ဟယ်ရီကိန်းအား စာချုပ်သစ်ချုပ်ဆိုရန် ဘိုင်ယန်မြူးနစ်ဆွေးနွေးနေ
=====================
ဘိုင်ယန်မြူးနစ်အားကစားဒါရိုက်တာမက်စ်ဘာလ်က ဂျာမန်ကလပ်မှာ ဟယ်ရီကိန်းအား စာချုပ်သက်တမ်းတိုးရေး ဆွေးနွေးနေပြီ ဖြစ်ကြောင်း အတည်ပြုလာပါတယ်။
အသက် ၃၂ နှစ်ရှိ အင်္ဂလန်အသင်းခေါင်းဆောင်ဟာ ၂၀၂၃ ခုနှစ် ဩဂုတ်လတွင် စပါးစ်မှ ယူရိုသန်း ၁၀၀ ဖြင့် ဘိုင်ယန်မြူးနစ်သို့ ၄ နှစ်စာချုပ်ဖြင့် ပြောင်းခဲ့သူ ဖြစ်ပါတယ်။
ကိန်းဟာ ဘိုင်ယန်မြူးနစ်သို့ ရောက်လာပြီးနောက် ၁၂၆ ပွဲကစားထားရာမှာ ၁၁၉ ဂိုးသွင်းယူပြီး အကြိမ် ၃၀ ဖန်တီးမှုပြုလုပ်ပေးထားပါတယ်။ သူဟာ ကစားသမားဘဝ ပထမဆုံးဆုဖလားအဖြစ် ၂၀၂၄-၂၅ ဘွန်ဒက်စ်လီဂါဖလားဆွတ်ခူးနိုင်အောင်လည်း ကူညီထားပါတယ်။
မက်စ်အီဘာလ်က "ဟယ်ရီနဲ့ စကားပြောနေတယ်။ ကျွန်တော်တို့ ဆွေးနွေးနေပါတယ်။ တချိန်ကျရင် ဆုံးဖြတ်ချက်တစ်ခု ချလာမယ်ဆိုတာ လူတိုင်း သိပါတယ်"လို့ ပြောကြားသွားပါတယ်။
အောက်တိုဘာလတုန်းက အင်တာဗျူးတစ်ခုတွင် ဟယ်ရီကိန်းက ဘိုင်ယန်မြူးနစ်တွင် ဆက်ရှိနေရန် သေချာသလောက်ရှိနေပြီး ပရီးမီးယားလိဂ်သို့ ပြန်လိုတဲ့ ဆန္ဒနည်းပါးနေကြောင်း ပြောကြားသွားခဲ့ဖူးပါတယ်။
သူဟာ ယခုရာသီတွင် ဗင်းဆင့်ကွန်ပနီရဲ့အသင်းအတွက် ပွဲ ၃၀ ကစားထားရာမှာ ၃၄ ဂိုးသွင်းထားနိုင်ပါတယ်။ သူဟာ ဘွန်ဒက်စ်လီဂါ ၁၉ ပွဲတွင် ၂၁ ဂိုးအထိ သွင်းထားကာ ဘွန်ဒက်စ်လီဂါတစ်ရာသီတည်းတွင် ဂိုးအများဆုံးသွင်းထားတဲ့ ရောဘတ်လီဝန်ဒေါ့စကီးရဲ့ ၄၁ ဂိုးစံချိန်အား ရိုက်ချိုးနိုင်ရန် ပစ်မှတ်ထားနေပါတယ်။
ဟယ်ရီကိန်းဟာ ယခုရာသီတွင် ချန်ပီယံလိဂ်တွင်လည်း အဆင့် ၂ နေရာမှာ ရပ်တည်နိုင်အောင် ဘိုင်ယန်မြူးနစ်အား ကူညီထားပါတယ်။
ဘိုင်ယန်အမှုဆောင်ချုပ်ဂျန်ခရစ္စတီယန်ဒရီးဆင်ကလည်း "ဟယ်ရီက ကျွန်တော်တို့အပေါ်မှာ ကြီးမားတဲ့ ယုံကြည်မှု ရှိတယ်။ မြူးနစ်မှာလည်း သက်တောင့်သက်သာ ဖြစ်နေတယ်။ သူနဲ့ သူ့မိသားစု ဒီမှာ အထိုင်ကျနေပါပြီ။ ဒီတော့ ကျွန်တော်တို့အနေနဲ့ အရမ်းအလျှင်စလို လုပ်ဖို့ မလိုပါဘူး"လို့ ပြောကြားသွားပါတယ်။
