင့်အတူ အမှတ်ပေးဖလားများအပြင် အက်ဖ်အေဖလားတို့ ဆွတ်ခူးခဲ့သလို တစ်နှစ်တာအကောင်းဆုံးကစားသမားဆုများကိုလည်း ရယူခဲ့ပါတယ်။
ကွင်းအတွင်းတွင် အောင်မြင်မှုများစွာ ရယူခဲ့တဲ့ အဲရစ်ကန်တိုနာဟာ ဘောလုံးပြင်ပ ဂီတလောကတွင်လည်း ထိပ်တန်းအောင်မြင်မှု ရယူရေး ရည်မှန်းနေပြီ ဖြစ်ပါတယ်။
သူဟာ ၂၀၂၃ ခုနှစ်တုန်းက EP အခွေ တစ်ခွေ ထွက်ပြီးနောက် လိဒ်၊ လန်ဒန်၊ မန်ချက်စတာအပြင် စကော့တလန်၊ ပြင်သစ်၊ နယ်သာလန်နိုင်ငံများသို့ အောင်မြင်တဲ့ ‘Cantona Sings Eric Tour’ ထွက်နိုင်ခဲ့ပါတယ်။
ယခုအခါ သူဟာ ပထမဆုံးအယ်ဘမ်အဖြစ် ‘Perfect Imperfection’ အခွေအား ထုတ်ဝေရန် အသင့် ဖြစ်နေပြီ ဖြစ်ပါတယ်။
ယင်းအယ်ဘမ်တွင် သီချင်း ၁၁ ပုဒ်ပါဝင်ပြီး ယင်းမှ ၉ ပုဒ်ကို အဲရစ်ကန်တိုနာ ကိုယ်တိုင် ရေးသားသီဖွဲ့ထားတာပါ။
လက်ရှိအချိန်တွင် ‘Perfect Imperfection’ အား Green Vinyl LP နှင့် CD တို့ဖြင့် Pre-Order လက်ခံနေပြီ ဖြစ်ပြီး ကြိုတင်အမှာ ပြုလုပ်တဲ့ အခွေများတွင် အဲရစ်ကန်တိုနာ ကိုယ်တိုင် အမှတ်တရ လက်မှတ်ရေးထိုးပေးလာပါမယ်။
