အီရန်ကို ကြီးမားတဲ့ရေတပ်အုပ်စု စေလွှတ်ထားတယ်လို့ ဒေါ်နယ်ထရန့်ပြော
အမေရိကန်ပြည်ထောင်စုဟာ ကြီးမားတဲ့ ရေတပ်သင်္ဘောအုပ်စုကို အီရန်စေလွှတ်ထားတယ်လို့ သမ္မတ ဒေါ်နယ်ထရန့်က ဒါးဗို့စ်ကအပြန် Air Force One လေယာဉ်ပေါ်မှာ သတင်းထောက်တွေကို ပြောပါတယ်။
"ကျွန်တော်တို့မှာ သင်္ဘောတွေ အများကြီးရှိတယ်၊ အခြေအနေအရဆိုရင် အဲဒီလမ်းကြောင်းကို သွားနေတယ်" လို့ သူက ပြောပါတယ်။ ဒါပေမယ့် ဘာမှမဖြစ်တာကိုမြင်လိုတယ်လို့ ဆိုထားပြီး စောင့်ကြည့်ရမယ်လို့ ထရန့်က ဆိုပါတယ်။
အီရန်နဲ့ စီးပွားရေးလုပ်တဲ့ နိုင်ငံတိုင်းအပေါ် ၂၅ ရာခိုင်နှုန်း အခွန်ကောက်ခံဖို့ သူ့ရဲ့အစီအစဉ်နဲ့ ပတ်သက်ပြီး ဆက်လုပ်မယ်လို့ သူက ပြောပါတယ်။ ဒါက မကြာခင်မှာပဲ လို့ သူက ထပ်လောင်းပြောကြားခဲ့ပါတယ်။ အီရန်အာဏာပိုင်တွေက ဆန္ဒပြသူတွေကို နှိမ်နင်းမယ်ဆိုရင် အမေရိကန်က အီရန်ကို စစ်ရေးအရ တိုက်ခိုက်နိုင်ခြေရှိတယ်လို့ ထရန့်က အကြိမ်ကြိမ် သတိပေးခဲ့ပါတယ်။
ဒါပေမယ့် ဇန်နဝါရီ ၁၆ ရက်နေ့မှာ အီရန်ကို ကျေးဇူးတင်ကြောင်း ပြောကြားခဲ့ပြီး အီရန်က လူ ၈၀၀ ကျော်ကို ကြိုးပေးကွပ်မျက်တာကို ဖျက်သိမ်းလိုက်ပါပြီ လို့ ထရန့်က ပြောကြားခဲ့ပါတယ်။
အီရန်မှာ ပြီးခဲ့လကုန်ပိုင်းကစပြီး ဖြစ်ပွားခဲ့တဲ့ ဆန္ဒပြပွဲတွေအတွင်း လူ ၃၀၀၀ ကျော်သေဆုံးခဲ့တယ်လို့ အီရန်အာဏာပိုင်တွေက ပထမဆုံးအကြိမ် ထုတ်ပြန်ထားပါတယ်။ ငွေကြေးဖောင်းပွမှုနဲ့ ငွေကြေးတန်ဖိုး ကျဆင်းမှုကနေ စတင်ခဲ့တဲ့ ဆန္ဒပြပွဲတွေဟာ အစိုးရဆန့်ကျင်ရေး ဆန္ဒပြပွဲတွေအဖြစ် အလျင်အမြန် ပြောင်းလဲခဲ့ပါတယ်။
ဒါပေမယ့်လည်း ဆူပူအုံကြွမှုတွေ လုံခြုံရေးတပ်ဖွဲ့ဝင်တွေအပါအဝင် အနည်းဆုံး လူ ၅၀၀၀ သေဆုံးခဲ့ကြောင်း တာဝန်ရှိသူတွေနဲ့ လူ့အခွင့်ရေးအဖွဲ့တွေကို ကိုးကားပြီး ရိုက်တာသတင်းဌာနက ဖော်ပြထားပါတယ်။ အစိုးရကတော့ လက်ရှိဆန္ဒပြပွဲတွေကို ထိန်းချုပ်ထားနိုင်ပြီလို့ကြေညာခဲ့ပါတယ်။
အီရန်အာဏာပိုင်တွေဟာ ဇန်နဝါရီ ၈ ရက်မှစပြီး နိုင်ငံတဝန်းရှိ အင်တာနက်အသုံးပြုမှုတွေကို ကန့်သတ်ဖြတ်တောက်ထားတာကြောင့် အခြေအနေတွေကို အသေးစိတ် အတည်ပြုလို့မရသေးဘူးလို့ လူ့အခွင့်အရေးအဖွဲ့တွေက ပြောပါတယ်။
