ဒေါ်နယ်ထရမ့် ရုရှားနိုင်ငံသို့ လာရောက်လည်ပတ်ရန် ဖိတ်ကြားချက် ရရှိထားကြောင်း အဆင့်မြင့်သံတမန်တစ်ဦး ပြောကြား
အမေရိကန်သမ္မတ ဒေါ်နယ်ထရမ့်သည် ပြီးခဲ့သည့် သြဂုတ်လက အလက်စကာတွင် ရုရှားခေါင်းဆောင် ဗလာဒီမီယာ ပူတင်နှင့် တွေ့ဆုံစဉ်အတွင်း ရုရှားနိုင်ငံသို့ လာရောက်လည်ပတ်ရန် ဖိတ်ကြားချက်ကို လက်ခံရရှိခဲ့ကြောင်း ရုရှားဒုတိယနိုင်ငံခြားရေးဝန်ကြီး ဆာဂေး ရာဘော့ကော့ဗ် (Sergey Ryabkov) က TASS သတင်းဌာနနှင့် အင်တာဗျူးတွင် ပြောကြားခဲ့သည်။
"သမ္မတ ထရမ့် ရုရှားဖက်ဒရေးရှင်းနိုင်ငံကို လာရောက်လည်ပတ်ဖို့ ဖိတ်ကြားချက်ကို အန်ကာရေ့ချ် (Anchorage) မြို့မှာ ပြောကြားခဲ့တာ အမှန်ပါပဲ" ဟု ၎င်းက ဆိုသည်။ ထရမ့်နှင့် အန်ကာရေ့ချ်တွင် တွေ့ဆုံပြီးနောက် နောက်တစ်ကြိမ်တွေ့ဆုံမှုကို မော်စကိုမြို့တွင် ပြုလုပ်ရန် အကြံပြုခဲ့သည့် ရုရှားသမ္မတ ဗလာဒီမီယာ ပူတင်၏ ပြောကြားချက်အပေါ် ၎င်းက မှတ်ချက်ပေးခဲ့ခြင်းဖြစ်သည်။
သို့သော်လည်း ရာဘော့ကော့ဗ်၏ အဆိုအရ အဆိုပါအစီအစဉ်နှင့် ပတ်သက်၍ လက်တွေ့ကျသော တိုးတက်မှုများ ယခုအချိန်အထိ မရှိသေးပေ။ "ရုရှားနဲ့ အမေရိကန်သမ္မတတွေကြား ဆက်သွယ်ပြောဆိုဖို့ တခြားနည်းလမ်းတွေလိုပဲ ကျွန်တော်တို့ရဲ့ ရပ်တည်ချက်က ခိုင်မာပါတယ် - အကြောင်းအရာပိုင်းဆိုင်ရာ ပြင်ဆင်မှုတွေက ပထမဦးစားပေးဖြစ်ရမှာဖြစ်ပြီး အဲဒီနောက်မှ တွေ့ဆုံမယ့်နေရာကို သဘောတူညီမှု ရယူရမှာဖြစ်ပါတယ်" ဟု အဆိုပါ အဆင့်မြင့်ရုရှားသံတမန်က ဆက်လက်ပြောကြားခဲ့သည်။
