လီယွန်နယ်မက်ဆီရဲ့ ကျောနံပါတ် ၁၀ အင်္ကျီကို ရရှိပြီးနောက် မျက်ရည်ကျခဲ့တဲ့ ပြိုင်ဘက်ကစားသမား
=====================
လီယွန်နယ်မက်ဆီရဲ့ အာဂျင်တီးနားအင်္ကျီပဲ ဖြစ်ဖြစ်၊ အင်တာမိုင်ယာမီအင်္ကျီပဲ ဖြစ်ဖြစ် ကစားသမားတိုင်း လိုချင်တဲ့အရာတွေက တစ်ခု ဖြစ်ပါတယ်။ အာဂျင်တီးနားဂန္ထဝင်ကစားသမားအတွက် ပွဲပြီးတိုင်း အတောင်းခံရဆုံးအရာ ဖြစ်ပါတယ်။
အလန်ကန်တီရိုးဟာလည်း မက်ဆီရဲ့ ၂၀၂၆ ခုနှစ် ပထမဆုံးပွဲအပြီးမှာ အလွန်ကံကောင်းစွာပင် ကျောနံပါတ် ၁၀ အင်္ကျီကို ရရှိသွားခဲ့ပါတယ်။
Alianza Lima တိုက်စစ်မှူးဟာ အင်တာမိုင်ယာမီနှင့် ခြေစမ်းပွဲအပြီးမှာ အကြီးမားဆုံးဆုလာဘ်အဖြစ် မက်ဆီရဲ့ အင်္ကျီကို ပိုင်ဆိုင်ခွင့် ရရှိခဲ့ပြီး ယင်းဆုလာဘ်အတွက် ဝမ်းသာမျက်ရည်ကျခဲ့ရပါတယ်။
ဂျာဗီးယားမာရှေးယာနိုကိုင်တွယ်နေတဲ့ အင်တာမိုင်ယာမီဟာ ရာသီသစ်အတွက် ပြင်ဆင်တဲ့အနေဖြင့် ခြေစမ်းပွဲများ ကစားနေပြီး ပထမဆုံးပွဲအဖြစ် ပီရူးကလပ် Alianza Lima နှင့် ရင်ဆိုင်ခဲ့ရာမှာ ၃-၀ ဂိုးဖြင့် ရှုံးနိမ့်ခဲ့ပါတယ်။
ပွဲအပြီးတွင် ကန်တီရိုးဟာ ကံကောင်းထောက်မစွာပင် မက်ဆီနှင့် အင်္ကျီလဲလှယ်နိုင်ခဲ့ပါတယ်။ သူဟာ မက်ဆီရဲ့ အင်္ကျီကို ပိုင်ဆိုင်ခွင့် ရရှိမှုနှင့်အတူ မျက်ရည်ကျတဲ့အထိ ဝမ်းသာပျော်ရွှင်ခဲ့ပါတယ်။
၎င်းက "မက်ဆီက ကျွန်တော့်ရဲ့ အိုင်ဒေါပါ။ သူ့ကို လေးစားအားကျပြီး ကြိုးစားခဲ့လို့ ဒီကနေလို အချိန်မျိုးအထိ ရောက်လာတာပါ။ သူ့အင်္ကျီကို တောင်းဆိုခွင့်ရတာကိုက ဂုဏ်ယူစရာပါ။ အရိုးသားဆုံး ပြောရရင် အရမ်းစိတ်လှုပ်ရှားရတယ်။ အိမ်မှာ ဘောင်ခတ်ပြီး သိမ်းထားမယ်"လို့ ပြောကြားသွားပါတယ်။
ဒါ့အပြင် ပျော်လွန်းလို့ ကျလာတဲ့ မျက်ရည်စများနှင့်အတူ ၎င်းက "ပွဲပြီးတော့ သူ့ကို နှုတ်ဆက်ခဲ့တယ်။ ဒါလုပ်ဖို့ အချိန်များစွာ စောင့်ဆိုင်းလာခဲ့ရတာပါ။ သူ့ကို နှုတ်ဆက်ခွင့်ရတာကိုက အရမ်းပီတိဖြစ်ရတယ်။ တစ်ကွင်းထဲ အတူတူ ကစားခွင့်ရတာ ဂုဏ်ယူစရာပါ။ သူ့ရဲ့ နှိမ့်ချမှုကို ခင်ဗျားတို့ မြင်နိုင်ပါတယ်။ ကလေးတွေကို ဘယ်လို ကူညီနေမြင်နိုင်ပါတယ်။ ကျွန်တော့်အိပ်မက်တစ်ခု ပြည့်သွားပါပြီ"လို့ ပြောကြားသွားပါတယ်။
